2Maû 12 - ÎVUKU RÎA ÛVORO MWARO

Shishaki nîwatharîkîre Jerusalemu

¹ Rehoboamu arîkia kwîvanda waro na ûthamaki wake ûkîgîa na vinya, ke vamwe na andû onthe a Isiraeli arîa aarî nao nîmaatiganîrie watho wa Ngai-Mûnene.

² Mwakarî wa gatano kuuma Rehoboamu atuîka mûthamaki, Shishaki mûthamaki wa Misiri nîwatharîkîre Jerusalemu nîûndû Rehoboamu na andû ake matiarî evokeku.

³ Shishaki aatharîkîre Jerusalemu arî na ikaari cia mbarathi ngiri îmwe na magana maîrî (1,200), athigari ngiri mîrongo îtandatû (60,000) arîa mathiîcaga matwîte mbarathi na athigari eengî mûno matangîatarîkire kuuma Lîbia, Suki, na Ethiopia.

⁴ Nîwanyitire matûûra monthe marîa maarî mairigîre ma vûrûri wa Juda na makîthiî nginya Jerusalemu.

⁵ Mûrathi Shemaia nîwathiîre kûrî mûthamaki Rehoboamu na atongoria a Juda arîa maagomanîte Jerusalemu nîguo maûre kuuma kûrî Shishaki na akîmera atîrî, “Ngai-Mûnene augîte atî ‘Nîmûndiganîrîtie, kwoguo nanie nînîmûtiganîrîtie njararî cia Shishaki.’ ”

⁶ Atongoria a Isiraeli vamwe na mûthamaki nîmeenyivirie na magîtîkîra atî nîmevîtie na nî maaugire atîrî, “Ngai-Mûnene ekîte ûrîa kwagîrîrîte.”

⁷ Rîrîa Ngai-Mûnene oonire atî nî meenyivîtie, nîwaririe na mûrathi Shemaia rîngî na akîmwîra atîrî, “Nîûndû andû acio nîmetîkîrîte mevia mao, tînîmacûkangia, nwatî nî ngûmavonokia. Shishaki tîaverithia Jerusalemu nîûndû wa marakara makwa.

⁸ Nwatî nîmagaatuîka ndungata ciake nîguo mamenye ngûrani ya kûndungatîra na gûtungatîra athamaki a gûkû nthî.”

⁹ Rîrîa Shishaki, mûthamaki wa Misiri aatharîkîre Jerusalemu, nîwakuuire mûthithû wa hekarû na wa nyomba ya mûthamaki. Nîwakuuire indo cionthe wa vamwe na ngo cia thaavu irîa ciarûthîtwe nî mûthamaki Solomoni.

¹⁰ Mûthamaki Rehoboamu nîwarûthire ngo ciîngî cia gîcango nîguo icoke vandûrî va icio ciakuuirwe na nîwainenganîre kûrî arangîri a ivingo cia mûciî kwa mûthamaki nîguo maimenyagîrîre.

¹¹ Vîndî cionthe mûthamaki akîthiî hekarûrî, arangîri nîmaathiîcaga makuuîte ngo icio cia gîcango na vuvarî nîmaaicokagia nyombarî ya arangîri.

¹² Nîûndû wa Rehoboamu kwînyivia, Ngai-Mûnene ndaamûcûkangia viû na vûrûrirî wa Juda gûtiarî na thîna.

Ûthamaki wa Rehoboamu na njîra nguvî

¹³ Rehoboamu nîwatuîkire mûthamaki wekindîrîtie Jerusalemu. Aatuîkire mûthamaki arî na ûkûrû wa mîaka mîrongo îna na ûmwe (41). Aathamakire îvinda rîa mîaka îkûmi na mûgwanja (17) arî Jerusalemu, îtûûra rîrîa Ngai-Mûnene aathuurîte gatagatîrî ka mîvîrîga yonthe vûrûrirî wa Isiraeli nîguo agoocagîrwe kuo. Ng'ina wa Rehoboamu eetagwa Naama wa kuuma vûrûrirî wa Aamoni.

¹⁴ Rehoboamu nîwekire maûndû maarî macûku nîûndû ndaacaragia wendi wa Ngai-Mûnene na ngoro yake.

¹⁵ Maûndû ma Rehoboamu marîa eekire kuuma Kîammbîrîria nginya mûthiia nîmandîke îvukuurî rîa maûndû ma tene ma mûrathi Shemaia na ma mwoni Ido. Rehoboamu na Jeroboamu maatûûraga marûaga o ene.

¹⁶ Rehoboamu nîwakwire na akîthikwa mbîrîrarî irîa ciathikagwa athamaki îtûûrarî rîa Daudi. Nake mûvîcî Abija nîwatuîkire mûthamaki vuva wake.