2Atha 4 - ÎVUKU RÎA ÛVORO MWARO

Elisha nîwatethirie mûndûmûka wa ndigwa ûrîa warî mûthîni

¹ Mûndûmûka ûmwe wa ndigwa warî mûka wa mûndû ûmwe wa gîkundi Kîam arathi nîwathiîre kûrî Elisha na akîmwîra atîrî, “Mûthuuriwa ararî ndungata yaku na nî mûkuû. Nîwicî atî ndungata îo yaku nîîretigîrîte Ngai-Mûnene, na rîu mûndû ûrîa ûramûkombithîtie mbeca nîwecîra anake akwa oîrî nîguo magatuîke ngombo ciake.”

² Nake Elisha nîwamûûririe atîrî, “Ûrenda ngwîke atîa? Ta mbîra wî na ndûî mûciî gwaku.” Nake mûndûmûka ûcio nîwamûcokerie atîrî, “Gûtirî wanarî kîndû, tiga tûguta tûnini tûrî kanyûngûrî.”

³ Nake Elisha nîwamwîrire atîrî, “Thiî mîciî kwa andû arîa mûtûûranîrîte nao na ûvoye nyûngû nyîngî itarî kîndû.

⁴ Mûcoke mûtonye nyomba mûrî na avîcî aku, mwîvingîre ndaarî, na wîkîre tûguta tûu nyûngûrî icio cionthe. Wa nyûngû yecûra ûkamiga kamwena.”

⁵ Kwoguo mûndûmûka nîwatigîre Elisha na akîthiî agîtonya nyomba marî na avîcî. Nîwavingire mûrango, agîoca tûguta tûu tûnini na akîambîrîria gûtwîkîra nyûngûrî icio wa akînengagîrîrua cio nî avîcî.

⁶ Rîrîa nyûngû cionthe ciecûrire mûndûmûka nîwaûririe kana varî na nyûngû îngî yatigarîte. Nake ûmwe wa avîcî nîwamwîrire atîrî, “Gûtirî nyûngû îngî.” Maguta nîmaacokire magîtiga kuuma.

⁷ Nîwathiîre na akîra Elisha ûguo. Nake Elisha nîwamwîrire atîrî, “Thiî wendie maguta mau na ûrîve thirî yaku, nawe mûrî na avîcî aku nî mûgûtûûrua mwoyo nî mau magaatigara.”

Elisha na Mûndûmûka gîtonga kuuma Shunemu

⁸ Mûthenya ûmwe Elisha nîwathiîre Shunemu kûrîa mûndûmûka warî gîtonga aatûûraga. Mûndûmûka ûcio nîwaringîrîrie Elisha athiî akarîe irio gwake. Kwoguo kuuma vîndî îo, rîrîa rîonthe Elisha aathiîcaga Shumemu, nîwatonyaga mûciî kwa mûndûmûka ûcio na akarîa irio kuo.

⁹ Mûndûmûka ûcio nîwerire mûrûme atîrî, “Taroria rîu nîmonete atî, mûndû ûyû ûvîtûkagîrîra gûkû gwetû mûciî vîndî cionthe nî mûndû wamûrîrîtwe Ngai.

¹⁰ Tiga tûtume kanyomba kanini ava rûthingorî, tûcoke twige ûrîrî, metha, gîtî na taa kuo, nîguo rîrîa rîonthe agaatûceragîra agekaraga kuo.”

¹¹ Mûthenya ûmwe, Elisha nîwathiîre Shunemu. Nîwavîtûkîrîre kwa mûndûmûka ûcio, agîtonya kanyombarî kau na akînogoka kuo.

¹² Nîwerire Gehazi, ndungata yake atîrî, “Îta mûndûmûka ûcio Mûshunemu.” Rîrîa mûndûmûka ûcio aaûkire na akîrûngama mbere ya Elisha,

¹³ Elisha nîwerire Gehazi atîrî, “Mûrie ûrîa nîngîmwîkîra nîûndû wa maûndû mama monthe atwîkîte. Nîakwenda arîrîrue kûrî mûthamaki kana kûrî mûnene wa athigari a mbaara?” Nake mûndûmûka nîwacokirie atîrî, “Nîrîmwîganîru nîrî gatagatîrî ka andû a mûvîrîga wetû.”

¹⁴ Elisha nîwaûririe atîrî, “Nînjoka nîmwîkîre atîa?” Nake Gehazi nîwamûcokerie atîrî, “Mûndûmûka ûcio ndarî kaana ga kavîcî na mûrûme nî mûkûrû.”

¹⁵ Elisha nîwaugire atîrî, “Mwîre aûke ava.” Mûndûmûka nîwathiîre na akîrûngama mûromorî wa nyomba,

¹⁶ na Elisha nîwamwîrire atîrî, “Vîndî ta îno mwaka mûku nîûkethîrwa ûrî na kaana gaku ga kavîcî.” Nake mûndûmûka nîwaugire atîrî, “Ûûi! Naarî mwathi wakwa, mûndû wa Ngai tiga kûmveenia!”

¹⁷ Nwatî mûndûmûka nîwagîre îvu na agîciara kaana ga kavîcî mwaka ûcio warûmîrîrîte kavinda wata karîa Elisha aaugîte.

¹⁸ Rîrîa kaana gaakûrire mûthenya ûmwe nîkaathiîre kûrî îthe, kûrîa maarî na arîa maakethaga.

¹⁹ Wa rîmwe, nîkaambîrîrie kûrîra gakîraga îthe atîrî, “Nînîratuurwa nî kîongo! Nînîratuurwa nî kîongo!” Îthe nîwerire ndungata yake atîrî, “Gakuue ûkavire kûrî ng'ina.”

²⁰ Ndungata nîyakuire kaana na îgîkavira kûrî ng'ina. Nake ng'ina nîwagekarîrie cierorî ciake nginya thaa thita cia mûthenya, gagîcoka gagîkua.

²¹ Mûndûmûka ûcio nîwavirire kaana kau nyombarî ya Elisha, agîkamamia ûrîrî, akiuma na agîtiga avinga mûrango.

²² Nîwacokire agîta mûrûme na akîmwîra atîrî, “Ndûmîra ndungata îmwe îrî na mvunda îmwe, nîguo mvinyûre kûrî mûrathi Elisha na njoke na îvenya.”

²³ Nake mûrûme nîwamûûririe atîrî, “Ûrenda kûthiî ûmûnthî nîkî? Ûmûnthî tî thavatû, wana tî kîrugo gîa karûngamo ka mweri.” Nake mûka nîwamwîrire atîrî, “Ndûkamake.”

²⁴ Mûndûmûka nîwaugire mvunda îtandîkwe, na akîra ndungata yake atîrî, “Vinyûrithia mvunda wata ûrîa îngîvota na ndûkathiî kavora tiga nwa ngwîrire.”

²⁵ Kwoguo nîwambîrîrie rûgendo na akîthiî kîrîmarî gîa Karimeli, kûrîa Elisha aarî. Rîrîa Elisha aamwonire athiîte na kûrî ke, nîwerire Gehazi ndungata yake atîrî, “Taroria, ûûrîa mûndûmûka ûrîa Mûshunemu ûkîte!

²⁶ Vinyûra ûmûtûnge na ûmûrie kana nî mwaro, kana mûrûme nî mwaro, na kana mûvîcî nî mwaro.” Nake mûndûmûka nîwerire Gehazi atîrî, “Maûndû monthe nî maro.”

²⁷ Nwatî rîrîa mûndûmûka ûcio aakinyire kûrî Elisha vau kîrîmarî, nîwanyitire magûrû ma Elisha. Nake Gehazi nîwathiîre vakuvî nîguo amûthengutie vo, nwatî Elisha nîwamwîrire atîrî, “Tigana nake, nîûndû arî na ûndû ûramûthînia mûno ngororî; na Ngai-Mûnene nîanthithîte ûndû ûcio, akarega kûmbîra.”

²⁸ Mûndûmûka ûcio nîwacokire akîra Elisha atîrî, “Nîkwa naakwîrire ûmve kaana ga kavîcî? Kinthî ndiakwîrire ndûkamveenie?”

²⁹ Elisha nîwerire Gehazi atîrî, “Îîvarîrie na woce mûragi wakwa na ûthiî naguo. Ûngîcemania na mûndû wa wonthe njîrarî, ndûkamûkethie; na ûngîkethua nî mûndû wa wonthe, ndûkamûketheke. Thiî na wigîrîre mûragi wakwa ûthiûrî wa kaana kau.”

³⁰ Ng'ina wa kaana kau nîwacokire akîra Elisha atîrî, “Nevîta na Ngai-Mûnene ûrîa ûtûûraga mwoyo, na wata ûrîa we mwene ûgûtûûra, atî tîngûtiga!” Kwoguo andû acio wa oîrî nîmaathiîcanirie.

³¹ Gehazi nîwathiîre mbere yao na akigîrîra mûragi wa Elisha ûthiûrî wa kaana kau, nwatî gatiaruta mûgambo kana koneke takwa kangîriûka. Kwoguo Gehazi nîwacokire rîngî na agîcemania na Elisha na akîmwîra atîrî, “Kaana gatinaûkîra.”

³² Rîrîa Elisha aakinyire nyomba, nîwethîre kaana kau kamamîte ûrîrî karî gakuû.

³³ Kwoguo nîwatonyire ndaarî ya nyomba, akîvinga mûrango na akîvoya kûrî Ngai-Mûnene.

³⁴ Nîwacokire agîtûa ûrîrî na akîmamîra kaana kau kanyua gake kavutîtie kanyua ga ko, metho make mavutîtie metho mako, na njara ciake irî îgûrû rîa njara ciako. Nîwetambarûkirie îgûrû rîako, naguo mwîrî wako ûkîgîa na ûrugarî.

³⁵ Elisha nîwacokire agîûkîra, agîceracera kûu nyomba, agîcoka agîtûa ûrîrî na agîîtambarûkia îgûrû rîa kaana kau rîngî. Kaana kau nîgaativire maita mûgwanja, na gagîcoka gakîvingûra metho mako.

³⁶ Elisha nîwetire Gehazi na akîmwîra atîrî, “Îta mûndûmûka ûcio Mûshunemu.” Nake nîwamwîtire. Rîrîa aathiîre varî ke kûu nyomba, Elisha nîwamwîrire atîrî, “Oca mûvîcîguo.”

³⁷ Nîwegwîthirie vau magûrûrî ma Elisha na akînamîrîria ûthiû wake nthî; nîwacokire agîoca kaana gake na akiuma nja.

Ciama ciîngî igîrî

³⁸ Elisha nîwacokire Giligali rîngî. Nakuo kûu vûrûrirî ûcio kwarî na yûra. Nakîo gîkundi Kîam arathi gîekarîte nthî mbere yake, na wa akîmathomithagia nîwerire ndungata yake atîrî, “Îkîra nyûngû îrîa nene riiko na ûrugîre arathi aya irio.”

³⁹ Ûmwe wa ndungata icio nîwathiîre na kûu mûgûndarî gûcaria manyenyi. Nîwonire mûthavibu wa kîthaka na agîtua kuuma kûrî guo manyamû meengî mekariî ta maage na akîmakuua na nguo yake. Nîwathiîre namo, akîmatemanga na akîmaruga, atakûmenya nî ndûî.

⁴⁰ Ndungata nîcievûrîre arathi acio irio icio marîe. Nwatî rîrîa maacamire irio icio, nîmaakaîre Elisha makîmwîra atîrî, “Ûûi, mûndû wa Ngai, irio ino nî ndûrû!” Na matiavota kûirîa.

⁴¹ Elisha nîwetirie mûtu, akîwîkîra nyûngûrî îo yarî na irio, agîcoka akîra ndungata ciîvûrîre arathi irio marîe. Vîndî îo irio itiarî ndûrû.

⁴² Vîndî îo mûndûmûrûme ûmwe nîwaumire Baali Shalisha avirîrîte Elisha mîgate mîrongo îîrî îrugîtwe na mûtu wa maciaro ma cairi ya mbere mwaka ûcio, na igira cia ngano ikethetwe warîo. Indo icio ciarî nguniarî. Nake Elisha nîwerire ndungata yake înengere arathi marîe.

⁴³ Nwatî ndungata yake nîyamûririe atîrî, “Irio ino nîikwîgana andû îgana rîmwe?” Nake Elisha nîwamwîrire atîrî, “Manengere marîe, nîûndû Ngai-Mûnene augîte, atî nîmarîa na matigarie.”

⁴⁴ Kwoguo ndungata îo nîyanengere arathi acio irio icio, na onthe nîmaarîre na igîtigara wata ûrîa Ngai-Mûnene aaugîte.