2Atha 9 - ÎVUKU RÎA ÛVORO MWARO

Jehu nîwetîrîrue maguta atuîke mûthamaki wa Isiraeli

¹ Mûrathi Elisha nîwacokire agîta ûmwe wa gîkundi Kîam arathi na akîmwîra atîrî, “Îîvarîrie na woce mûcuva ûyû wa maguta na ûthiî Ramothu kûu Gileadi.

² Wakinya kuo, ûgaacaria Jehu, mûvîcî wa Jehoshafati. Jehoshafati aarî mûvîcî wa Nimushi. Wamwona ûmûrute kûrî arata ake na mûthiî nake kanyombarî ka ndaarî.

³ Ûcoke woce mûcuva ûyû wa maguta na ûmwîtîrie mo kîongorî gîake, na ûmwîre Ngai-Mûnene arauga atî, nîwagwîtîrîria maguta ûtuîke mûthamaki wa Isiraeli: Ûcoke ume kuo na ûûre na îvenya wata ûrîa ûngîvota.”

⁴ Kwoguo mûrathi ûcio mwîthî nîwathiîre Ramothu kûu Gileadi,

⁵ na akîthîra anene a athigari macemanîtie. Nîwaugire atîrî, “Mûnene, nîrî na ndûmîrîri yaku.” Nake Jehu nîwamûririe atîrî, “Gatagatîrî getû tuonthe-î, ûrarîria ûrîkû?” Nake mûrathi nîwamûcokerie atîrî, “Nîwe mûnene nîrarîria.”

⁶ Andû acio oîrî nîmaacokire magîtonya nyomba, na mûrathi ûcio agîtîrîria Jehu maguta kîongorî gîake na akîmwîra atîrî, “Ngai-Mûnene Ngai wa Isiraeli arauga atî, ‘Nagwîtîrîria maguta ûtuîke mûthamaki wa andû akwa a Isiraeli.

⁷ Nîûkaûraga andû a nyomba ya mwathi waku, Ahabu nîguo nîîrîvîrîrie nthakame îrîa Jezebeli eetûrûrire ya arathi ndungata ciakwa, vamwe na ya ndungata irîa ciîngî ciakwa cionthe.

⁸ Andû onthe a nyomba ya Ahabu nwanginya magaakua; na nîngaaûraga arûme onthe a nyomba yake, arîa ngombo na arîa matarî ngombo.

⁹ Ngeka andû a nyomba ya Ahabu ta ûrîa nekire andû a nyomba ya mûthamaki Jeroboamu, mûvîcî wa Nefati, na andû a nyomba ya mûthamaki Baasha, mûvîcî wa Ahija.

¹⁰ Jezebeli ndakaathikwa; kimba gîake gîkaarîrwa vûrûrirî wa Jezireeli nî ngui.’ ” Rîrîa mûrathi aarîkîrîrie kuga ûguo, nîwarugûrire mûrango akiuma nyomba na akîûra na îvenya.

¹¹ Rîrîa Jehu aacokire kûrî anene acio engî, anene acio nîmaamûririe atîrî, “Maûndû monthe nî maro? Mûndû ûcio wa ngoma araûkîte kûrî we nîkî?” Nake Jehu nîwamacokerie atîrî, “Mue nîmwîcî mûndû ûcio na nîmwîcî ûrîa aragia.”

¹² Nao nîmaacokirie atîrî, “Naarî tûtiîcî! Twîre ûrîa akwîra!” Nake Jehu nîwamerire mûrathi ûcio ambîra atîrî, “Ngai-Mûnene augîte, ‘Nagwîtîrîria maguta ûtuîke mûthamaki wa Isiraeli.’ ”

¹³ Wa rîmwe anene acio nîmaarutire nguo ciao na magîciara nthî nîguo Jehu akinye îgûrû rîacio. Nîmaacokire makîvuva tûrumbeta na makiugîrîria atîrî, “Jehu nîke Mûthamaki!”

Joramu, mûthamaki wa Isiraeli nîwaûragirwe

¹⁴ Jehu nîwacokire akîvanga ûrîa akûragithia mûthamaki Joramu. (Vîndî îo, Joramu vamwe na anene acio engî onthe maarangîrîte îtûûra rîa Ramothu kûu Gileadi nîûndû wa Hazaeli, mûthamaki wa Sîria;

¹⁵ nwatî mûthamaki Joramu nîwacokete Jezireeli nîguo akavorere ironda kuo irîa aativîrîtue mbaararî kûu Ramothu rîrîa maarûaga na Hazaeli, mûthamaki wa Sîria.) Kwoguo Jehu nîwerire anene acio engî atîrî, “Ethîrwa nîmwetîkania nanie, mûtikareke wanarî mûndû ûmwe auma gûkû Ramothu athiî kwîra andû a Jezireeli ûvoro ûcio.”

¹⁶ Jehu nîwacokire agîtwa gîkaari gîake na akîthiî Jezireeli kûrîa Joramu aanogokete, nake Ahazia mûthamaki wa Juda nîwathiîte kuo kûmûcerera.

¹⁷ Rîrîa mûrangîri wa îtûûra aarûngamîte îgûrû rîa nyomba ndaca na îgûrû kûu Jezireeli, nîwonire Jehu na gîkundi Kîam andû ake maûkîte na akiuga atîrî, “Nînîrona andû maûkîte!” Nake Joramu nîwaugire atîrî, “Tûma mûndû ûmwe ûrîa ûthiîcaga atûîte mbarathi athiî agatuîrie amenye kana maûkîte na thayû.”

¹⁸ Kwoguo mûndû ûmwe nîwatûîre mbarathi na akîthiî gûtûnga Jehu na akîmûria atîrî, “Mûthamaki nîarenda kûmenya kana ûkîte na thayû.” Nake Jehu nîwamûcokerie atîrî, “Ûcio tî wîra waku. Coka vuva wakwa na ûnûmîrîre!” Mûrangîri wa îtûûra nîwaugire atîrî, “Mûnjaama nîwakinya kûrî o, nwatî ndaracoka.”

¹⁹ Joramu nîwatûmire mûnjaama wa kaîrî athiî kûrî Jehu na gîkundi Kîam andû ake na akîmûria atîrî, “Mûthamaki arenda kûmenya kana ûkîte na thayû.” Nake Jehu nîwamûcokerie atîrî, “Ûcio tî wîra waku. Coka vuva wakwa na ûnûmîrîre.”

²⁰ Mûrangîri wa îtûûra nîwaugire rîngî atîrî, “Mûnjaama nîwakinya kûrî o, nwatî ndaracoka. Nake mûtongoria wa gîkundi agîtwarithîtie na îvenya ta ûrîa Jehu, mûvîcî wa Nimushi atwarithagia.”

²¹ Joramu, mûthamaki wa Isiraeli nîwaugire atîrî, “Mvarîrîriai gîkaari gîakwa.” Nakîo nîkîavarîrîrue. Joramu na Ahazia, mûthamaki wa Juda nîmaatwîre wa mûndû gîkaarirî gîake na makîthiî gûtûnga Jehu. Nîmaacemanirie nake mûgûndarî ûrîa warî wa Nabothi, Mûjezireeli.

²² Rîrîa Joramu oonire Jehu, nîwamûririe atîrî, “Ûkîte na thayû?” Nake Jehu nîwamûcokerie atîrî “Kûngîthîrwa kwî na thayû atîa rîrîa ûragûri na ûvoi wa ngai cia mîvuanano irîa ciaretirwe nî nyûkwe, Jezebeli ciîngîvîte ûguo?”

²³ Joramu nîwacokire akîgarûra gîkaari gîake, akîûra na akîra Ahazia atîrî, “Kûu nî kûgarûra thirikari!”

²⁴ Jehu nîwagucirie ûta na vinya wake wonthe na akîratha Joramu na mûguî gatagatîrî ga ituro ciake na ûkîmunda ngoro na Jehu nîwagwîre agîkua arî kûu gîkaarirî gîake.

²⁵ Jehu nîwerire Bidikari mûrangîri wake atîrî, “Oca kimba gîake ûthiî ûgikie mûgûndarî wa Nabothi, Mûjezireeli. Ririkana rîrîa we nanie twathiîte vamwe tûtwîte mbarathi tûrî vuva wa îthe Ahabu, Ngai-Mûnene nîwaugire îgûrû rîgiî Ahabu atî,

²⁶ ‘Nama îgoro nînîronire kimba Kîam Nabothi wana ciimba cia anake ake. Ngaakûûragîra mûgûndarî wa ûyû nîguo nîîrîvîrîrie.’ Kwoguo Jehu nîwerire mûrangîri wake atîrî ‘Oca kimba gîake ûthiî ûgikie mûgûndarî wa Nabothi, wata ûrîa Ngai-Mûnene aaugire.’ ”

Ahazia, mûthamaki wa Juda nîwaûragirwe.

²⁷ Rîrîa Ahazia, mûthamaki wa Juda oonire ûguo, nîwaûrire erekerete mwena wa Bethi Hagani. Jehu nîwamûrûmîrîrie na akîra andû ake mamûûrage. Nao nîmaamûrathire arî gîkaarirî gîake Kîam mbaara athiîte Guri arî vakuvî na îtûûra rîa Ibuleamu. Nwatî nîwaûrîre Megido, îtûûra rînene na agîkuîra kuo.

²⁸ Ndungata ciake nîciakuuire mwîrî wake ûrî gîkaarirî Kîam mbaara ûkîvirwa Jerusalemu. Nîciaûthikire mbîrîrarî irîa ciathikagwa athamaki îtûûrarî rînene rîa Daudi.

²⁹ Ahazia nîwatuîkire mûthamaki wa Juda mwakarî wa îkûmi na ûmwe Joramu mûvîcî wa Ahabu arî mûthamaki wa Isiraeli.

Kûragwa kwa Jezebeli

³⁰ Rîrîa Jehu aakinyire Jezireeli, Jezebeli nîwegwire ûvoro ûcio. Nîwegemirie metho make, akîrûtha njuîrî ciake waro, akîthiî ndiricarî na akîrorereria na kûu vûrûrirî.

³¹ Rîrîa Jehu aatonyire kîvingorî, Jezebeli nîwaûririe atîrî, “Zimuri, we ûraûragire mwathi waku ûkîte na thayû?”

³² Jehu nîwarorererie ndiricarî na akîûria atîrî, “Nîûrîkû ûrî mwena wakwa? Nîûrîkû?” Ngaramba ithatû cia mûthamaki nîciamûrorererie ndiricarî.

³³ Nake Jehu nîwamerire atîrî, “Mûvarûkieni nthî!” Kwoguo ndungata icio nîciavarûkirie Jezebeli nthî; nayo nthakame îmwe ya Jezebeli nîyaminjûkîre rûthingo, nayo îo îngî îkîminjûkîra mbarathi. Jehu nîwakinyangire mwîrî wa Jezebeli na mbarathi ciake na gîkaari gîake Kîam mbarathi.

³⁴ Nîwatonyire nyomba ya ûthamaki akîrîa na akînyua. Nîwacokire akiuga atîrî, “Ocani mûndûmûka ûyû mûrume na mûmûthike, nîûndû nî mwarî wa mûthamaki.”

³⁵ Nwatî arûme arîa maathiîre kûmûthika matiethîra mwîrî wake wonthe tiga îvîndî rîake rîa kîongo, mavîndî ma magûrû na ma njara.

³⁶ Rîrîa arûme acio maacokire kûrî Jehu na makîmwîra ûvoro ûcio, Jehu nîwaugire atîrî, “Ûguo nîguo Ngai-Mûnene aaugîte nîgûgeekîka, rîrîa aaririe na njîra ya ndungata yake Elija Mûtishibi atî; ‘Ngui nîikaarîa mwîrî wa Jezebeli;

³⁷ nakîo kimba gîake gîkaanyagarûka ta mai mûgûndarî kûu vûrûrirî wa Jezireeli, na gûtirî mûndû ûkaavota gûkîmenya’ ”