2Maû 15 - ÎVUKU RÎA ÛVORO MWARO

Asa nîwaretire ûgarûrûku

¹ Roho wa Ngai nîwanyûrûrûkîre Azaria mûvîcî wa Odedi.

² Nîwathiîre gûtûnga mûthamaki Asa na akîmwîra atîrî, “Asa, wana andû onthe a Juda na a Benjamini, tanthikîrîriani. Ngai-Mûnene ethagîrwa arî vamwe namue rîrîa rîonthe mûrî nake. Mûngîmûcaria mûkaamwona, nwatî mûngîmûtiganîria wanake akaamûtiganîria.

³ Aisiraeli maatûûrîte kavinda karaca matarî na Ngai ûrîa wa ma, na matarî na mûthînjîri-Ngai wa kûmathomithia na matarî na watho.

⁴ Nwatî vîndî ya thîna, nîmaagarûrûkagîra Ngai-Mûnene, Ngai wa Isiraeli. Nîmaamûcaragia na makamwona.

⁵ Vîndî îo gûtirî mûndû ûngîavotire kumagara kana gûcoka arî na thayû, nîûndû kwarî na thîna na gûtiarî na thayû mavûrûri monthe.

⁶ Kwarî na mbûkanîrîro nyîngî. Vûrûri nîwatharîkagîra vûrûri ûrîa wîngî, narîo îtûûra rîkatharîkîra îtûûra rîrîa rîngî, nîûndû Ngai nîwamareterete mathîna ma mîthemba yonthe.

⁷ Nwatî mue, îîyûmîrîrieni na mûtigakue ngoro, nîûndû nîmûkaanyita kîveo nîûndû wa wîra wenyu.”

⁸ Rîrîa mûthamaki Asa eegwire ûrathi ûrîa warirue nî Azaria mûvîcî wa Odedi, nîwagîre na ûmîrîru. Nîwarutire mîvuanano yonthe îrîa yarî vûrûrirî wa Juda na wa Benjamini na îrîa yarî matûûrarî monthe marîa aatavîte vûrûrirî ûrîa ûrî irîma wa Efiraimu na agîtuma rîngî metha ya kîgongoona ya Ngai-Mûnene îrîa yarî kîvarorî Kîam hekarû.

⁹ Mûthamaki Asa nîwagomanirie vamwe andû onthe a Juda na a Benjamini na arîa maatûûraga Juda maumîte mîvîrîgarî ya Efiraimu, Manase na Simioni. Andû acio maathiîre kûrî Asa nîûndû nîmoonire atî Ngai-Mûnene, Ngai wa Asa aarî vamwe nake.

¹⁰ Maagomanire Jerusalemu mweri wa kathatû mwaka wa îkûmi na îtano kuuma Asa aatuîka mûthamaki.

¹¹ Mûthenya ûcio nîmaarutîre Ngai-Mûnene magongoona ma ng'ombe magana mûgwanja (700) na ng'ondu ngiri mûgwanja (7,000). Indo icio nî irîa Asa na athigari ake maatavîte kuuma kûrî nthû ciao.

¹² Nîmaarûthire kîrîkanîro atî makaathîkagîra Ngai-Mûnene, Ngai wa methe mao na ngoro yonthe mwoyo wonthe.

¹³ Na mûndû wa wonthe ûkaarega kûgooca Ngai-Mûnene, Ngai wa Isiraeli, arî mwîthî kana mûkûrû, mûndûmûrûme kana mûndûmûka, nî akaaûragwa.

¹⁴ Nîmeevîtire maugîrîrîtie na rîîtwa rîa Ngai-Mûnene atî nî makaavingia kîrîkanîro. Nîmaacokire makîvuvaga tûrumbeta na coro.

¹⁵ Andû onthe a Juda nîmaakenire nîûndû wa kîrîkanîro kîu maarûthire na ngoro yonthe. Nîmaamûcarîtie na ngoro yonthe na makîmwona. Nake Ngai-Mûnene nîwatûmire magîe na thayû mîena yonthe.

¹⁶ Mûthamaki Asa nîwathengutirie ng'ina Maaka gîtîrî Kîam ûnene Kîam mûndûmûka mûthamaki, nîûndû nîwarûthîte mûvuanano wa Ashera, ngai ya mûndûmûka. Asa nîwatemire mûvuanano ûcio wa Ashera na ûkîgwa, akîunanga tûcunjî na akîûvîvîria karûnjîrî ga Kidironi.

¹⁷ Wana ethîrwa Asa ndaacûkangia kûndû kuonthe kûrîa kwagoocagîrwa ngai cia mîvuanano vûrûrirî wa Isiraeli, ke aarî mwîvokeku kûrî Ngai-Mûnene ûtûûrorî wake wonthe.

¹⁸ Nîwaretire hekarûrî indo cionthe irîa ciamûrîrîtwe Ngai nî îthe Abija, wa vamwe na thaavu na indo cia sîlûva îrîa ke mwene aamûrîrîte Ngai.

¹⁹ Gûtiethîrwa na mbaara rîngî nginya mwakarî wa mîrongo îthatû na îtano (35) ya wathani wa Asa.