2Atha 7 - ÎVUKU RÎA ÛVORO MWARO

¹ Nwatî Elisha nîwacokirie atîrî, “Thikîrîria ûrîa Ngai-Mûnene arauga! Rûyû îvinda wata rîîrî, vau kîvingorî gîa Samaria kilo ithatû cia mûtu ûrîa mûvinyu mûno ikendagua shekeli îmwe nacio kilo ithathatû cia cairi ikendagua gacunjî kamwe ga sîlûva.”

² Mûnene ûrîa ûtethagîrîria mûthamaki nîwerire Elisha atîrî, “Ûguo gûtingîvoteka, wana kethîrwa Ngai-Mûnene ke mwene nwa aurithie mbura kuuma îgûrû!” Nake Elisha nîwacokirie atîrî, “Nîûkeyonera na metho maku ûndû ûcio ûgîkîka, nwatî ndûkaarûma irio icio.”

Athigari a Sîria nîmaathiîre

³ Arûme ana arîa mekaraga kîvingorî marî arwaru mûrimû mûcûku wa ngothi nîmeranire atîrî, “Nîtwîkara ava nginya rîrîa tûgaakua nîkî?

⁴ Tûngiuga atî tûtonye îtûûrarî, nîtûgaakuîra kuo nî yûra, na twekara ava wanarîo nwa tûgaakua. Kwoguo tûthiîni kûrîa andû a Sîria matûûraga, matûûrage kana marege gûtûûraga.”

⁵ Kwoguo nîmaathiîre kûrî na rûkurerema kûrîa andû a Sîria matûûraga; nwatî rîrîa maakinyire kîvingorî Kîamo, mationa mûndû.

⁶ Ngai-Mûnene nîwatûmîte athigari a Sîria megue ta mûgambo wa ikaari cia mbaara na ta wa mbarathi, ta mûgambo wa athigari eengî mûno a mbaara, na makîrana atîrî, “Taroria, mûthamaki wa Isiraeli nîakomborete athamaki a Ahiti, na athamaki a Misiri nîguo maûke matûtharîkîre.”

⁷ Kwoguo andû a Sîria nîmaaûrire kûrî na rûkurerema nîguo matikaûragwe na nîmaatiganîrie mbarathi ciao na mvunda ciao na magîtiga kûrîa maambîte magema wata ûrîa gwekariî.

⁸ Rîrîa arûme acio ana maarwarîte mûrimû mûcûku wa ngothi maakinyire kûu kwambîtwe magema, nîmaatonyire îgemarî rîmwe. Nîmaarîre na makînyua na magîkuua sîlûva, thaavu na nguo irîa moonire. Nîmaathiîre nacio na makîithitha. Nîmaacokire rîngî, magîtonya îgemarî rîngî na magîka wata ûguo.

⁹ Nîmaacokire makîrana atîrî, “Tûtireka waro! Twîna ûvoro mwaro na tûtiagîrîrwe nî gûkira naguo. Ethîrwa nîtweterera tûkaawaria kîraûko, nama nîtûkaaverithua. Tigani tûthiî wa rîu tûkere andû a nyomba ya mûthamaki ûvoro ûcio.”

¹⁰ Kwoguo nîmaaumire kûrîa andû a Sîria maambîte magema na magîcoka Samaria. Nîmeetire arangîri a kîvingo na makîmeera atîrî, “Tûthiîre kûrîa andû a Sîria mambîte magema na tûtinona kana twîgua wanarî mûndû kuo: Mbarathi na mvunda irarî nthaîke, namo magema mekariî wa ûrîa maatigirwe nî andû a Sîria.”

¹¹ Nao arangîri acio a kîvingo nîmaanîrîre ûvoro ûcio na ûkîmenyeka kûrî andû a nyomba ya mûthamaki.

¹² Mûthamaki nîwaramûkire ûtukû na akîra ndungata ciake atîrî, “Nîngûmwîra ûrîa andû a Sîria mavangîte! Nîmaicî atî gûkû kûrî na yûra; kwoguo nîmatigîte kûrîa mambîte magema na makathiî kwîthitha na kûu mîgûndarî magîciria atî nîtûkuma îtûûrarî tûthiî tûgacarie irio, macoke matûnyite na manyite îtûûra.”

¹³ Ndungata îmwe yake nîyaugire atîrî, “Andû a îtûûra rîîrî magaakua wata andû arîa engî onthe a Isiraeli maakwire. Kwoguo tigani tûtûme arûme amwe mathiî na mbarathi ithano cia irîa ndigaru, nîguo makamenye ûrîa gwîkarîte.”

¹⁴ Kwoguo nîmaathuurire arûme amwe, na mûthamaki akîmatûma mathiî na ikaari igîrî cia mbaara nîguo makamenye ûrîa gwekîkîte kûrî athigari a mbaara a Sîria.

¹⁵ Arûme acio nîmaathiîre Jorodani na makîona nguo inyagarûkîte njîrarî na indo ciîngî irîa andû a Sîria maatecaga maûrîte. Ndungata icio nîciacokire rîngî na ikîra mûthamaki ûvoro ûcio.

¹⁶ Andû a Samaria nîmaacokire makîthiî kûrîa andû a Sîria maambîte magema na makîîa indo cia andû a Sîria. Kilo ithatû cia mûtu ûrîa mwaro mûno kana kilo ithathatû cia cairi nîciendagua gacunjî kamwe ga sîlûva, wata ûrîa Ngai-Mûnene aaugîte.

¹⁷ Mûthamaki wa Isiraeli nîwaigîte mûthigari ûrîa wamûtethagîrîria, arî mûrangîri wa kîvingo. Mûthigari ûcio nîwakinyangirwe nî andû na agîkua, wata ûrîa Elisha erîte mûthamaki rîrîa mûthamaki aathiîte kûrî ke.

¹⁸ Elisha nîwerîte mûthamaki, atî mûthenya ûcio wîngî îvinda wata rîu, kilo ithatû cia mûtu ûrîa mwaro mûno kana kilo ithathatû cia cairi ikendagua gacunjî kamwe ga sîlûva kûu Samaria.

¹⁹ Ûndû ûcio nîguo mûnene wa athigari aareganire naguo rîrîa aaugire atîrî, “Ûguo gûtingîvoteka, wana kethîrwa nîkwa Ngai-Mûnene ke mwene angiurithia mbura kuuma îgûrû!” Nake Elisha nîwamwîrîte atîrî, “Ûkeyonera na metho maku ûndû ûcio ûgîkîka, nwatî ndûkaarûma irio icio.”

²⁰ Ûguo nîguo gwekîkire kûrî mûthigari ûcio watethagîrîria mûthamaki: andû maamûkinyangire arî kîvingorî na agîkua.