2Maû 2 - ÎVUKU RÎA ÛVORO MWARO

Kûvarîria Gûtuma Hekarû

¹ Mûthamaki Solomoni nîwatwire nîagûtuma hekarû varîa Ngai-Mûnene akaagoocagîrwa wa vamwe na gûtuma nyomba yake ya ûthamaki.

² Nîwavere andû ngiri mîrongo mûgwanja (70,000) wîra wa gûkuua indo cia gûtuma, andû ngiri mîrongo înana (80,000) wîra wa kumia mathiga kwarerî na andû engî ngiri ithatû na magana matandatû (3,600) wîra wa kûrûngamîrîra andû acio.

³ Solomoni nîwatûmanire kûrî Hiramu, mûthamaki wa Turo na akîmwîra atîrî, “Mindîra mîtî ya mîtarakwe ta ûrîa wekire vava Daudi rîrîa wamwindîre mîtî ya gûtuma nyomba yake.

⁴ Nînîratuma hekarû ya Ngai-Mûnene, Ngai wakwa na nîmîamûrîre ke, îtuîke ya kûvîvagîrua matega ma ûbani ûrîa mûnungi waro na gwa kwigagwa mûgate ûrîa mwamûre vîndî cionthe. Nwakuo gûkaarutagîrwa matega ma kûvîvua marîa marutagwa iraûko cionthe na ivwaî cionthe, na mîthenya ya thavatû, irugo cia mweri wacicûka, na irugo cia mîthenya îrîa mîamûre, wata ûrîa athîte andû a Isiraeli matûûre mekaga tene na tene.

⁵ Hekarû îrîa ngaatuma îkethîrwa îrî nene nîûndû Ngai wetû nî mûnene gûkîra ngai cionthe.

⁶ Nwatî nî ûrîkû ûngîvota kûmûtumîra nyomba, nîûndû wana îgûrû, kûrîa îgûrû mûno ndangîganîra kuo. Nie nîrî û atî nîmûtumîre nyomba tiga nwa ndumire vandû va kûvîvagîria Ngai ûbani?

⁷ Kwoguo ndûmîra mûndû wî na wara wa kûrûtha indo cia thaavu, sîlûva, gîcango, cuuma na ûngîtuma nguo na ndigi cia rangi wa njambarawe, vururu, na rangi ndune. Mûndû ûcio nî akaarutithanagia wîra na andû arîa marî na wara a Juda na Jerusalemu arîa vava Daudi aathuurire.

⁸ Ndûmîra mîtî ya mîtarakwe, mîthithinda na mîthengera kuuma Lebanoni. Nîmbicî atî andû ndungata ciaku irî na wara wa gûtema mîtî kûu Lebanoni na nî magaatethania na ndungata ciakwa

⁹ gwatûra mbaû cia kwîgana nîûndû hekarû îrîa nîrenda gûtuma îkethîrwa îrî nene na ya magegania.

¹⁰ Nîngaakûnengera tani ngiri igîrî (2,000) cia ngano, cairi tani ngiri igîrî (2,000), lita ngiri magana mana (400,000) cia ndivei na lita ngiri magana mana (400,000) cia maguta ma ndamaiyû.”

¹¹ Nake Hiramu, mûthamaki wa Turo nîwacokerie Solomoni maarûa amwandîkîrîte atîrî, “Solomoni, Ngai-Mûnene nîaragûtwire mûthamaki wa andû ake nîûndû nîamendete.

¹² Ngai-Mûnene, Ngai wa Isiraeli ûrîa waûmbire îgûrû na nthî arokumua! Nîwavere mûthamaki Daudi mwanake mûûgî wî na ûmenyo mwîngî na wara, ûrîa ûgaatuma hekarû ya Ngai-Mûnene na etumîre nyomba ya ûthamaki.

¹³ Nînagûtûmîra mûndû wî na wara na ûmenyo wîtagwa Huramabi,

¹⁴ na ng'ina nî wa kuuma kûrî erîtu a mbarî ya Dani, nake îthe nî wa kuuma Turo. Nîmûthomithie kûrûtha indo na thaavu, sîlûva, gîcango, cuuma, mathiga, mîtî na ndigi cia rangi wa vururu, njambarawe, na rangi ndune wa vamwe na gûtuma nguo mbaro. Huramabi nwa aumie indo cia mîthemba yonthe na nwa arute wîra wonthe ûrîa ûngîmwonia arute. Ke nîakaarutithania wîra na mavundi maku, na mavundi marîa aguo Daudi mwathi wakwa aathuurire.

¹⁵ Kwoguo, tûtûmîre indo irîa watwîrîre. Indo icio nî: ngano, cairi, ndivei na maguta ma ndamaiyû.

¹⁶ Tûgaagûtemera mîtî îrîa ûkwenda ya mîthithinda kuuma kîrîmarî Kîam Lebanoni na tûmîovanie na tûmikie manjîrî yûke nginya Jopa kûrî we. Nîûgaacoka ûmîvire Jerusalemu.”

Hekarû nîyambîrîrie gûtumwa

¹⁷ Mûthamaki Solomoni nîwaugire ageni onthe arîa maatûûraga vûrûrirî wa Isiraeli matarwe, ûtari ta ûrîa wekirwe nî îthe Daudi. Nao ageni onthe maarî andû ngiri îgana rîa mîrongo îtano na ithatû na magana matandatû (153,600).

¹⁸ Nîwavere ageni ngiri mîrongo mûgwanja (70,000) wîra wa gûkuua indo cia gûtuma hekarû na ageni ngiri mîrongo înana (80,000) wîra wa kumia mathiga vûrûrirî kûrîa kûrî irîma. Nao ageni ngiri ithatû na magana matandatû (3,600) nîmaaveerwe wîra wa kûrûngamîrîra andû acio.