2Maû 13 - ÎVUKU RÎA ÛVORO MWARO

Mbaara ya Abija na Rehoboamu

¹ Mwakarî wa îkûmi na înana (18) kuuma mûthamaki Jeroboamu ambîrîria kwathana, Abija nîwatuîkire mûthamaki wa Juda

² na nîwathanire îvinda rîa mîaka îthatû (3) arî Jerusalemu. Ng'ina wa Abija eetagwa Mikaia mwarî wa Urieli kuuma îtûûrarî rîa Gibea. Nîkwagîre na mbaara gatagatî ka Abija na Jeroboamu.

³ Abija nîwathiîre mbaararî arî na athigari njamba a mbaara ngiri magana mana (400,000), nake Jeroboamu nîwathiîre kûrûa na Abija arî na athigari njamba a mbaara ngiri magana manana (800,000).

⁴ Abija nîwarûngamire kîrîmarî Kîam Zemaraimu îgûrû vûrûrirî ûrîa ûrî irîma wa Efiraimu na akiuga atîrî, “Mue, Jeroboamu na andû onthe a Isiraeli tanthikîrîriani!

⁵ Nîkwa mûtaicî atî, Ngai-Mûnene, Ngai wa Isiraeli nîwarûthire kîrîkanîro gîtangiunwa na Daudi atî, athamaki onthe a Isiraeli nîmatûûra maumaga njiarwarî ciake tene na tene?

⁶ Nwatî kûnarî ûguo, Jeroboamu mûvîcî wa Nebati, ûrîa warî ndungata ya Solomoni mûvîcî wa Daudi nîwareganire na mwathi wake.

⁷ Vuvarî nîwagomanirie varî ke andû aganu na mataarî kîene na makîringîrîria Rehoboamu mûvîcî wa Solomoni eke ûrîa meendaga rîrîa Rehoboamu aarî mûndû mwîthî na atangîavotire kûmetirîria.

⁸ Rîu mûvangîte kûregana na ûthamaki ûrîa Ngai-Mûnene avete Daudi na njiarwa ciake nîûndû mûrî gîkundi kînene Kîam athigari na mûrî na mîvuanano ya njaû cia thaavu îrîa Jeroboamu aarûthire îtuîke ngai cienyu.

⁹ Kinthî mûtiengatire athînjîri-Ngai a Ngai-Mûnene, njiarwa cia Aroni na Alawi na mûkîîthuurîra athînjîri-ngai enyu ta andû a mavûrûri marîa mengî? Mûndû wa wonthe ûngîûka kwîyamûra arî na ndegwa îtarî ngûrû kana ndûrûme mûgwanja nîatuîkaga mûthînjîri-Ngai wa indo icio mwîtaga ngai cienyu.

¹⁰ “Nwatî tue, Ngai-Mûnene nî Ngai wetû na tûtimûtiganîrîtie. Tûrî na athînjîri-Ngai arîa matungataga Ngai-Mûnene na nîo njiarwa cia Aroni na nîmatethagua nî Alawi.

¹¹ Nîmarutagîra Ngai-Mûnene matega ma kûvîvua na ma ûbani ûrîa mûnungi waro vîndî cionthe kîraûko na kîvwaî. Nîmarutaga matega ma mîgate îrîa mîamûre na nîmamigagîrîra metharî îrîa ntheru, na nîmaakagia taa irîa irî vandû va thaavu varîa cigagîrîrwa kîvwaî wa kîvwaî. Twîkaga ûrîa Ngai-Mûnene, Ngai wetû athanîte, nwatî mue nî mûmûtiganîrîtie.

¹² Ngai arî natue arî mûtongoria wetû, nao athînjîri-Ngai marî na tûrumbeta nîguo matûvuve magîtwîta tûke tûrûe namue. Mue andû a Isiraeli, mûtikarûe na Ngai-Mûnene, Ngai wa methe menyu, nîûndû mûtîngîvootana!”

¹³ Vîndî îo Jeroboamu nîwatûmîte athigari amwe ake makatharîkîre athigari a Juda na mwena wa vuva, nao athigari acio engî ake marî mwena wa mbere.

¹⁴ Rîrîa athigari a Juda maaroririe na makîona atî nîmaratharîkîrwa na mwena wa mbere na wa vuva, nîmaarîrîre Ngai-Mûnene amatethie, nao athînjîri-Ngai makîvuva tûrumbeta.

¹⁵ Athigari a Juda nîmaacokire makiugîrîria na mûgambo wa mbaara. Nao nîmaatharîkîre na Ngai agîtûma Jeroboamu na athigari a Isiraeli mavootwe nî Abija na athigari a Juda.

¹⁶ Athigari a Isiraeli nîmaaûrire nî athigari a Juda, nake Ngai nîwatûmire mavootwa nî athigari a Juda.

¹⁷ Abija na athigari ake nîmaatharîkîre na makîûraga athigari eengî mûno a Isiraeli. Athigari arîa njamba a mbaara ngiri magana matano (500,000) a Isiraeli nîmaaûragirwe.

¹⁸ Kwoguo kavinda kau athigari a Isiraeli nîmaavootirwe. Nao athigari a Juda maavootanire nîûndû nîmeevokire Ngai-Mûnene, Ngai wa methe mao.

¹⁹ Abija nîwarûmîrîrie athigari a mbaara a Jeroboamu na nîwatavire matûûra ma Betheli, Jeshana na Efironi vamwe na icagi irîa ciarî vakuvî na matûûra mau.

²⁰ Jeroboamu ndaacoka kûgîa na vinya rîngî îvindarî rîa wathani wa Abija. Mûthiiarî Ngai-Mûnene nîwatûmire Jeroboamu akue.

²¹ Nwatî Abija nîwathiîre na mbere kûgîa na vinya. Nîwavikirie aka îkûmi na ana (14) na nîwagîre na anake mîrongo îîrî na aîrî (22) na erîtu îkûmi na atandatû (16).

²² Maûndû marîa mengî monthe marîa meekirwe nî Abija arî mûthamaki, mîthiîre yake na ûrîa aaragia nîmandîke rûganorî rwa mûrathi Ido.