2Maû 10 - ÎVUKU RÎA ÛVORO MWARO

Andû a Isiraeli nîmaareganire na Rehoboamu

¹ Rehoboamu nîwathiîre Shekemu, nîûndû Aisiraeli onthe nîmaagomanîte kuo nîguo mamûtue mûthamaki.

² Rîrîa Jeroboamu, mûvîcî wa Nebati eegwire ûvoro ûcio, nîwacokire mûciî. Vîndî îo Jeroboamu aarî Misiri kûrîa aathiîte akîûra nî mûthamaki Solomoni.

³ Andû a Isiraeli nîmaatûmanîre Jeroboamu athiî. Nao onthe nîmaathiîre kûrî Rehoboamu na makîmwîra atîrî,

⁴ “Aguo nîwatwigîrîrîte mûrigo mûrito. Kwoguo rîu ethîrwa nîûgûtûvûthîria wîra ûcio twarutithagua nî aguo na ûtûnyivanyivîrie gooti, tûgaagûtungatagîra.”

⁵ Nake Rehoboamu nîwamacokerie atîrî, “Mvani mîthenya îthatû nîguo ngecirie ûvoro ûcio na mûgaacoka mûke yathira.” Kwoguo andû nîmaathiîre.

⁶ Mûthamaki Rehoboamu nîwathiîre kûria kîrîra kûrî athuuri arîa maataaraga îthe Solomoni rîrîa aarî mwoyo na akîmaûria atîrî, “Nîmûndaara ngacokerie andû aya atîa?”

⁷ Nao nîmaamûcokerie atîrî, “Ûngîguîra andû aya ntha, ûmakenie na ûmarîrie waro, nîmatûûra marî ndungata ciaku tene na tene.”

⁸ Nwatî Rehoboamu nîwaregire mataaro ma athuuri acio. Vandû va ûguo nîwathiîre kûria ûtaaro kûrî anake a riika rîake arîa maamûtaaraga.

⁹ Nake nîwamaûririe atîrî, “Nîmûndaara tûgacokerie andû aya atîa, arîa marambîra atî nîmavûthavûthîrie mûrigo ûrîa vava aamaigîrîrîte?”

¹⁰ Nao anake acio a riika rîake nîmaamûcokerie atîrî, “Îra andû acio marakwîraga ûmavûthavûthîrie mûrigo atî, ‘Kara gakwa ka mwiraira nî kariku gûkîra kîûnû Kîam aguo.

¹¹ Vava aamwigîrîrîte mûrigo mûrito, nie ngaamwigîrîra îngî mûrito makîria. Vava aamûrivaga na mûragi, nie ngaamûrivaga na kîvoko Kîam munyi.’ ”

¹² Mîthenya îthatû yathira Jeroboamu na andû onthe nîmaacokire kûrî Rehoboamu wata ûrîa mûthamaki aamerîte.

¹³ Mûthamaki nîwaregire ûtaaro wa athuuri na agîcokeria andû acio na marakara,

¹⁴ wata ûrîa anake a riika rîake maamûtaarîte na akîmera atîrî, “Vava aamwigîrîrîte mîrigo mîrito, nie ngaamwigîrîra îngî mîrito makîria. Vava aamûrivaga na mûragi, nie ngaamûrivaga na kîvoko Kîam munyi!”

¹⁵ Kwoguo mûthamaki ndaathikîrîria wendi wa andû. Ngai-Mûnene, Ngai nîke watûmire gwîkîke ûguo nîguo ciugo irîa ciarirue kûrî Jeroboamu mûvîcî wa Nebati kûvîtûkîra kûrî mûrathi Ahija wa kuuma Shilo ivinge.

¹⁶ Rîrîa andû onthe a Isiraeli moonire atî mûthamaki ndaramathikîrîria, nîmaaugîrîrie atîrî, “Nî îgai rîrîkû tûrî narîo kuuma kûrî Daudi? Tûtirî na îgai kuuma kûrî mûvîcî wa Jesii. Andû a Isiraeli, twînûkeni! Daudi gitîra nyomba yaku we mwene!” Kwoguo andû onthe nîmaathiîre magemarî mao,

¹⁷ na magîtiga Rehoboamu arî mûthamaki wa andû a Isiraeli arîa maatûûraga matûûrarî ma Juda.

¹⁸ Mûthamaki Rehoboamu nîwacokire agîtûma Hadoramu kûrî andû a Isiraeli. Nao maamwona nîmaamûragire na mathiga. Hadoramu nîke warûngamagîrîra andû arîa maarutaga wîra na vinya. Mûthamaki Rehoboamu ona ûguo nîwatûîre gîkaarirî gîake Kîam mbarathi na akîûra akîthiî Jerusalemu.

¹⁹ Kwoguo andû a Isiraeli matwîre mareganaga na wathani wa mbarî ya Daudi nginya ûmûnthî.