2Maû 18 - ÎVUKU RÎA ÛVORO MWARO

Mûrathi Mikaia nîwakaanirie mûthamaki Ahabu

¹ Rîrîa Jehoshafati mûthamaki wa Juda aagîre na ûtonga mwîngî na akîgîa na îgweta, nîwavangire mûndû wa mûciî wake arûthe ûviki na mûndû wa mûciî wa Ahabu, mûthamaki wa Isiraeli.

² Vuva wa mîaka mîîngî nîwanyûrûrûkire na akîthiî Samaria gûcerera Ahabu. Mûthamaki Ahabu nîwathînjîre Jehoshafati na andû arîa maathiîte nake ng'ondu na ndegwa nyîngî. Ahabu nîwacokire akîringîrîria Jehoshafati mathiî marî vamwe makatharîkîre îtûûra rîa Ramothi-gileadi.

³ Ahabu, mûthamaki wa Isiraeli nîwaûririe Jehoshafati mûthamaki wa Juda atîrî, “Nîûgwîtîkîra tûthiî nawe tûkatharîkîre Ramothi-gileadi?” Nake Jehoshafati nîwamûcokerie atîrî, “Îî nînetîkîra, athigari akwa a mbaara nwa ta athigari aku. Nîtûkûnyitanîra nawe mbaararî.”

⁴ Nîwacokire akîra mûthamaki wa Isiraeli atîrî, “Mbere amba ûrie ûtaaro kuuma kûrî Ngai-Mûnene.”

⁵ Kwoguo mûthamaki Ahabu nîwagomanirie arathi ta magana mana (400) vamwe na akîmaûria atîrî, “Nîtwagîrîrwe nî kûthiî kûtharîkîra îtûûra rîa Ramothi-gileadi kana tûtiagîrîrwe?” Nao nîmaamûcokerie atîrî, “Thiî ûkarîtharîkîre. Ngai nîagûkûvotithia kûrîvoota.”

⁶ Nwatî mûthamaki Jehoshafati nîwaûririe atîrî, “Gûtirî na mûrathi wîngî wa Ngai-Mûnene tûngîûria ûtaaro kuuma kûrî ke?”

⁷ Nake Ahabu nîwamûcokerie atîrî, “Kûrî na wîngî ûmwe wîtagwa Mikaia mûvîcî wa Imula. Nwatî nîrî mûmûthûru nîûndû ndandathagîra maûndû maro tiga wa marîa macûku.” Nake Jehoshafati nîwamwîrire atîrî, “Mûthamaki ndwagîrîrwe nî kuga ûguo.”

⁸ Mûthamaki wa Isiraeli nîwetire mûnene ûmwe na akîmwîra atîrî, “Thiî ûgete Mikaia mûvîcî wa Imula na ûmûrete narua.”

⁹ Ahabu, mûthamaki wa Isiraeli na Jehoshafati, mûthamaki wa Juda nîmeekîrîte nguo ciao cia ûthamaki na magekarîra itî cia ûthamaki îtîrirî varîa vaavûragîrwa ngano vakuvî na kîvingo gîa îtûûra rîa Samaria. Nao arathi onthe nîmaarathaga movoro marî mbere yao.

¹⁰ Nake mûrathi ûmwe wetagwa Zedekia, mûvîcî wa Kenaana nîwarûthire mvîa cia cuuma na akîra Ahabu atîrî, “Ngai-Mûnene augîte atî, ‘Mvîa ino nîcio ûgaatûmîra kûrûa na andû a Sîria nginya ûmathirie viû.’ ”

¹¹ Arathi acio engî wa nao maarathaga wa ûguo, na nîmaaugire atîrî, “Thiîni mûkatharîkîre îtûûra rîa Ramothi-gileadi na nîmûkûvootana. Ngai-Mûnene nîagûtûvotithia kûvootana.”

¹² Nake mûnjaama ûrîa watûmîtwe agete Mikaia nîwamwîrire atîrî, “Tathikîrîria, arathi acio engî onthe nîmarathîrîte mûthamaki maûndû maro, wa nawe rathîra mûthamaki maûndû maro ta arathi acio engî.”

¹³ Nwatî Mikaia nîwaugire atîrî, “Wata ûrîa Ngai-Mûnene atûûraga mwoyo, ûrîa Ngai akambîra mbuge nîguo ngauga.”

¹⁴ Rîrîa Mikaia aakinyire, mûthamaki nîwamûririe atîrî, “Mikaia, nîtwagîrîrwe nî kûthiî kûtharîkîra îtûûra rîa Ramothi-gileadi kana tûtiagîrîrwe?” Nake Mikaia nîwamûcokerie atîrî “Thiîni mûkarîtharîkîre na nîmûkûvootana. Ngai-Mûnene nîakûmûvotithia kûvootana.”

¹⁵ Ahabu nîwacokirie atîrî, “Ûrenda ngwîre maita megana, atî rîrîa ûkwaria nanie rîîtwarî rîa Ngai-Mûnene waragie ûma mûtheri?”

¹⁶ Nake Mikaia nîwaugîre atîrî, “Nînoonire andû onthe Isiraeli manyaganîtie irîmarî ta ng'ondu itarî na mûrîthi. Nake Ngai-Mûnene nîwaugire atîrî, ‘Andû aya matirî na mûtongoria, nîmacoke wa mûndû gwake mûciî marî na thayû.’ ”

¹⁷ Nake Ahabu nîwerire Jehoshafati atîrî, “Ndikwîrire atî ndangîndathîra ûndû mwaro tiga wa ûndû mûcûku?”

¹⁸ Mikaia nîwacokire akiuga atîrî, “Kwoguo thikîrîria ûrîa Ngai-Mûnene augîte! Nînoonire Ngai-Mûnene ekarîrîte gîtî gîake Kîam ûthamaki kûu îgûrû, nao araika ake onthe maarûngamîte mamûthiûrûrûkîrîtie.

¹⁹ Ngai-Mûnene nîwaûririe atî, ‘Nîûrîkû ûkûthiî aveenererie Ahabu nîguo etîkîre kûthiî nîguo akaûragîrwe Ramothi-gileadi?’ Wa mûraika nîwacokirie wa ûrîa eeciragia.

²⁰ Nîgwacokire gûgîûka roho na akîrûngama mbere ya Ngai-Mûnene na akiuga atîrî, ‘Ngaamûthaîrîria.’ Ngai-Mûnene nîwamûririe atîrî, ‘Ûkaamûthaîrîria atîa?’

²¹ Nake roho nîwacokirie atîrî, ‘Nîngaathiî na ndûme arathi onthe a Ahabu maveenanie.’ Nake Ngai-Mûnene nîwamûcokerie atîrî, ‘Thiî ûkamûthaîrîrie, na nîûkaavootana.’ ”

²² Mikaia nîwarîkîrie na kuga atîrî, “Ngai-Mûnene nîke wîkîrîte roho wa maveeni tûnyuarî twa arathi acio aku. Nwatî Ngai-Mûnene nîwarîtie maûndû macûku makwîgiî!”

²³ Mûrathi Zedekia mûvîcî wa Kenaana nîwacokire akîthiî kûrî Mikaia na akîmûringa rûvî na akîmûria atîrî, “Nî kuuma rî roho wa Ngai-Mûnene aaumire kûrî nie na agîûka kwaria nawe?”

²⁴ Mikaia nîwamûcokerie atîrî, “Mûthenya ûrîa ûkaathiî na ûtonye kanyomba ka ndaarî kwîthitha nîrîo ûkaamenya.”

²⁵ Ahabu, mûthamaki wa Isiraeli nîwathire mûnene wake ûmwe akîmwîra atîrî, “Nyita Mikaia na mûmûcokie kûrî Amoni, mûnene wa îtûûra na kûrî Joashi, mûvîcî wa mûthamaki,

²⁶ na mûmeere mamwikie njeera na avecagwe kamûgate kanini na manjî nginya rîrîa ngaacoka na thayû.”

²⁷ Mikaia nîwaugire atîrî, “Ahabu ûngîgaacoka ûrî na thayû ûkaamenya atî, Ngai-Mûnene ndarîtie nanie!” Nîwacokire akiuga atîrî, “Mue muonthe mûtikariganîrwe nî ûguo nauga!”

Gûkua kwa Ahabu

²⁸ Ahabu, mûthamaki wa Isiraeli na Jehoshafati mûthamaki wa Juda nîmaathiîre kûtharîkîra îtûûra rîa Ramothi-gileadi.

²⁹ Ahabu nîwerire Jehoshafati atîrî, “Tûkîthiî mbaararî, ngaathiî nîîrigarîtie, nwatî we ûgeekîra nguo ciaku cia ûthamaki.” Kwoguo mûthamaki wa Isiraeli nîwathiîre mbaararî erigarîtie.

³⁰ Mûthamaki wa Sîria nîwathîte anene a ikaari cia mbarathi na akîmeera matikatharîkîre mûndû wana ûrîkû, arî mûnene kana arî mûnini tiga mûthamaki wa Isiraeli.

³¹ Rîrîa anene acio a ikaari cia mbarathi moonire Jehoshafati, nîmeciririe atî nîke mûthamaki wa Isiraeli, kwoguo nîmaagarûrûkire nîguo mamûtharîkîre. Nwatî Jehoshafati nîwaugîrîrie na Ngai-Mûnene nîwamûtethirie. Ngai nîwatûmire andû arîa maamûtharîkagîra matige kûmûtharîkîra.

³² Anene a ikaari cia mbarathi nîmoonire atî tîke mûthamaki wa Isiraeli, kwoguo nîmaatigire kûmûrûmîrîria.

³³ Nwatî mûndû ûmwe wa Sîria nîwagucirie ûta wake aterîgîrîrîte na akîrathîra mûthamaki wa Isiraeli gatagatî ka ngo yake ya cuuma ya kûgitîra kîthûri na varîa indo icio ciîngî cia mbaara inyitithanîrîtue. Nake mûthamaki wa Isiraeli nîwerire mûndû ûrîa warugutaga gîkaari gîake Kîam mbaara augîrîrîtie atîrî, “Nînagurarua! Garûrûka na ûndute mbaararî!”

³⁴ Mbaara nîyanenevire mûno mûthenya ûcio, nake mûthamaki Ahabu eekarîte atirîtwe gîkaarirî Kîam mbarathi erekerete kûrî andû a Sîria. Na rîrîa riûa rîathûaga nîwakwire.