2Maû 17 - ÎVUKU RÎA ÛVORO MWARO

Jehoshafati nîwatuîkire mûthamaki

¹ Jehoshafati nîwatuîkire mûthamaki wa Juda vuva wa îthe Asa na agîtûma ûthamaki wake ûgîe na vinya wa kûrûa na Isiraeli.

² Nîwaigire ikundi cia athigari matûûrarî monthe ma Juda marîa maarî mairigîre, mîenarî îrîa îngî ya vûrûri wa Juda na matûûrarî ma vûrûri wa Efiraimu marîa îthe Asa aanyitîte.

³ Ngai-Mûnene nîwarathimire Jehoshafati nîûndû nîwarûmîrîre mîtugo îrîa îthe Asa aarî nayo. Jehoshafati ndaagooca Baali.

⁴ Nwatî nîwagoocaga Ngai wa îthe na akarûmîrîra maathani make, na ndeeka ta ûrîa athamaki a Isiraeli meekaga.

⁵ Kwoguo Ngai-Mûnene nîwatûmire ûthamaki wa Jehoshafati wîvande waro. Nao andû onthe a Juda nîmaamûviragîra iveo, agîtonga na agîtîwa mûno.

⁶ Jehoshafati nîwendeete mûno na ngoro yake gûtungatîra Ngai-Mûnene. Nîwacûkangirie kûndû kûrîa kwagoocagîrwa ngai cia mîvuanano na mûvuanano wa Ashera, ngai ya mûndûmûka vûrûri wa Juda.

⁷ Mwakarî wa kathatû wa wathani wake, Jehoshafati nîwatûmire anene ake mathiî makathomithanie matûûrarî ma Juda. Anene acio maarî Benihaili, Obadia, Zekaria, Nethaneli, na Mikaia.

⁸ Nîwatûmire Alawi kenda (9) na athînjîri-Ngai aîrî mathiîcanie nao. Alawi acio maarî, Shemaia, Nethania, Zebadia, Asaheli, Shemiramothi, Jehonathani, Adonija, Tobija, na Tobadonija. Nao athînjîri-Ngai maarî, Elishama, na Jehoramu.

⁹ Nîmoocire îvuku rîa watho wa Ngai-Mûnene na makîthiî makîthomithagia andû matûûrarî monthe ma Juda.

Jehoshafati nîwatuîkire mûthamaki wî na Vinya

¹⁰ Ngai-Mûnene nîwatûmire mavûrûri monthe marîa maathiûrûrûkîrîtie Juda metigîre kûrûa na mûthamaki Jehoshafati.

¹¹ Afilisiti amwe nîmaavirîre Jehoshafati iveo, na sîlûva nyîngî. Nao Aarabu nîmaamûvirîre ndûrûme ngiri mûgwanja cia magana mûgwanja (7,700) na nthenge ngiri mûgwanja cia magana mûgwanja (7,700).

¹² Mûthamaki Jehoshafati nîwathiîre na mbere kûgîa na vinya mûno vûrûrirî wa Juda. Nîwatumire matûûra marî na nyomba cia kwigwa indo na akîmairigîra na rûthingo.

¹³ Kwoguo Jehoshafati aarî na nyomba nene cia kwigwa indo kûu vûrûrirî wa Juda. Jerusalemu nîwaigire athigari a mbaara arîa maarî na ûûgî mwîngî wa mbaara.

¹⁴ Ûyû nîguo mûtaratara wao kûringana na mbarî cia methe mao. Adina aarî mûnene wa ikundi cia athigari a mbaara kuuma kûrî mbarî cia Juda, irî na athigari njamba a mbaara ngiri magana mathatû (300,000).

¹⁵ Wa kaîrî ûnenerî aarî Jehohanani, ûrîa warî mûnene wa athigari a mbaara ngiri magana maîrî ma mîrongo înana (280,000),

¹⁶ wa kathatû aarî Amazia mûvîcî wa Zikiri, arî mûnene wa athigari njamba a mbaara ngiri magana maîrî (200,000). Amazia eevecanîte gûtungatîra Ngai-Mûnene na njîra ya kwîyendera.

¹⁷ Nake mûnene wa athigari a mbaara kuuma mbarî cia Benjamini eetagwa Eliada. Eliada aarî mûthigari njamba na aarî na athigari a mbaara ngiri magana maîrî (200,000) arîa maarî na moota na ngo.

¹⁸ Ûrîa wamûrûmîrîrîte ûnenerî eetagwa Jehozabadi na aarî mûnene wa athigari a mbaara ngiri îgana rîmwe rîa mîrongo înana (180,000) marî na indo cia mbaara.

¹⁹ Athigari acio onthe maatungatagîra mûthamaki marî Jerusalemu, kwongerera athigari engî arîa mûthamaki aaigîte matûûrarî marîa maarî mairigîre vûrûrirî wonthe wa Juda.