2Atha 24 - ÎVUKU RÎA ÛVORO MWARO

¹ Vîndî wa îo Jehoiakimu aarî mûthamaki, Nebukadinezarû, mûthamaki wa Babuloni nîwatharîkîre Juda, na Jehoiakimu agîtuîka ndungata yake îvinda rîa mîaka îthatû (3). Nîwacokire akîregana nake.

² Ngai-Mûnene nîwacokire agîtûma ikundi cia andû marî na indo cia mbaara kuuma Babuloni, Sîria, Moabu, na Aamoni mathiî makerwe na Jehoiakimu na macûkangie Juda, wata ûrîa Ngai-Mûnene aaugîte na njîra ya ndungata ciake arathi.

³ Ngai-Mûnene nîke wathanire ûndû ûcio wîkîke kûrî Juda, nîguo athirie andû a Juda nîûndû wa mevia monthe marîa mûthamaki Manase eekîte,

⁴ na makîria nîûndû wa andû onthe arîa aaûragîte matarî na mavîtia. Ngai-Mûnene ndangîoveere Manase nîûndû wa ûguo.

⁵ Maûndû mengî monthe marîa Jehoiakimu eekire nîmandîke Îvukuurî rîa Maûndû ma Tene ma Athamaki Juda.

⁶ Kwoguo Jehoiakimu nîwakwire, nake mûvîcî Jehoiakini nîwatuîkire mûthamaki vuva wake.

⁷ Mûthamaki wa Misiri ndaauma rîngî vûrûrirî wake, nîûndû mûthamaki wa Babuloni nîwocete vûrûri wonthe ûrîa warî wa mûthamaki wa Misiri, kuuma karûnjîrî ka Misiri nginya rûnjîrî rwa Farati.

Jehoiakini Mûthamaki wa Juda

⁸ Jehoiakini aarî na ûkûrû wa mîaka îkûmi na înana (18) rîrîa aatuîkire mûthamaki wa Juda, na nîwathanire arî Jerusalemu îvinda rîa mîeri îthatû (3). Ng'ina eetagwa Nehushita, mwarî wa Elinathani, kuuma Jerusalemu.

⁹ Jehoiakini nîwekire maûndû marîa mataakenagia Ngai-Mûnene, wata marîa monthe meekîtwe nî îthe.

¹⁰ Vîndî ya ûthamaki wake nîrîo Nebukadinezarû, mûthamaki wa Babuloni na athigari ake a mbaara maathiîre kûtharîkîra Jerusalemu na makîrigicîria îtûûra rîu.

¹¹ Rîrîa athigari a Nebukadinezarû maarigicîîrie Jerusalemu, Nebukadinezarû ke mwene nîwatonyire îtûûrarî rîu.

¹² Jehoiakini, mûthamaki wa Juda, ng'ina, anake ake, athigari ake, wana ndungata cia nyomba yake nîmerekererie kûrî mûthamaki wa Babuloni. Jehoiakini aanyitirwe mûgwate mwakarî wa kanana (8) Nebukadinezarû arî mûthamaki wa Babuloni.

¹³ Nîwacokire agîkuua indo cionthe irîa ciarî hekarûrî na îrîa ciarî nyombarî ya mûthamaki na akîivira Babuloni. Nebukadinezarû nîwacûkangirie indo cionthe cia thaavu irîa ciarî hekarûrî irîa Solomoni, mûthamaki wa Isiraeli aatumîte. Ûndû ûcio wekîkire wata ûrîa Ngai-Mûnene aaugîte.

¹⁴ Nebukadinezarû nîwathiîre na andû onthe a Jerusalemu marî mîgwate: nao maarî anene onthe na arûme onthe arîa maarî njamba. Onthe maarî andû ngiri îkûmi (10,000). Nîwathiîre na andû onthe arîa maarî na ûûgî wa kûruta wîra, na arîa maaturaga indo cia cuuma. Gûtirî mûndû watigirwe Juda tiga andû arîa maarî athîni.

¹⁵ Nebukadinezarû nîwavirire Jehoiakini Babuloni vamwe na ng'ina, aka ake, ndungata ciake, na atongoria a vûrûri wa Juda, marî mîgwate.

¹⁶ Mûthamaki wa Babuloni nîwanyitire andû onthe a vata na akîmavira Babuloni marî mîgwate. Onthe maarî andû ngiri mûgwanja (7,000) na andû ngiri îmwe (1,000) arîa maarî na ûûgî wa kûruta wîra, wana andû arîa maaturaga indo cia cuuma, na arûme onthe arîa maarî na vinya na agîrîru a kûrûa.

¹⁷ Nebukadinezarû nîwatuire Matania mûthamaki wa Juda na akîmûcenjeria rîîtwa akîmwîta Zedekia. Matania aarî mamawe wa Jehoiakini.

Zedekia mûthamaki wa Juda

¹⁸ Zedekia aarî na ûkûrû wa mîaka mîrongo îîrî na ûmwe (21) rîrîa aatuîkire mûthamaki wa Juda, na nîwathanire arî Jerusalemu îvinda rîa mîaka Îkûmi na ûmwe (11). Ng'ina eetagwa Hamutali, mwarî wa Jeremia, kuuma îtûûrarî rîa Libuna.

¹⁹ Mûthamaki Zedekia nîwekire maûndû marîa mataakenagia Ngai-Mûnene, wata marîa meekîtwe nî mûthamaki Jehoiakimu.

²⁰ Ngai-Mûnene nîwarakarirue mûno nî andû a Jerusalemu na a Juda nginya akîmengata. Zedekia nîwareganire na mûthamaki wa Babuloni.