2Maû 1 - ÎVUKU RÎA ÛVORO MWARO

Mûthamaki Solomoni nîwavoire avewe ûûgî

¹ Solomoni, mûvîcî wa mûthamaki Daudi nî watuîkire mûthamaki wîkindîrîtie ûthamakirî wake. Nake Ngai-Mûnene, Ngai wake nî wamûrathimire na agîtûma agîa na vinya mûno.

² Mûthamaki Solomoni nîwetire anene onthe a athigari arîa maarûngamagîrîra athigari ngiri îmwe, magana, na anene, atongoria onthe a Isiraeli na atongoria a mbarî cionthe cia mîvîrîga ya Isiraeli.

³ Nîwamerire mathiî marî vamwe nake Gibeoni varîa vaagoocagîrwa. Maathiîre kuo nîûndû nîkuo îgema rîa gûcemanîrua rîa Ngai rîarî. Îgema rîu nî rîrîa Musa, ndungata ya Ngai-Mûnene aatumîte arî werûrî.

⁴ (Kûnarî ûguo, îthandûkû rîa kîrîkanîro rîarî Jerusalemu rigîtwe îgemarî rîrîa mûthamaki Daudi aatumîte vîndî îrîa aarîretire kuuma Kiriathi-jearimu.)

⁵ Metha ya kîgongoona ya gîcango îrîa yatumirwe nî Bezaleli mûvîcî wa Uri wanayo yarî Gibeoni îrî mbere ya îgema rîa Ngai-Mûnene. Uri, îthe wa Bezaleli aarî mûvîcî wa Huri. Kwoguo mûthamaki Solomoni na andû onthe arîa maagomanîte nî maagoocire Ngai-Mûnene marî kûu.

⁶ Solomoni nîwathiîre mbere ya îgema rîa Ngai-Mûnene varîa metha ya kîgongoona ya gîcango yarî na nîwarutîre Ngai-Mûnene matega ma kûvîvua ma ndegwa ngiri îmwe metharî îo.

⁷ Ûtukû wa mûthenya ûcio Ngai nîwaumîrîre Solomoni na akîmûria atîrî, “Nîndûî ûngîenda ngûve?”

⁸ Nake Solomoni nîwacokerie Ngai atîrî, “Nîûronagia vava Daudi wendo ûtathiraga, na nî ûrandwire mûthamaki vuva wake.

⁹ Ngai-Mûnene, Ngai, tûma ûrîa werîre vava Daudi ûvinge. Nî ûrandwire mûthamaki wa andû eengî mûno ta rûkûngû rwa nthî.

¹⁰ Kwoguo mva ûûgî na ûmenyo nîguo mvotaga gûtongoria andû aya na njîra îrîa yagîrîrîte, nîûndû gûtirî mûndû ûngîtongoria andû aya engî ûguo atarî na ûtethio waku.”

¹¹ Nake Ngai nîwacokerie Solomoni atîrî, “Nîwathuura ûndû ûrîa wagîrîrîte, nîûndû ndûnetie indo, ûtonga, gîtîîo, mîoyo ya nthû ciaku, kana ûria gûtûûra mîaka mîîngî nwatî, wetia ûûgî na ûmenyo nîguo ûvotage kwatha andû arîa nîragûtwire mûthamaki wao.

¹² Kwoguo nînakûva ûûgî na ûmenyo. Na nîngûkûva indo, ûtonga, na gîtîîo gûkîra mûthamaki wa wonthe wa arîa maarî mbere yaku kana arîa magaaûka vuva waku.”

Ûvoti na ûtonga wa mûthamaki Solomoni

¹³ Kwoguo Solomoni nîwaumire Gibeoni kûrîa maathiîte kûgooca Ngai-Mûnene îgemarî rîa gûcemanîrua na agîcoka Jerusalemu. Nîwathire vûrûri wa Isiraeli arî kûu.

¹⁴ Solomoni nîwagîre na ikaari ngiri îmwe na magana mana (1,400) cia mbarathi na athigari ngiri îkûmi na igîrî (12,000) arîa maathiîcaga matwîte mbarathi. Nîwamaigire matûûrarî manene marîa maaigagwa ikaari icio na ciîngî agîciga îtûûrarî rîa Jerusalemu.

¹⁵ Mûthamaki Solomoni nîwatûmire sîlûva na thaavu ciîngîva Jerusalemu ta mathiga, nayo mîtî ya mîtarakwe yengîvîte ta mîkûyû îrîa îrî Shefela.

¹⁶ Solomoni aagîraga mbarathi ciake kuuma Misiri na Kilikia.

¹⁷ Andû a mûthamaki arîa maagûraga na makendia ikaari maaigûraga kuuma Misiri, na thogora wa gîkaari kîmwe warî sîlûva magana matandatû (600), naguo thogora wa mbarathi îmwe warî sîlûva îgana rîa mîrongo îtano (150). Nao nîmaaciendagia kûrî athamaki onthe a Ahiti na a Sîria.