2Maû 21 - ÎVUKU RÎA ÛVORO MWARO

¹ Jehoshafati nîwakwire na akîthikwa mbîrîrarî irîa ciathikagwa athamaki îtûûrarî rîa Daudi, nake mûvîcî Jehoramu nîwatuîkire mûthamaki vuva vake.

Jehoramu, mûthamaki wa Juda

² Jehoramu mûvîcî wa Jehoshafati, mûthamaki wa Juda aarî na aa mûrwang'ina atandatû. Nao meetagwa Azaria, Jehieli, Zekaria, Azaria, Mikaeli, na Shefatia.

³ Îthe nîwamavete iveo nyîngî mûno; sîlûva, thaavu na indo ciîngî cia goro na akîmava wa mûndû îtûûra rîrîa ririgîre vûrûrirî wa Juda. Nwatî Jehoshafati nîwavere Jehoramu ûthamaki nîûndû nîke warî îrikithathi.

⁴ Rîrîa Jehoramu eekarîre gîtî Kîam ûthamaki na wathani wake ûgîîkindîria, nîwaûragire aa mûrwang'ina onthe wa vamwe na anene amwe a Isiraeli.

⁵ Jehoramu aatuîkire mûthamaki wa Juda arî na ûkûrû wa mîaka mîrongo îthatû na îîrî (32). Aathanire arî Jerusalemu îvinda rîa mîaka înana (8).

⁶ Nîwavikirie mwarî wa Ahabu, mûthamaki wa Isiraeli. Kwoguo nîwarûmîrîre mîthiîre ya athamaki a Isiraeli na nîwekire maûndû macûku mbere ya Ngai-Mûnene.

⁷ Kûnarî ûguo, Ngai-Mûnene ndaathiria wathani wa Daudi nîûndû nîwarûthîte kîrîkanîro nake, atî njiarwa ciake nîitûûra ciathanaga tene na tene.

⁸ Vîndî ya ûthamaki wa Jehoramu, andû a Edomu nîmaamûkanire na wathani wa Juda na makîgîa na ûthamaki wao.

⁹ Kwoguo mûthamaki Jehoramu nîwathiîre kûtharîkîra andû a Edomu arî na anene ake a mbaara na ikaari cia mbarathi, nao andû a Edomu nîmaamûthiûrûrûkîrie. Mûthamaki Jehoramu nîwaûkîrire ûtukû na akîtharîkîra andû a Edomu.

¹⁰ Kuuma vîndî îo nginya ûmûnthî vûrûri wa Edomu ûtûûraga ûreganaga na wathani wa Juda. Kavindarî wa kau, andû a Libuna wa nao nîmaareganire na wathani wa Jehoramu mûthamaki wa Juda nîûndû Jehoramu nîwatiganîrîtie Ngai-Mûnene, Ngai wa methe make.

¹¹ Wana nîwarûthîte kûndû gwa kûgoocagîra ngai cia mûvuanano irîmarî cia Judea. Nîwatûmire andû a Juda na a Jerusalemu mevîrie Ngai-Mûnene.

¹² Mûrathi Elija nîwatûmîre mûthamaki Jehoramu maarûa akîmwîra atîrî, “Ngai-Mûnene, Ngai wa aguo Daudi augîte atî, we ndwîthîrîtwe na mîthiîre ta ya aguo Jehoshafati kana Asa, mûthamaki wa Juda.

¹³ Nwatî wîthîrîtwe ûkîrûmîrîra mîthiîre ya athamaki a Isiraeli na nîwatûmire andû a Juda na a Jerusalemu matige kwîvoka Ngai, wata ûrîa Ahabu na athamaki a mûciî wake andû a Isiraeli matiga gûtuîka evokeku kûrî Ngai. We nîwaûragire aa mûrwanyûkwe arîa mwaciaranîrîtue nao na maarî aro gûgûkîra.

¹⁴ Kwoguo, Ngai-Mûnene nî agûtûma mûthiro ûgwate andû aku, ciana ciaku, aka aku na indo cionthe ciaku.

¹⁵ Nawe nîûkaagwatwa nî mûrimû mûcûku mûno mararî maku, ûrîa ûkaathiî ûgîgûcûkagîra wa mûthenya wa mûthenya nginya mara maku maume.”

¹⁶ Ngai-Mûnene nîwatûmire Afilisiti na Arabu arîa maatûûraga vakuvî na Ethiopia marakarue nî Jehoramu.

¹⁷ Nao nîmaatharîkîre Juda na magîtava ûtonga wonthe ûrîa warî nyomba kwa mûthamaki Jehoramu wana avîcî ake na aka ake. Mûvîcî ûrîa warî mûnini mûno wetagwa Ahazia nwake wenga watigirwe.

¹⁸ Vuva wa maûndû mama gwîkîka Ngai-Mûnene nîwatûmire mûthamaki Jehoramu anyitwa nî mûrimû ûtangîvora mararî make.

¹⁹ Îvinda rîa mîaka îîrî mûthamaki eethîrîtwe arî mûrwaru na athiîcaga agîcûkagîrwa wa mûthenya wa mûthenya. Mûthiiarî wa mwaka wa kaîrî mara ma mûthamaki nîmaaumire nîûndû wa mûrimû na nîwakwire arî na ûrûrû mwîngî mûno. Andû ake matiakia mwaki nîûndû wa kwonania gîtîîo kûrî ke ta ûrîa wakîrîtue methe make.

²⁰ Jehoramu aatuîkire mûthamaki arî na ûkûrû wa mîaka mîrongo îthatû na îîrî (32). Aathanire arî Jerusalemu îvinda rîa mîaka înana (8). Rîrîa aakwire gûtirî mûndû weririre. Nîwathikirwe îtûûrarî rîa Daudi, nwatî ndaathikwa mbîrîrarî irîa ciathikagwa athamaki.