2Maû 20 - ÎVUKU RÎA ÛVORO MWARO

Mbaara gatagatî ka Juda na Edomu

¹ Vuvarî athigari a Moabu na a Aamoni na andû amwe a Ameuni arîa maagwatanagîra nao, nîmaatharîkîre Juda.

² Nao anjaama amwe nîmaaûkire na makîra mûthamaki Jehoshafati atîrî, “Gîkundi kînene Kîam athigari nîmaûkîte gûkûtharîkîra kuuma Edomu mwena ûrîa wîngî wa îria rîa Cumbî. Na rîu makinyîte Hazazoni-tamaru” (na rîîtwa rîngî îtagwa Engedi).

³ Jehoshafati nîwamakire na akîvoya Ngai-Mûnene amwonie ûrîa agwîka. Nîwacokire akîanîrîra andû onthe a vûrûri wa Juda menyerekie.

⁴ Andû onthe a Juda kuuma matûûrarî monthe nîmaagomanire vamwe nîguo mavoe Ngai-Mûnene amatethie.

⁵ Mûthamaki Jehoshafati nîwarûngamire varîa andû a Juda na a Jerusalemu maagomanîte kîvarorî kîrîa gîcerû Kîam hekarû,

⁶ na nîwavoire akiugaga atîrî, “Ngai-Mûnene, Ngai wa methe metû, kinthî tîwe Ngai ûrîa ûrî Îgûrû? Na kinthî tîwe wathaga mothamaki monthe ma nthî? We ûrî na vinya na ûvoti, kwoguo gûtirî mûndû ûngîgwîtirîria.

⁷ Ngai wetû, vîndî îrîa andû a Isiraeli maatonyire vûrûrirî ûyû, kinthî ndwengatire andû arîa maatûûraga kuo na ûkîûva njiarwa cia Iburahimu, mûrata waku nîguo ûtuîke wao tene na tene?

⁸ Nîmaatûûrire vûrûrirî ûyû na magîgûtumîra hekarû nîguo ûgoocagîrwe kuo na makiuga atî,

⁹ thîna ûngîgaaûka, mbaara, mûthiro, mûrimû kana yûra, nîmagaaûka marûngame mbere yaku gûkû hekarûrî îno ûgoocagîrwa. Nîmagaagûkaîra marî mathînarî nawe nîûkaamegua na ûmavonokie.

¹⁰ “Taroria, andû a Aamoni, a Moabu na a Edomu nîmatûtharîkîrîte. Rîrîa andû a Isiraeli maaumaga Misiri ndwametîkîria matonye mavûrûri mau. Kwoguo matiamacûkangia.

¹¹ Taroria rîu ûrîa maratwîka. Maûkîte gûtûtharîkîra nîguo tuume vûrûrirî ûrîa watûveere ûtuîke wetû.

¹² Ûûi Ngai wetû, verithia andû aya nîûndû tue tûtirî na vinya wa kûrûa na athigari aya eengî ûguo maûkîte gûtûtharîkîra. Tûtiîcî nîtwîka atîa, nwatî we nîwe twetererete ûtûtethie.”

¹³ Vîndî îo arûme onthe a Juda na aka ao na ciana, maarûngamîte hekarûrî mbere ya Ngai-Mûnene.

¹⁴ Roho wa Ngai-Mûnene nîwacokire ûgîûka kûrî Jahazieli, ûmwe wa andû acio maagomanîte. Jahazieli aarî mûvîcî wa Zekaria, Zekaria aarî mûvîcî wa Benaia, Benaia aarî mûvîcî wa Jeieli, Jeieli aarî mûvîcî wa Matania. Jahazieli aarî Mûlawi wa mbarî ya Asafu.

¹⁵ Jahazieli nîwaugire atîrî, “Mûthamaki Jehoshafati na andû onthe arîa mûtûûraga Juda na Jerusalemu, tanthikîrîriani. Ngai-Mûnene augîte atî, mûtigetigîre na mûtikegue guoya nîûndû wa athigari aya eengî ûguo, nîûndû mbaara tî yenyu nî ya Ngai.

¹⁶ Thiîni mûkaatharîkîra andû acio rûyû rîrîa makethîrwa maûkîrîrîte mwanyarî wa Zizi. Nîmûgaatûngana nao mûthiiarî wa Kîamnda mwena wa îrathîro wa werû wa Jerueli.

¹⁷ Mûtikaavatara kûrûa mbaararî îno. Thiîni mûkeevarîria na mwetere na nîmûkoona Ngai-Mûnene akîmûvootanîra. Mue andû a Juda na a Jerusalemu mûtigetigîre na mûtikegue guoya. Mûkaathiî mûkatharîkîre andû acio na Ngai-Mûnene nîakethîrwa arî vamwe namue!”

¹⁸ Mûthamaki Jehoshafati nîwenamîrîre na agîturumithia ûthiû wake nthî, nao andû onthe a Juda na a Jerusalemu nîmeenamîrîre na magîturumithia mothiû mao nthî na makîgooca Ngai-Mûnene.

¹⁹ Nao andû a mûvîrîga wa Lawi a mbarî ya Kohathu na ya Kora, nîmaarûngamire na magîkumia Ngai-Mûnene, Ngai wa Isiraeli maugîrîrîtie mûno.

²⁰ Kîraûko tene, andû onthe a Juda na a Jerusalemu nîmaathiîre werûrî wa Tekoa. Mbere ya mambîrîria rûgendo Jehoshafati nîwamerire atîrî, “Tanthikîrîriani mue andû a Juda na a Jerusalemu! Îîvokeni Ngai-Mûnene, Ngai wenyu na nîmûkwîvanda. Îtîkiani ûrîa arathi ake makûmwîra na nîmûkûvootana.”

²¹ Mûthamaki Jehoshafati arîkia kwaranîria na andû, nîwathuurire andû a kwina na akîmatha mekîre nguo cia nyîmbo, macoke mathiî marî mbere ya athigari a mbaara makinaga atîrî, “Cokeriani Ngai-Mûnene ngatho! Nîûndû wendo wake ûtathiraga nî wa tene na tene!”

²² Rîrîa maambîrîrie kwina, Ngai-Mûnene nîwatûmire athigari a mbaara a Aamoni, Moabu na a Edomu arîa maaûkîte kûtharîkîra andû a Juda mavîngîcîke na nîmaavootirwe.

²³ Andû a Aamoni na a Moabu nîmaatharîkîre athigari a Edomu na makîmaûraga onthe. Marîkia kûraga andû a Edomu, nîmaacokire makîambîrîria kûragana o ene.

²⁴ Rîrîa athigari a mbaara a Juda maakinyire vandû vatûgîru kûu werûrî, nîmaaroririe nîguo mone andû acio eengî ûguo, nwatî moonire ciimba cia andû inyagarûkîte werûrî. Gûtirî wanarî ûmwe wavonokete.

²⁵ Mûthamaki Jehoshafati na athigari ake nîmaathiîre gûtava indo kuuma kûrî andû acio na nîmethîîre ng'ombe nyîngî, indo ciîngî, nguo na indo cia goro. Indo icio ciarî nyîngî mûno irîa maaûnganîtie îvinda rîa mîthenya îthatû nwatî matiavota gûikuua cionthe.

²⁶ Mûthenya wa kana, nîmaagomanire vamwe Kîamndarî Kîam Beraka nîguo makumie Ngai-Mûnene. Kîanda kîu gîtagwa Beraka nginya ûmûnthî.

²⁷ Jehoshafati nîwacokire agîtongoria andû onthe a Juda na a Jerusalemu magîcoka Jerusalemu marî na gîkeno, nîûndû Ngai-Mûnene nîwamavotithîtie kûvoota nthû ciao.

²⁸ Makinya Jerusalemu, nîmaathiîre hekarûrî makinaga na ngita, mîtûrirû na tûrumbeta.

²⁹ Mothamaki ma mavûrûri monthe marîa megwire ûrîa Ngai-Mûnene aavootete nthû cia Isiraeli nîmeetigîre Ngai.

³⁰ Kwoguo ûthamaki wa Jehoshafati nîwekarire ûrî na thayû, nîûndû Ngai nîwamûgitîrîte kuuma mîena yonthe.

Mûthiia wa wathani wa Jehoshafati

³¹ Jehoshafati aatuîkire mûthamaki wa Juda arî na ûkûrû wa mîaka mîrongo îthatû na îtano (35). Nîwathanire arî Jerusalemu îvinda rîa mîaka mîrongo îîrî na îtano (25). Ng'ina wa Jehoshafati eetagwa Azuba mwarî wa Shilihi.

³² Jehoshafati nîwarûmîrîre mîthiîre ya îthe Asa na nîwekaga maûndû marîa maarî magîrîru mbere ya Ngai-Mûnene.

³³ Nwatî kûnarî ûguo, kûndû kûrîa kwavoyagîrwa ngai cia mîvuanano gûtiomomorwa na andû matiarî acokereru kûgooca Ngai wa methe mao na ngoro ciao.

³⁴ Maûndû mau mengî marîa mûthamaki Jehoshafati eekire kuuma Kîammbîrîria nginya mûthiia nîmandîke rûganorî rwa Jehu, mûvîcî wa Hanani. Na nîmandîke îvukuurî rîa maûndû ma tene ma athamaki a Isiraeli.

³⁵ Vuvarî, mûthamaki Jehoshafati nîmaanyitanîre na Ahazia, mûthamaki wa Isiraeli. Ahazia nîwekîte maûndû meengî ma waganu.

³⁶ Jehoshafati na Ahazia nîmaarîkanîre matume meri cia kûthiîcaga Tarishishi. Meri icio ciatumîrwe Ezioni-geberi.

³⁷ Eliezeri mûvîcî wa Dodavahu wa kuuma îtûûrarî rîa Maresha, nîwarathire maûndû na agîkaania Jehoshafati akîmwîra atîrî, “Nîûndû nîmwanyitanîra na Ahazia, Ngai-Mûnene nîagûcûkangia indo icio mûrûthire.” Meri icio nîciacûkangire na itiavota kûthiî Tarishishi.