2Atha 3 - ÎVUKU RÎA ÛVORO MWARO

Mbaara ya Andû a Isiraeli na a Moabu

¹ Mwakarî wa îkûmi na înana Jehoshafati arî mûthamaki wa Juda, Jehoramu, mûvîcî wa Ahabu nîwatuîkire mûthamaki wa Isiraeli na akîathana arî Samaria îvinda rîa mîaka îkûmi na îîrî.

² Nîwevirie mbere ya Ngai-Mûnene, wana ethîrwa ndeevia mûno ta îthe kana ng'ina Jezebeli, nîûndû nîwacûkangirie mûvuanano wa Baali ûrîa îthe aarûthîte.

³ Nwatî nîwathiîre na mbere gwîka wîvia ûrîa wekagwa nî Jeroboamu, mûvîcî wa Nebati, ûndû ûrîa watûmire andû a Isiraeli mevie na ndaatigana naguo.

⁴ Mesha mûthamaki wa Moabu nîwaciarithanagia ng'ondu, na wa mwaka nîwaviraga tûori ngiri îgana rîmwe (100,000) twa ng'ondu, na guoya wa ng'ondu ngiri îgana rîmwe (100,000) kûrî mûthamaki wa Isiraeli îrî gooti.

⁵ Nwatî rîrîa Ahabu aakwire, mûthamaki wa Moabu nîwareganire na mûthamaki wa Isiraeli.

⁶ Kwoguo vîndî wa îo, mûthamaki Jehoramu nîwaumire Samaria na agîcokanîrîria athigari ake onthe.

⁷ Nîwatûmanire kûrî Jehoshafati, mûthamaki wa Juda akerwe atîrî, “Mûthamaki wa Moabu nîmûreganu nanie; nîûkwenda tûthiî nawe tûkarûe na andû a Moabu?” Nake mûthamaki Jehoshafati nîwacokirie atîrî, “Nîtûkûthiî; nie nawe tûrî kîndû kîmwe, andû akwa nwa ta andû aku, na mbarathi ciakwa nwa ta mbarathi ciaku.

⁸ Nîtûthiîrîra njîra îrîkû tûkîthiî kûtharîkîra?” Nake Jehoramu nîwamûcokerie atîrî, “Nîtûthiîrîra njîrarî ya werû wa Edomu.”

⁹ Kwoguo Jehoramu, mûthamaki wa Isiraeli nî maathiîre na mûthamaki wa Juda na wa Edomu. Vuva wa kûthiîrîra njîrarî yarî na ithioro nyîngî îvinda rîa mîthenya mûgwanja, manjî marîa maarî namo nîmaathirire. Kwoguo matiarî na manjî mangîanyuirwe nî athigari kana nyamû irîa maathiîte nacio.

¹⁰ Mûthamaki wa Isiraeli nîwaugire atîrî, “Aia! Anga Ngai-Mûnene atwîtîte tue athamaki athatû tûngane vamwe nîguo atûrekererie tûragwe nî andû a Moabu!”

¹¹ Mûthamaki Jehoshafati nîwaûririe atîrî, “Nîkwa gûtarî na mûrathi ava, ûrîa ûngîaria na Ngai-Mûnene vandûrî vetû?” Mûndû ûmwe wa ndungata cia mûthamaki wa Isiraeli nîwaugire atîrî, “Elisha mûvîcî wa Shafati arî ava. Nîke watuîkire mûrathi vuva wa Elija.”

¹² Jehoshafati nîwaugire atîrî, “Ke nî mûrathi wa ma.” Kwoguo mûthamaki wa Isiraeli, Jehoshafati na mûthamaki wa Edomu nî maathiîre kûrî Elisha.

¹³ Elisha nîwerire mûthamaki wa Isiraeli atîrî, “Nîngûtethia nîkî? Thiî kûrî arathi a aguo na nyûkwe.” Nwatî mûthamaki wa Isiraeli nîwacokerie Elisha atîrî, “Naarî! Nî Ngai-Mûnene ûtwîtîte vamwe tûrî athamaki athatû nîguo atûnenganîre kûrî mûthamaki wa Moabu.”

¹⁴ Nake Elisha nîwacokirie atîrî, “Wata ûrîa Ngai-Mûnene mwene vinya wonthe atûûraga mwoyo, na ûrîa ndungatagîra, tiga nîkwa nîratîîa Jehoshafati, mûthamaki wa Juda, nie nevîta atî ndingîevûgûra na kûrîa ûrî wana kana ngûrorie.

¹⁵ Nwatî rîu ndetereni mûvûri wa ngita.” Rîrîa mûvûri wa ngita aainire, vinya wa Ngai-Mûnene nîwatonyire kûrî Elisha,

¹⁶ na Elisha akiuga atîrî, “Ngai-Mûnene arauga atî, înjani marima Kîamndarî gîkî mecûre kuo,

¹⁷ mûtikoona mbura kana mwîgua rûkûngi, nîngwîcûria manjî marimarî ma ma manjî nîguo mue vamwe na ndîthia cienyu, na nyamû cienyu mûnyue.

¹⁸ Gaka nî kaûndû kanini mûno Ngai-Mûnene agîka. Wana nîakaamûvotithia kûvoota Amoabu.

¹⁹ Nîmûkegwatîra matûûra mao monthe marîa mairigîre vamwe na matûûra mao monthe marîa maro; nîmûgaatema mîtî yao yonthe ya matunda, mûthike ithima cionthe cia manjî, na mûcûkangie mîgûnda îrîa yonthe mînoru na njîra ya gwîcûria mathiga kuo.”

²⁰ Kîraûko kîu kîngî, vîndî îrîa îgongoona rîrutagwa, manjî nîmaaumire mwena wa Edomu na magîcûra vûrûrirî ûcio.

²¹ Rîrîa Amoabu onthe meegwire atî athamaki acio athatû nîmaathiîte kûmatharîkîra, arûme onthe arîa mangîavotire gûkuua indo cia mbaara, kwambîrîria ûrîa ûtanathiî mbaararî nginya ûrîa ûtwîre athiîcaga mbaararî nîmeetirwe na makigwa mûvakarî wa vûrûri wao.

²² Rîrîa Amoabu maaramûkire kîraûko tene mûthenya ûcio warûmîrîrîte, nîmoonire riûa rîmûrîkîte manjî, namo manjî makonekaga matunîvîte ta nthakame.

²³ Nao nîmaaugîrîrie atîrî, “Îno nî nthakame! Nama, athamaki acio athatû nîmarûîte na makaûragana o ene! Tûthiîni tûgatave indo ciao!”

²⁴ Nwatî rîrîa Amoabu maathiîre kûrîa andû a Isiraeli maambîte magema mao, andû a Isiraeli nîmaatharîkîre Amoabu nginya makîûra. Andû a Isiraeli nîmaarûmîrîrie Amoabu wa makîmaûragaga,

²⁵ na magîcûkangia matûûra mao marîa maro. Rîrîa maavîtûkagîrîra mîgûndarî îrîa mînoru, andû onthe a Isiraeli nîmaaikirie mathiga mîgûndarî îo, nginya mûthiiarî vûrûri ûcio ûkîthîrwa wîcûrîte mathiga, nîmaacokire makîthika ithima cionthe cia manjî na magîtema mîtî yonthe ya matunda. Mûthiiarî îtûûra rînene rîa Kiri Heresi nîrîo tu rîatigarire, nao andû arîa maaikagia mathiga na ikûtha nîmaarîthiûrûrûkîrie na makîrîgwatîra.

²⁶ Rîrîa mûthamaki wa Moabu aamenyire atî nîakûvootwa mbaararî, nîwocire arûme magana mûgwanja (700) arîa maarûaga na mviû na makîgeria kûûrîra kûrî mûthamaki wa Edomu, nwatî matiavota.

²⁷ Nîwacokire agîoca îrikithathi rîake rîa kavîcî ûrîa warî atuîke mûthamaki vuva wake na akîmûrutîra îgûrû rîa rûthingo rwa îtûûra kûrî ngai ya Moabu rîrî îtega rîa kûvîvua. Andû a Isiraeli nîmaarakarire mûno: kwoguo nîmaaumire kûu îtûûrarî na magîcoka vûrûrirî wao.