2Maû 11 - ÎVUKU RÎA ÛVORO MWARO

Ûrathi wa Shemaia

¹ Rîrîa mûthamaki Rehoboamu aakinyire Jerusalemu, nîwagomanirie athigari ngiri îgana rîa mîrongo înana (180,000) arîa aro kuuma mûvîrîgarî wa Juda na wa Benjamini. Endeete kûthiî kûrûa na andû a Isiraeli nîguo amacokie wathanirî wake.

² Nwatî Ngai-Mûnene nîwerire mûrathi Shemaia, mûndû wa Ngai

³ athiî akeere Rehoboamu mûvîcî wa Solomoni mûthamaki wa Juda, na andû onthe a mûvîrîga wa Juda na Benjamini atîrî,

⁴ “Ndûkatharîkîre andû enyu, Aisiraeli. Cokani muonthe kwenyu mîciî, nîûndû ûndû ûcio wîkîkîte umanîte nanie.” Kwoguo nîmegwire watho wa Ngai-Mûnene, magîcoka mîciî na matiathiî kûrûa na Jeroboamu.

Rehoboamu nîwairigîre matûûra ma Juda

⁵ Rehoboamu aatûûraga Jerusalemu na nîwatumire matûûra marî na nthingo nene nîûndû wa kûgitîra matûûra ma Juda.

⁶ Aatumire matûûra ma: Bethilehemu, Etamu, Tekoa,

⁷ Bethizuri, Soko, Adulamu,

⁸ Gathu, Maresha, Zifu,

⁹ Adoraimu, Lakishi, Azeka,

¹⁰ Zora, Aijaloni, na Heburoni. Matûûra mama maarî vûrûrirî wa Juda na wa Benjamini.

¹¹ Nîwamairigîre na vinya na wa îtûûrarî, nîwaigire mûnene wa athigari a mbaara, nîwatumire nyomba ya kwigagwa irio, maguta ma ndamaiyû, na ndivei.

¹² Nîwaigire ngo na matumû matûûrarî monthe na agîtûma matûûra mau magîe na vinya mûno. Kwoguo Juda na Benjamini ciarî rungu rwa wathani wake.

Athînjîri-Ngai na Alawi nîmaathiîre Juda

¹³ Athînjîri-Ngai na Alawi kuuma vûrûrirî wonthe wa Isiraeli nîmaaumire kûrîa maatûûraga na makîthiî kûrî Rehoboamu.

¹⁴ Alawi nîmaatiganîrie kûndû kwao gwa kûrîthua na kûrîa maatûûraga na makîthiî Juda na Jerusalemu, nîûndû Jeroboamu na avîcî ake nîmaamagirîtie matungata marî athînjîri-Ngai a Ngai-Mûnene.

¹⁵ Jeroboamu nîwathuurire athînjîri-Ngai ake a gûtungata kûndû kûrîa gûtûgîru kwagoocagîrwa ngai ciake cia mîvuanano ya mbûri na njaû irîa aarûthîte.

¹⁶ Andû onthe vûrûrirî wa Isiraeli arîa maatuîte atî nîmakwenda kûgooca Ngai-Mûnene, Ngai wa Isiraeli nîmaarûmanîrîre na Alawi na makîthiî Jerusalemu nîguo makarute magongoona kûrî Ngai-Mûnene, Ngai wa methe mao.

¹⁷ Andû acio nîmaatûmire ûthamaki wa Juda ûgîe na vinya na nîmaatirîrîre Rehoboamu mûvîcî wa Solomoni îvinda rîa mîaka îthatû. Kavindarî kau nîmaatûûrire ta ûrîa maatûûraga vîndî ya wathani wa mûthamaki Daudi na mûthamaki Solomoni.

Andû a Mûciî wa Rehoboamu

¹⁸ Rehoboamu nîwavikirie Mahalathi, mwarî wa Jerimothi na mûka Abihaili. Jerimothi aarî mûvîcî wa Daudi, nake Abihaili aarî mwarî wa Eliabu mûvîcî wa Jesii.

¹⁹ Rehoboamu nîwagîre na anake athatû: Jeushi, Shemaria na Zahamu.

²⁰ Nîwacokire akîvikia Maaka mwarî wa Abusalomu. Nîmagîre na anake ana: Abija, Atai, Ziza na Shelomithi.

²¹ Rehoboamu nîwendeete mûka Maaka mwarî wa Abusalomu mûno gûkîra aka ake acio engî vamwe na arîa aaigîte. Aka onthe a Rehoboamu maarî îkûmi na anana (18) na aka mîrongo îtandatû (60) a kwiga. Aarî na anake mîrongo îîrî na anana (28) na erîtu mîrongo îtandatû (60).

²² Rehoboamu nîwathuurire Abija, mûvîcî ûrîa maagîte na mûka Maaka atuîke mûtongoria wa aa mûrwang'ina acio engî. Aamûthuurire nîûndû nîwavangîte kûmûtua mûthamaki.

²³ Rehoboamu nîwatûmîre ûûgî kûva anake ake mawîra. Nîwatûmire amwe icunjîrî cia vûrûri wa Juda na wa Benjamini matûûrarî marîa maarî mairigîre. Nîwamaveecaga indo cia kwîgana na nîwamacarîrîtie aka eengî a kûvikia.