2Atha 5 - ÎVUKU RÎA ÛVORO MWARO

Naamani nîwavonirue mûrimû mûcûku wa ngothi

¹ Naamani ûrîa warî mûnene wa athigari a mbaara a mûthamaki wa Sîria nîwendetwe na agatîwa mûno nî mwathi wake, nîûndû na njîra yake Ngai-Mûnene nîwavete andû a Sîria vinya wa kûvootana. Aarî mûthigari njamba, nwatî arî mûrwaru mûrimû mûcûku wa ngothi.

² Vîndî îmwe andû a Sîria nîmaathiîre gûtavana, na nîmaatavire mwîrîtu ûmwe ûtarî mûkûrû kuuma vûrûrirî wa Isiraeli. Mwîrîtu ûcio nîwatuîkire ndungata ya mûka wa Naamani.

³ Mûthenya ûmwe mwîrîtu ûcio nîwerire mûndûmûka ûcio mwathi wake atîrî, “Narî kethîrwa mwathi wakwa nwa athiî kûrî mûrathi ûrîa ûtûûraga Samaria! Ûcio nwa amûvonie mûrimû ûcio wake mûcûku wa ngothi.”

⁴ Rîrîa Naamani eeguire ûguo, nîwathiîre kûrî mûthamaki wa Sîria na akîmwîra ûrîa mwîrîtu wa kuuma vûrûri wa Isiraeli aaugîte.

⁵ Nake mûthamaki wa Sîria nîwerire Namani atîrî, “Thiî wa rîu kûrî mûthamaki wa Isiraeli na ûmûvirîre maarûa îno.” Kwoguo Naamani nîwaumire kûu na akîthiî na tûcunjî ngiri mîrongo îthatû (30,000) twa sîlûva, tûcunjî ngiri ithathatû (6,000) twa thaavu, na nguo cia gûcenjia maita îkûmi.

⁶ Maarûa îrîa aamûvirîrîte yandîkîtwe atîrî, “Maarûa îno yagûkinyîra, menya atî nagûtûmîra ndungata yakwa, Naamani nîguo ûmûvonie mûrimû wake mûcûku wa ngothi.”

⁷ Rîrîa mûthamaki wa Isiraeli aathomire maarûa îo, nîwatûmbirwe nî marakara na agîtembûranga nguo ciake na akiuga atîrî, “Mûthamaki wa Sîria areciria nie nî Ngai ûngîvota kûûraga mûndû na akamûriûkia, nwa nvote kûvonia mûndû ûyû mûrimû wake mûcûku wa ngothi? Roria rîu wone ûrîa arenda twambîrîrie kûnegenania nake!”

⁸ Nwatî rîrîa mûrathi Elisha eegwire atî mûthamaki wa Isiraeli nîatembûrangîte nguo ciake, nîwatûmanire kûrî ke akerwe atîrî, “Ûrakarîtue ûguo nî ndûî? Mwîre aûke kûrî nie wa rîu na nîakûmenya atî gûkû Isiraeli kûrî na mûrathi!”

⁹ Kwoguo Namani nîwathiîre na mbarathi ciake na ikaari ciake cia mbaara na akîrûngama mûromorî wa nyomba ya Elisha.

¹⁰ Elisha nîwatûmire ndungata îthiî îkamwîre athiî akethambîrie rûnjîrî rwa Jorodani maita mûgwanja na mûrimû wake nîûkûvona viû.

¹¹ Nwatî Naamani nîwarakarire na akîthiî akiugaga atîrî, “Nînîciragia nîaûka arûngame varî nie na amvoere kûrî Ngai-Mûnene, Ngai wake na ambararie njara ciake îgûrû rîa gûkû ndwarîte na amvonie!

¹² Kinthî nyûnjî cia gwetû Damesiki, Abana na Faripari tî mbaro gûkîra nyûnjî cionthe cia Isiraeli? Kinthî ndingîîthambîrie kuo na ngavonua?”

¹³ Nwatî ndungata ciake nîciathiîre varî ke na ikîmwîra atîrî, “Mwathi wetû, kethîrwa mûrathi nîarakwîrîte wîke ûndû mûnene makîria-î, anga ndûngîka? Rîu ûrarega kwîthambia nîkî nîguo ûthere wata ûguo akwîrîte?”

¹⁴ Kwoguo Namani nîwathiîre rûnjîrî rwa Jorodani. Nîwetovokirie kuo maita mûgwanja, wata ûrîa eerîtwe nî mûrathi Elisha na nîwavonire viû na mwîrî wake ûgîkara ta wa kaana.

¹⁵ Nîwacokire marî na ndungata ciake kûrî mûrathi Elisha na akîra Elisha atîrî, “Rîu nînamenya atî gûkû nthî kuonthe gûtirî ngai îngî tiga Ngai wa Isiraeli. Kwoguo nakûthaitha wamûkîre kîveo kuuma kûrî nie.”

¹⁶ Nwatî Elisha nîwaugire atîrî, “Nevîta na Ngai-Mûnene ûrîa ûtûûraga mwoyo, ûrîa ndungatagîra, atî tînyamûkîra kîveo wanarî kîmwe.” Naamani nîwaringîrîrie Elisha amûkîre kîveo, nwatî Elisha nîwaregire.

¹⁷ Naamani nîwacokire akîra Elisha atîrî, “Ethîrwa tîwamûkîra kîveo gîakwa, nakûthaitha wîtîkîrie mvewe mûthetu ûngîkuuwa nî nyûmbû igîrî nthiî naguo mûciî, nîûndû kuuma rîu kûthiî na mbere ndikaaruta magongoona mengî kana matega ma kûvîvua kûrî ngai îngî tiga Ngai-Mûnene.

¹⁸ Ngai-Mûnene aronjovagîra rîrîa ngaathiîcania na mwathi wakwa hekarûrî ya Rimoni, athiîte kûmîgooca. Nama, Ngai-Mûnene aronjovera!”

¹⁹ Nake Elisha nîwerire Naamani atîrî, “Thiî na thayû.” Nwatî rîrîa Naamani aaumire varî Elisha na akîthiî gatîna gatarî karaca,

²⁰ Gehazi, ndungata ya Elisha nîwaugire atîrî, “Taroria, mwathi wakwa nîwarega kwamûkîra kîrîa Naamani aramûreterete na nîwamûrekereria athiî. Nevîta na Ngai-Mûnene ûrîa ûtûûraga mwoyo, atî nînîmûrûmîrîria na îvenya na mboce kîndû kuuma kûrî ke.”

²¹ Kwoguo Gehazi nîwarûmîrîrie Naamani na îvenya. Rîrîa Namani oonire mûndûmûrûme amûkinyîrîrîte na îvenya, nîwaumire gîkaarirî gîake Kîam mbaara nîguo amûtûnge, na nîwamûûririe atîrî, “Nîkwa kûrî na thîna?”

²² Nake Gehazi nîwacokirie atîrî, “Gûtirî na thîna. Nwatî mwathi wakwa andûma ngwîre atî kûrî na anake aîrî a gîkundi Kîam arathi maûka wa rîu maumîte vûrûrirî ûrîa ûrî irîma wa Efiraimu, na nakûthaitha ûmave tûcunjî ngiri ithatû twa sîlûva na nguo igîrî cia gwîkagîra mîthenya îrîa mîamûre.”

²³ Naamani nîwacokerie Gehazi atîrî, “Amûkîra tûcunjî ngiri ithathatû twa sîlûva wîna gîkeno.” Namani nîwamûringîrîrie tûcunjî tûu na agîtwîkîra nguniarî igîrî vamwe na nguo igîrî cia gwîkagîra mîthenya îrîa mîamûre na akîova ngunia icio. Nîwanengerire ndungata igîrî ciake na akîmeera maikuwe na mathiî marî mbere ya Gehazi.

²⁴ Rîrîa maakinyire kîrîmarî kûrîa Elisha aatûûraga, Gehazi nîwocire ngunia icio cioîrî na agîitonyia nyomba na agîcoka akîra ndungata icio cia Namani icoke; nacio nîciacokire.

²⁵ Gehazi nîwatonyire nyomba rîngî na Elisha akîmûria atîrî, “Gehazi, wauma kû?” Nake Gehazi nîwamûcokerie atîrî, “Mwathi wakwa, nie ndungata yaku, gûtirî kûndû nîrathiîte.”

²⁶ Nwatî Elisha nîwerire Gehazi atîrî, “Kinthî tûtirarî nawe kîîroho rîrîa mûndûmûrûme aumire gîkaarirî gîake Kîam mbaara na agûtûnga? Kau nîko kararî kavinda ga kwamûkîra mbeca, nguo, mîgûnda ya mîtamaiyû îrîa îciaraga matunda na ya mîthavibu, ng'ondu na ndegwa wana kana ndungata cia aka na cia arûme?

²⁷ Kwoguo we, na njiarwa ciaku nî mûnyitwa nî mûrimû ûcio mûcûku wa ngothi wa Namani na mûtûûre naguo tene na tene!” Nake Gehazi nîwaumire kûrî Elisha arî mûrwaru mûrimû mûcûku wa ngothi, mwîrî wake ûcerûvîte ta îra.