2Maû 22 - ÎVUKU RÎA ÛVORO MWARO

Ahazia, mûthamaki wa Juda

¹ Gîkundi Kîam andû arîa maaûkîte na Arabu nîmaatharîkîrîte na makaûraga anake onthe a Jehoramu arîa maarî akûrû kûrî Ahazia. Ahazia tu nîke mwanake ûrîa watigarire, kwoguo andû a Jerusalemu nîmaamûtuire mûthamaki vuva wa îthe, Jehoramu.

² Ahazia aatuîkire mûthamaki arî na ûkûrû wa mîaka mîrongo îna na îîrî (42). Nîwathanire arî Jerusalemu îvinda rîa mwaka ûmwe (1). Ng'ina eetagwa Athalia mwarî wa mûthamaki Ahabu. Athalia aarî mwana wa mwarî wa Omuri, mûthamaki wa Isiraeli.

³ Ahazia nîwarûmîrîre mîthiîre ya andû a mûciî wa mûthamaki Ahabu nîûndû Ahazia aataaragwa nî ng'ina Athalia. Athalia aarî mwarî wa Ahabu.

⁴ Nîwekire maûndû macûku mbere ya Ngai-Mûnene ta ûrîa andû a mûciî wa Ahabu meekîte, nîûndû îthe akua andû a mûciî wa Ahabu nîo maatuîkire ataari ake na nîmaatûmire wîra wake ûcûke.

⁵ Ahazia nîwarûmîrîre ûtaaro wa andû acio na akînyitanîra na Joramu, mûvîcî wa Ahabu na makîthiî kûrûa na Hazaeli, mûthamaki wa Sîria. Maarûagîra Ramothi-gileadi na Joramu nîwagurarirue.

⁶ Joramu nîwacokire îtûûrarî rîa Jezireeli nîguo akavonie ironda irîa aagîte nacio arî mbaararî Ramothi-gileadi vîndî îrîa maarûaga na Hazaeli, mûthamaki wa Sîria. Nake Ahazia mûvîcî wa Jehoramu, mûthamaki wa Juda, nîwanyûrûrûkire akîthiî Jezireeli gûcerera Joramu mûvîcî wa Ahabu nîûndû aarî mûrwaru.

⁷ Ngai nîwathondekete mûvango wa kûûraga Ahazia. Kwoguo rîrîa Ahazia aakinyire Jezireeli, nîmaaumagarire na mûthamaki Joramu nîguo mathiî magatûnge Jehu mûvîcî wa Nimushi. Ngai-Mûnene nîwathuurîte Jehu nîguo akathirie mûciî wa Ahabu.

⁸ Vîndî îrîa Jehu aavingagia wendi wa Ngai kûrî andû a mûciî wa Ahabu, nîwethîrîrie anene a Juda na ciana cia Ahazia, mûthamaki wa Juda na akîmaûraga.

⁹ Nîwacokire akîthiî gûcaria kûrîa Ahazia aarî na nîwamwîthîrîrie ethithîte Samaria. Ahazia nîwavirirwe kûrî Jehu na Jehu nîwamûragire. Nao nîmaamûthikire nîûndû wa gîtîîo Kîam ûmawe mûthamaki Jehoshafati. Jehoshafati nîwathîkagîra Ngai-Mûnene na ngoro yake yonthe. Gûtirî mûndû wa mûciî wa Ahazia watigarîte ûngîatuîkire mûthamaki.

Athalia na Joashi

¹⁰ Rîrîa Athalia, ng'ina wa Ahazia aamenyire atî mûvîcî nî mûkuû, nîwaûragithirie andû onthe a nyomba ya ûthamaki wa Juda.

¹¹ Nwatî Jehosheba, mwarî wa mûthamaki Jehoramu, nîwocire Joashi mûvîcî wa Ahazia, akîmwîa kuuma kûrî anake acio engî a nyomba ya ûthamaki nîûndû maarî vakuvî kûragwa. Nîwathithire Joashi nyombarî ya kûmamwa arî na mûndû wa kûmûmenyerera. Jehosheba aarî mwarî wa mûthamaki Jehoramu na aarî mwarwang'ina na Ahazia. Jehosheba aavikîtue nî mûthînjîri-Ngai Jehoiada. Jehosheba aathithire Joashi nîguo ndakaaûragwe nî Athalia.

¹² Joashi nîwekarire athithîtwe hekarûrî îvinda rîa mîaka îtandatû (6) rîrîa Athalia aathanaga vûrûrirî ûcio.