2Maû 19 - ÎVUKU RÎA ÛVORO MWARO

Mûrathi nîwanegenirie Jehoshafati

¹ Jehoshafati, mûthamaki wa Juda nîwacokire nyombarî yake ya ûthamaki kûu Jerusalemu arî na thayû.

² Nwatî mûrathi Jehu mûvîcî wa Hanani, nîwathiîre kûmûtûnga na akîmwîra atîrî, “Ûreciria nî kwagîrîrîte ûgatethie andû arîa aganu na ûkagwatanîre na arîa mathûrîte Ngai-Mûnene? Ûguo ûrekire nîûratûmire Ngai-Mûnene arakare nîwe.

³ Kûnarî ûguo, nîwonetwe ûrî na maûndû maro. Nîwathiririe mîvuanano ya Ashera, ngai ya mûndûmûka gûkû vûrûrirî îrîa andû maagoocaga na nîûgeretie mûno gûcaria wendi wa Ngai na ngoro yonthe.”

Jehoshafati nîwaretire ûgarûrûku

⁴ Mûthamaki Jehoshafati aatûûraga Jerusalemu, nwatî nîwathiîcaga gûcerera andû mavinda meengî. Nîwathiîcaga Beerisheba mwena wa îveti na nginya rûtere rwa vûrûri ûrîa ûrî irîma wa Efiraimu mwena wa rûgûrû. Nîwetaga andû nîguo macokerere Ngai-Mûnene, Ngai wa methe mao.

⁵ Nîwathuurire atirîrîri vûrûri matûûrarî monthe marîa maarî mairigîre vûrûrirî wa Juda.

⁶ Nîwamerire atîrî, “Menyagîrîrani rîrîa mûgûtwithania maciira, nîûndû mûtigaatucaga na vinya wenyu, nwatî mûkaamatucaga na vinya wa Ngai-Mûnene nîûndû nîke ûmûtûmîte na akethagîrwa namue vîndî îrîa mûgûtua ciira.

⁷ Vecagani Ngai-Mûnene gîtîîo na mûrûthage maûndû mûvarîrîte, nîûndû Ngai-Mûnene, Ngai wetû ndendaga ûndû ûtarî wa kîvooto, ndarî kîmenyano na ndamûkagîra mavaki.”

⁸ Îtûûrarî rîa Jerusalemu Jehoshafati nîwathuurire Alawi, athînjîri-Ngai na atongoria a mbarî cia Isiraeli matuîke a gûtuithanagia maciira vandûrî va Ngai-Mûnene rîrîa andû mavîtanîtie. Andû acio maatûûraga Jerusalemu.

⁹ Nîwamerire atîrî, “Rutagani mawîra mau monthe mûgîîtigagîra Ngai-Mûnene na mûkîmwathîkagîra mûrî na wîvokeku na ngoro yonthe.

¹⁰ Rîrîa andû enyu arîa matûûraga matûûrarî mao makaamûretera ciira îgiî kûûragana, kuna watho, maathani, kana matuîro ma ciira, nwanginya mûkaamataaraga waro nîguo matikaavîtîrie Ngai-Mûnene. Mwarega kûmataara, nîmakeevia na Ngai-Mûnene nîîkarakara nî mue wana andû enyu, nwatî mwamataara mûtikethîrwa mûrî na mavîtia.

¹¹ Amaria, Mûthînjîri-Ngai mûnene nîke ûkethagîrwa arûngamîrîrîte maûndû monthe megiî Ngai-Mûnene. Nake Zebadia mûvîcî wa Ishumaeli, mûnene wa Juda nîke ûkethagîrwa arî na îtua rîa mûthiia maûndûrî monthe ma vûrûri. Nao Alawi nîo makoonaga atî maûndû monthe nîmarathiî ûrîa kwagîrîrîte. Îîyûmîrîrieni na mûrûmîrîre maûndû mama, nake Ngai-Mûnene aroîthagîrwa na andû arîa agîrîru!”