2Maû 14 - ÎVUKU RÎA ÛVORO MWARO

Mûthamaki Asa nîwavootire andû a Ethiopia

¹ Mûthamaki Abija nîwakwire na akîthikwa mbîrîrarî irîa ciathikagwa athamaki îtûûrarî rîa Daudi. Nake Asa mûvîcî wa Abija nîwatuîkire mûthamaki vuva wake. Vîndî ya wathani wake, vûrûri wa Juda nîwekarire îvinda rîa mîaka îkûmi (10) ûrî na thayû.

² Mûthamaki Asa nîwakenirie Ngai-Mûnene, Ngai wake na njîra ya gwîka maûndû marîa maro na magîrîru.

³ Nîwarutire metha cia kîgongoona irîa ciarî ng'eni kûu vûrûrirî na kûndû kûrîa gûtûgîru kwagoocagîrwa ngai cia mîvuanano. Nîwaunangire itugî cia mathiga na akiunanga mîvuanano ya Ashera, ngai ya mûndûmûka.

⁴ Mûthamaki Asa nîwathire andû a Juda mekage wendi wa Ngai-Mûnene, Ngai wa methe mao na maathîkagîre mawatho na maathani make.

⁵ Nîwacûkangirie kûndû kûrîa kwagoocagîrwa ngai cia mîvuanano na akîomomora metha cia magongoona cia kûvîvîria ûbani kuuma matûûrarî monthe ma Juda. Kwoguo kwarî na thayû vûrûri wa Juda vîndî ya ûthamaki wa Asa.

⁶ Mûthamaki Asa nîwatumire matûûra mairigîre kûu Juda kavindarî kau kwarî na thayû. Vûrûri wake nîwekarire îvinda rîa mîaka mîîngî gûtarî na mbaara, nîûndû Ngai-Mûnene nîwamûvete thayû.

⁷ Mûthamaki Asa nîwerire andû a Juda atîrî, “Nîtûtume matûûra na tûmairigîre na nthingo, nyomba ndaca na îgûrû, na ivingo irî na mîkîgo ya kûvinga. Vûrûri ûyû nî wetû, nîûndû nîtwîkîte ûrîa Ngai-Mûnene, Ngai wetû endaga. Nîtwamwathîkîre na nîatûgitîrîte na mîena yonthe.” Kwoguo nîmaatumire matûûra na makîgîa na ûthiî wa na mbere.

⁸ Asa aarî na athigari a mbaara ngiri magana mathatû (300,000) kuuma mûvîrîgarî wa Juda maarî na ngo nene na matumû, na engî ngiri magana maîrî ma mîrongo înana (280,000) kuuma mûvîrîgarî wa Benjamini na maarî na ngo na moota. Onthe maarî athigari maarî na vinya na njamba.

⁹ Zera wa kuuma Ethiopia nîwathiîre kûrûa na Asa arî na athigari milioni îmwe (1,000,000) na ikaari magana mathatû (300) cia mbarathi. Aathiîre nginya agîkinya îtûûrarî rîa Maresha.

¹⁰ Asa nîwathiîre nîguo makarûe na Zera. Nao oîrî nîmaavangire athigari ao mang'ethanîrîte Kîamndarî Kîam Zefatha vakuvî na Maresha.

¹¹ Asa nîwavoire Ngai-Mûnene, Ngai wake akiuga atîrî, “Ngai-Mûnene gûtirî wîngî wîkariî tawe ûngîvota gûtethia andû arîa matarî vinya makîrûa na arîa marî vinya. Ûûi, Ngai-Mûnene, Ngai wetû, tûtethie nîûndû nîwe twîvokete. Tûkîte kûrûa na athigari aya eengî ûguo rîîtwarî rîaku. Ngai-Mûnene, we wî Ngai wetû. Ndûgetîkîre mûndû akûvoote.”

¹² Kwoguo Ngai-Mûnene nîwavootire athigari a mbaara a Ethiopia rîrîa Asa na athigari a mbaara a Juda maamatharîkîre. Athigari a Ethiopia nîmaaûrire,

¹³ nake Asa na athigari ake makîmarûmîrîria nginya Gerari. Athigari a mbaara a Ethiopia nîmaaûragirwe eengî mûno na gûtirî wanarî ûmwe watigarire. Athigari a mbaara a Ethiopia nîmaavootirwe nî Ngai-Mûnene na athigari ake, na athigari a Juda nîmaatavire indo nyîngî mûno.

¹⁴ Nîmaacokire magîcûkangia matûûra monthe marîa maathiûrûrûkîrîtie Gerari nîûndû andû a kuo nîmaagîte na guoya nîûndû wa Ngai-Mûnene. Nîmaatavire indo nyîngî mûno kuuma matûûrarî mau na makîthiî nacio.

¹⁵ Nîmaathiîre na makîtharîkîra kûrîa arîthi maambîte magema mao na magîkuua ng'ondu na ngamîîra nyîngî. Vuva wa ûguo nîmaacokire Jerusalemu.