2Atha 25 - ÎVUKU RÎA ÛVORO MWARO

Jerusalemu nîyacûkangirue

¹ Mûthenyarî wa îkûmi, mweri wa îkûmi mwakarî wa kenda, Zedekia arî mûthamaki, Nebukadinezarû mûthamaki wa Babuloni nîwathiîre na athigari ake onthe na makîtharîkîra îtûûra rîa Jerusalemu na magîtuma rûthingo marîthiûrûrûkîrîtie.

² Kwoguo îtûûra rîu nîrîarigicîrue nginya mwakarî wa îkûmi na ûmwe Zedekia arî mûthamaki.

³ Mûthenyarî wa kenda, mwerirî wa kana mwakarî wa ûcio, yûra nîrîanenevire mûno îtûûrarî rîu nginya gûgîtura kîndû andû mangîrîa vûrûrirî.

⁴ Rûthingo rwa îtûûra nî rwomorirwe mwena ûmwe na mûthamaki vamwe na athigari onthe a mbaara nîmaaûrire ûtukû mavîtûkîrîrîte mûgûndarî wa mûthamaki. Maavîtûkîrîre kîvingorî kîrîa Kîamrî gatagatî ka nthingo igîrî, na nîmaathiîre merekerete mwena wa Araba, wana ethîrwa athigari a Babuloni nîmaarigicîrîtie îtûûra.

⁵ Nwatî athigari a mbaara a Babuloni nîmaarûmîrîrie mûthamaki Zedekia na nîmaamûkinyîrîre kûndû kûrîa kwaraganu kûu Jeriko. Nao athigari ake onthe nîmaanyaganirie makîmûtiga.

⁶ Athigari acio nîmaanyitire Zedekia na makîmûvira kûrî mûthamaki Nebukadinezarû, ûrîa vîndî îo warî îtûûrarî rî Ribula. Nebukadinezarû nîwamûtuîrîre arî kûu.

⁷ Nîmaaûragire anake a Zedekia akîyonagîra na metho make ke mwene, magîcoka makîmûkûûra metho na mûthiiarî nîmaamwovire na mvîngû na makîmûvira Babuloni.

Kwomomorwa kwa hekarû

⁸ Mûthenya wa mûgwanja mweri wa gatano, mwakarî wa îkûmi na kenda Nebukadinezarû arî mûthamaki wa Babuloni, Nebuzaradani, ndungata ya mûthamaki ûrîa warî mûnene wa athigari a mbaara a mûthamaki nîwathiîre Jerusalemu.

⁹ Nîwavîvirie hekarû, nyomba ya mûthamaki na nyomba cionthe cia Jerusalemu. Nyomba cionthe nene îtûûrarî nîciavîvirue.

¹⁰ Athigari onthe a Babuloni arîa maarî vamwe na Nebuzaradani mûnene wa athigari nîmoomomorire nthingo irîa ciathiûrûrûkîrîtie Jerusalemu.

¹¹ Nebuzaradani nîwacokire akînyita andû onthe arîa maatigîtwe îtûûrarî vamwe na andû arîa maathiîte na makerekereria kûrî mûthamaki wa Babuloni na akîmavira îthamîriorî.

¹² Nwatî nîwatigire andû amwe arîa maarî athîni mûno kûu Juda nîguo mamenyagîrîre mîthabivû na marutage wîra mîgûndarî.

¹³ Andû a Babuloni nîmoomomorire itugî cia cuuma ya gîcango irîa ciarî hekarûrî vamwe na inyamû irîa ciekariî ta ikaari na îtangi rîa cuuma ya gîcango, na makîvira cuuma cionthe cia gîcango Babuloni.

¹⁴ Nîmaakuire nyûngû, iciko cia mûthetu, tûnyamû twa gûtinia ndambi cia taa, mbakûri cia gwîkîra ûbani na indo cionthe cia gîcango irîa ciatûmagîrwa hekarûrî,

¹⁵ na magîkuua tûraî twa mwaki na mbakûri. Nebuzaradani nîwakuuire indo irîa ciarûthîtwe na sîlûva na thaavu.

¹⁶ Gîcango Kîam indo cionthe irîa ciarûthîtwe nî Solomoni cia gûtûmagîrwa hekarûrî gîtingîathimîkire ûrito wa kîo.

¹⁷ Itugî cioîrî nîcieganene: Wa kîmwe Kîamrî na ûraca na îgûrû wa mita inyanya, na gîkunîko Kîam ûraca na îgûrû wa mita îmwe na cendimita mîrongo îthatû. Ikunîko cioîrî ciagemetue na mîvuano ya ngûngûmanga cia gîcango.

Andû a Juda nîmaavirirwe Babuloni

¹⁸ Nebuzaradani, mûnene wa arangîri a mûthamaki nîwanyitire Seraia, mûthînjîri-Ngai mûnene na Zefania, mûthînjîri-Ngai mûtethereria wa Mûthînjîri-Ngai mûnene vamwe wa arangîri engî athatû a kîvingo marî mîgwate.

¹⁹ Nîwanyitire mûndû ûmwe kûu îtûûrarî, ûrîa warî mûnene wa athigari a mbaara, vamwe na andû atano a vata a mûthamaki arîa eethîrîrie îtûûrarî, na mwandîki wa mûnene wa athigari a mbaara arîa maarangagîra andû a vûrûri, na andû mîrongo îtandatû arîa eethîrîrie îtûûrarî rîa Jerusalemu.

²⁰ Nebuzaradani, mûnene wa arangîri nîwocire andû acio na akîmavira kûrî mûthamaki wa Babuloni kûu Ribula.

²¹ Nebukadinezarû nîwarivire andû acio na akîmaûragîra kûu Ribula vûrûrirî wa Hamathi. Kwoguo andû a Juda nîmaarutirwe vûrûrirî wao na makîvirwa îthamîriorî.

Gedalia mûthamaki wa Juda

²² Nebukadinezarû, mûthamaki wa Babuloni nîwathuurire Gedalia mûvîcî wa Ahikamu atuîke mûnene wa andû onthe arîa maatigîtwe vûrûrirî wa Juda. Ahikamu aarî mûvîcî wa Shafani.

²³ Rîrîa anene onthe a athigari a mbaara meegwire atî Nebukadinezarû nîwathuura Gedalia atuîke mûthamaki, nîmaathiîre kûrî Gedalia kûu Mizipa. Anene acio maarî: Ishumaeli mûvîcî wa Nethania, Johanani mûvîcî wa Karea, na Seraia mûvîcî wa Tanihumethi wa kuuma Tofathi, na Jazania mûvîcî wa mûndû wa kuuma Maaka.

²⁴ Gedalia nîwerîre anene acio na athigari ao na mwîvîtwa atîrî, “Mûtikamake nî athigari a Akalidei. Îkarani vûrûrirî ûyû, mûtungatîre mûthamaki wa Babuloni, na mûtikoona thîna.”

²⁵ Nwatî mwerirî wa mûgwanja (7), Ishumaeli mûvîcî wa Nethania wa kuuma nyombarî ya mûthamaki nîwathiîre Mizipa na athigari îkûmi na akîtharîkîra Gedalia na akîmûraga vamwe na Ayahudi na Akalidei arîa maarî nake kûu Mizipa. Nethania aarî mûvîcî wa Elishama.

²⁶ Andû onthe a Isiraeli, arîa anini na arîa anene, vamwe na anene a athigari nîmaacokire makiuma kûu na makîthiî Misiri, nîûndû nîmeetigagîra Akalidei.

Jehoiakini nîwarekererue kuuma Njera

²⁷ Mwakarî ûrîa Evilimerodaki aatuîkire mûthamaki wa Babuloni, nîwaeguîrîre Jehoiakini mûthamaki wa Juda ntha na akîmûrekereria kuuma njera. Mûthenya wa mîrongo îîrî na mûgwanja (27) wa mweri wa îkûmi na îîrî mwaka wa mîrongo îthatû na mûgwanja kuuma Jehoiakini avirwa îthamîriorî nîrîo aarekereerue kuuma njera.

²⁸ Evilimerodaki nîwarîrie Jehoiakini waro na akîmûnenevia gûkîra athamaki arîa engî maarî nake îthamîriorî kûu Babuloni.

²⁹ Kwoguo Jehoiakini nîwarutire nguo ciake cia njera na kuuma vîndî îo nîwatûûrire arîcanagîra na mûthamaki.

³⁰ Jehoiakini nîwavecagwa wa mûthenya kîrîa aavataraga nî mûthamaki ûtûûrorî wake wonthe.