2Maû 16 - ÎVUKU RÎA ÛVORO MWARO

Andû a Isiraeli na a Juda nîmaamûkanire

¹ Mwakarî wa mîrongo îthatû na îtandatû (36) Asa arî mûthamaki wa Juda, Baasha, mûthamaki wa Isiraeli nîwatharîkîre Juda. Nîwambîrîrie kwirigîra îtûûra rîa Rama nîguo arigîrîrie andû matigatonye kana mauma vûrûri wa Juda.

² Asa nîwacokire akîruta sîlûva yonthe na thaavu kuuma hekarûrî na nyombarî ya mûthamaki. Nîwainenganîre kûrî ndungata ciake na agîciîra ivirîre Benihadadi, mûthamaki wa Sîria, ûrîa watûûraga Damesiki akîmwîra atîrî,

³ “Tiga tûgwatanîre wata ûrîa aa vava maagwatanîrîte. Kîveo gîkî gîa sîlûva na thaavu nîkîo nagûtûmanîra. Rîu thiî ûthûkie ngwatanîro yenyu na Baasha, mûthamaki wa Isiraeli, nîguo atige kûntharîkîra.”

⁴ Nake mûthamaki Benihadadi nîwetîkîre ûrîa mûthamaki Asa aamwîrire, na nîwatûmire anene a athigari ake a mbaara mathiî makatharîkîre matûûra marîa manene ma Isiraeli. Nîmaavootire Ijoni, Dani, Abeli-bethi-maaka vamwe na matûûra monthe ma vûrûri wa Nafutali kûrîa kwaigagwa indo.

⁵ Rîrîa mûthamaki Baasha eegwire ûrîa gwekîkîte, nîwarûngamirie wîra wa kwirigîra îtûûra rîa Rama na agîtiganîria wîra ûcio.

⁶ Mûthamaki Asa nîwacokire akîgomania vamwe arûme onthe a Juda na nîmaathiîre Rama na magîkuua mathiga na mbaû irîa Baasha aatûmagîra gûtuma Rama. Nîmaatûmîre mathiga mau na mbaû kwirigîra îtûûra rîa Geba na Mizipa.

⁷ Kavindarî wa kau, mûrathi Hanani nîwathiîre kûrî mûthamaki Asa na akîmwîra atîrî, “Nîûndû we ûronire atî nwa wîvokire mûthamaki wa Sîria gûkîra kwîvoka Ngai-Mûnene, Ngai waku, athigari a mbaara a mûthamaki wa Sîria nîmagûtiganîria.

⁸ Andû a Ethiopia na a Lîbia maarî gîkundi kînene mûno Kîam athigari a mbaara na maarî na ikaari nyîngî mûno cia mbarathi na athigari arîa mathiîcaga matwîte mbarathi. Nwatî nîûndû wa gwîtia ûtethio kuuma kûrî Ngai-Mûnene, nîwakûvotithirie kûmavoota.

⁹ Ngai-Mûnene nîaroragia nthî yonthe waro nîguo ekîre vinya andû arîa onthe mamwîvokete. We nîwîkîte ûndû ûyû na ûrimû, kwoguo kuuma rîu kûthiî na mbere ûkethagîrwa ûkîrûa.”

¹⁰ Mûthamaki Asa nîwarakarire mûno nî ciugo cia mûrathi Hanani na nîwamûvingîrithirie njera. Kuuma vîndî îo Asa nîwambîrîrie kûvinyîrîria andû amwe.

Mûthiia wa wathani wa Asa

¹¹ Maûndû marîa mengî monthe marîa mûthamaki Asa eekire kuuma Kîammbîrîria nginya mûthiia nîmandîke îvukuurî rîa athamaki a Juda na a Isiraeli.

¹² Mwakarî wa mîrongo îthatû na kenda kuuma mûthamaki Asa ambîrîria kwathana, nîwanyitirwe nî mûrimû mûcûku mûno wa magûrû na ûgîtûma atuîka kîonje. Nwatî wana vîndî îo aarwarîte ûguo, Asa ndaaûria ûtethio kuuma kûrî Ngai-Mûnene, nwatî aacaririe ûtethio kuuma kûrî ago.

¹³ Vuvarî Asa nîwakwire vuva wa kwathana îvinda rîa mîaka mîrongo îna na ûmwe (41).

¹⁴ Nîwathikirwe mbîrîrarî îrîa ke mwene aacîte îthigarî, îtûûrarî rîa Daudi. Nîmaamwîkîrire îthandûkûrî rîa kûmûthika narîo, rîrîa rîecûrîtue mînyamû mînungi waro ya mîthemba mîîngî yarûthîtwe nî andû arîa maarî na wara wa kûmîthondeka. Nîmaacokire magîakia mwaki mûnene mûno nîûndû wa kwonania gîtîîo kûrî ke.