2Atha 6 - ÎVUKU RÎA ÛVORO MWARO

Îthanwa rîrîa rîarî rîûru nîrîonekire.

¹ Gîkundi Kîam arathi arîa Elisha aatongoragia nîmerire Elisha atîrî, “Taroria, vandû ava tûtûûraga nî vanini mûno!

² Twîtîkîrie tûthiî Jorodani tûgateme mîtî nîguo tûtume vandû va gûtûûra.” Nake Elisha nîwamacokerie atîrî, “Thiîni.”

³ Ûmwe wa arathi acio nîwerire Elisha atîrî, “Nakûthaitha wîtîkîre tûthiî nawe tue ndungata ciaku.” Nake nîwetîkîre kûthiî nao.

⁴ Kwoguo nîwathiîre nao. Rîrîa maakinyire Jorodani, nîmaambîrîrie gûtema mîtî.

⁵ Nwatî vîndî wa îo mûndû ûmwe watemaga mûtî îthanwa rîake nîrîarûkire na rîkîgwa manjîrî. Mûndû ûcio nîwaugîrîrie na akîîra Elisha atîrî, “Ûûi, mwathi wakwa, îthanwa rîu nîkwa rîravoetwe!”

⁶ Elisha nîwaûririe mûndû ûcio atîrî, “Rîagwa va?” Nake mûndû ûcio nîwonirie Elisha varîa îthanwa rîu rîagwîte. Elisha nîwatemire kamûtî, agîgaikia vau îthanwa rîagwîte na îthanwa rîkîerere manjîrî.

⁷ Nîwacokire akîra mûndû ûcio atîrî, “Rîoce.” Nake mûndû ûcio nîwatambûrûkirie njara yake na akîrîoca.

Athigari a mbaara a Sîria nîmaavootirwe

⁸ Vîndî îmwe rîrîa mûthamaki wa Sîria aarûaga na andû a Isiraeli, nîwagîre ndundu na ndungata ciake na akîthuura vandû varîa aambire îgema rîake.

⁹ Nwatî Elisha nîwatûmire mûndû athiî kûrî mûthamaki wa Isiraeli akamwîre atîrî, “Îîmenyerere ndûkavîtûkîrîre vandû vau, nîûndû vau nîvo andû a Sîria mathiîte kwîthitha.”

¹⁰ Kwoguo mûthamaki wa Isiraeli nîwatûmanîre athigari ake matikathiî vandû vau Elisha aamwîrîte ûvoro wavo maita meengî nîguo ekarage emenyererete.

¹¹ Mûthamaki wa Sîria nîwathînîkire ngoro mûno nîûndû wa ûndû ûcio. Kwoguo nîwetire ndungata ciake na agîciûria atîrî, “Nû gatagatîrî kenyu wî mwena wa mûthamaki wa Isiraeli?”

¹² Ûmwe wa ndungata ciake nîwaugire atîrî, “Ûûi, mwathi wakwa mûthamaki gûtirî mûndû wanarî ûmwe. Nwatî mûrathi Elisha nîke wîraga mûthamaki wa Isiraeli maûndû marîa waragia ûrî nyombarî îrîa ûmamaga.”

¹³ Mûthamaki nîwaugire atîrî, “Thiîni mûgatuîrie mûmenye varîa arî, nîguo nîmûtûmanîre anyitwe.” Nake nîwerirwe, atî Elisha aarî Dothani.

¹⁴ Kwoguo mûthamaki wa Sîria nîwatûmire mbarathi kuo, ikaari cia mbaara na athigari eengî a mbaara. Nîmaathiîre ûtukû na makîrigicîria îtûûra rîu.

¹⁵ Rîrîa ndungata ya Elisha aaramûkire kîraûko na akiuma nja, nîwonire athigari a mbaara marî na mbarathi na ikaari cia mbaara marigicîrîtie îtûûra. Ndungata îo nîyacokire kûrî Elisha na îkîûria atîrî, “Ûûi mwathi wakwa! Nîtwîka atîa?”

¹⁶ Nake Elisha nîwamûcokerie atîrî, “Mûtikamake; nîûndû tûrî engî kûrî o.”

¹⁷ Elisha nîwacokire akîvoya atîrî, “Ûûi Ngai-Mûnene, nakûthaitha ûmûvingûre metho nîguo avote kwona.” Kwoguo Ngai-Mûnene nîwavingûrire metho ma ndungata îo na îkîvota kwona. Nîyonire kîrîma gîcûrîte mbarathi na ikaari cia mbaara irigicîrîtie Elisha.

¹⁸ Rîrîa andû a Sîria maathiîre kûrûa na Elisha, Elisha nîwavoire Ngai-Mûnene akîmwîra atîrî, “Nakûthaitha ûtûme andû aya matuîke itumumu!” Kwoguo Ngai-Mûnene nîwatûmire andû acio matuîke itumumu wata ûrîa Elisha aavoete.

¹⁹ Elisha nîwacokire akîmeera atîrî, “Îno tîyo njîra, na rîrî tîrîo îtûûra. Nûmîrîrai, na nîngûmûvira kûrî mûndû ûrîa mûracaria.” Nake nîwamavirire Samaria.

²⁰ Rîrîa maakinyire Samaria, Elisha nîwavoire Ngai-Mûnene akîmwîra atîrî, “Ûûi Ngai-Mûnene, vingûra andû aya metho nîguo mavote kwona.” Kwoguo Ngai-Mûnene nîwamavingûrire metho, na makîona atî maarî gatagatî ga îtûûra rîa Samaria.

²¹ Rîrîa mûthamaki wa Isiraeli oonire andû a Sîria nîwaûririe Elisha atîrî, “Vava, nîmaûrage? Nîmaûrage?”

²² Nake Elisha nîwamûcokerie atîrî, “Naarî ndûkamaûrage, wana mûtikaûrage athigari arîa mûnyitîte. Marûmieni irio na mûmakundie kîndû gîa kûnyua, na mûmarekererie macoke kûrî mûthamaki wao.”

²³ Kwoguo mûthamaki wa Isiraeli nîwamarûthîre kîrugo kînene. Na rîrîa maarîkirie kûrîa na kûnyua, nîwamarekererie na magîcoka kûrî mûthamaki wao. Kuuma vîndî îo andû a Sîria matiacoka kûtharîkîra vûrûri wa Isiraeli rîngî.

Îtûûra rîa Samaria nîrîathiûrûrukîrue

²⁴ Vuvarî, Benihadadi, mûthamaki wa Sîria nîwatongoririe athigari ake onthe a mbaara na makîthiî makîrigicîria îtûûra rîa Samaria.

²⁵ Nîkwagîre na yûra înene mûno kûu îtûûrarî rîa Samaria. Benihadadi na athigari ake nîmekarire marigicîrîtie îtûûra rîa Samaria nginya kîongo Kîam mvunda gîkendagua tûcunjî mîrongo înana (80) twa sîlûva nacio ngiramu magana maîrî (200) cia mai ma îcîa ikendua tûcunjî tûtano (5) twa sîlûva.

²⁶ Vîndî îrîa mûthamaki wa Isiraeli aavîtûkîrîrîte îgûrû rîa rûthingo rwa îtûûra, mûndûmûka ûmwe nîwamûrîrîre akîmwîraga atîrî, “Ndethia, mwathi wakwa mûthamaki!”

²⁷ Nake mûthamaki nîwamwîrire atîrî, “Ethîrwa Ngai-Mûnene tîagûtethia, nie nîngîgûtethia na ndûî? Ndirî na ngano kana ndivei.”

²⁸ Mûthamaki nîwacokire akîûria mûndûmûka ûcio atîrî, “Nîndûî kîrakûthînia?” Nake mûndûmûka ûcio nîwamûcokerie atîrî, “Mûndûmûka ûyû aambîrire atî tûrîe kaana gakwa ga kavîcî ûmûnthî, tûgaacoka tûrîe kaana gake ga kavîcî mûthenya ûcio wîngî.

²⁹ Kwoguo nîtwarugire kaana gakwa na tûgîkarîa. Naguo mûthenya ûcio wîngî, nînamwîrire arete kaana gake nîguo tûkarîe nwatî aarî mûkathithu!”

³⁰ Rîrîa mûthamaki eeguire ûrîa mûndûmûka ûcio aaugire, nîwatembûrangire nguo ciake na marûrû. Vîndî îo nîkwa aavîtûkîte arî îgûrû rîa rûthingo, nao andû nîmaaroririe na makîona ekîrîte nguo cia macakaya rungu rwa nguo ciake.

³¹ Mûthamaki nîwaugire atîrî, “Ngai-Mûnene arombûraga ethîrwa Elisha tîatinua kîongo ûmûnthî!”

³² Nîwacokire agîtûma mûnjaama athiî akagîre Elisha. Vîndî îo Elisha aarî mûciî marî na athuuri arîa maathiîte kûmûcerera. Mbere ya mûnjaama ûrîa mûthamaki aatûmîte akinye, Elisha nîwerire athuuri acio atîrî, “Mûragani nîwatûma mûndû aûke ambûrage! Vîndî îrîa agaakinya gûkû, mûkavinga mûrango na mûtikamwîtîkîrie atonye. Mûthamaki ke mwene akethîrwa amumîte vuva.”

³³ Wa Elisha akîaragîria athuuri acio, mûthamaki nîwakinyire na akiuga atîrî, “Ngai-Mûnene nîke ûtûmîte tûgîe na thîna îno! Mbetererete Ngai-Mûnene eke ûndû rîngî nîkî?”