2Atha 22 - ÎVUKU RÎA ÛVORO MWARO

Josia mûthamaki wa Juda

¹ Josia aarî na ûkûrû wa mîaka înana (8) rîrîa aatuîkire mûthamaki wa Juda, na nîwathanire arî Jerusalemu îvinda rîa mîaka mîrongo îthatû na ûmwe (31). Ng'ina eetagwa Jedida, mwarî wa Adaia wa kuuma îtûûrarî rîa Bozikathi.

² Josia nîwekire maûndû monthe marîa maakenagia Ngai-Mûnene: nîwarûmîrîre mîthiîre ya îthe Daudi, na nîwavingagia mawatho monthe ma Ngai akindîrîtie.

Îvuku rîa watho nîrîonekire

³ Mwakarî wa îkûmi na înana (18) Josia arî mûthamaki, nîwatûmire mwandîki Shafani, mûvîcî wa Azalia, Azalia mûvîcî wa Meshulamu hekarûrî na akîmwîra atîrî,

⁴ “Thiî kûrî Hilikia, mûthînjîri-Ngai mûnene ûmwîre atare mbeca irîa arangîri a hekarû maûnganîtie kuuma kûrî andû.

⁵ Ûmwîre anenganîre mbeca icio kûrî andû arîa marûngamîrîrîte wîra wa gûcokereria hekarû nîguo nao marîve andû arîa mararuta wîra ûcio.

⁶ Mbeca icio nî cia kûgûra mbaû, mathiga ma gûtuma hekarû kûrîa kûtharûku, na kûrîva andû arîa marutaga wîra wa mbaû, atumi na andû arîa maumagia mathiga.

⁷ Andû arîa marûngamîrîrîte wîra wa gûcokereria hekarû nî evokeku, kwoguo gûtirî vata wa kûmaûria ûrîa matûmîrîte mbeca.”

⁸ Hilikia, mûthînjîri-Ngai mûnene nîwerire Shafani ûrîa warî mwandîki atîrî, “Nîmonire îvuku rîa watho hekarûrî ya Ngai-Mûnene.” Hilikia nîwacokire akînengera Shafani îvuku rîu, nake akîrîthoma.

⁹ Shafani nîwacokire rîngî kûrî mûthamaki na akîmwîra atîrî, “Ndungata ciaku nîciocire mbeca irîa ciocanirue kîvingorî Kîam hekarû na mainenganîra kûrî andû arîa marûngamagîrîra wîra wa gûtuma hekarû kûrîa kûtharûku.”

¹⁰ Nîwacokire akîra mûthamaki atîrî, “Mûthînjîri-Ngai Hilikia nîwanengerire îvuku.” Nake Shafani nîwathomere mûthamaki îvuku rîu.

¹¹ Rîrîa mûthamaki eegwire ûrîa îvuku rîa watho rîaugaga, nîwatembûrangire nguo ciake,

¹² na akîatha mûthînjîri-Ngai Hilikia, Ahikamu mûvîcî ma Shafani, Akibori mûvîcî wa Mikaia, Shafani mwandîki, na Asaia ndungata ya mûthamaki akîmeera atîrî,

¹³ “Thiîni mûkaûrie Ngai-Mûnene vandûrî vakwa, na vandûrî va andû onthe a Juda ûvoro wîgiî mandîko ma îvuku rîîrî rîronekire, nîûndû Ngai-Mûnene nîmûrakaru mûno nîtue nîûndû methe metû matiavingia maûndû monthe marîa matwîgiî kûringana na ûrîa îvuku rîîrî riugîte.”

¹⁴ Kwoguo mûthînjîri-Ngai Hilikia, Ahikamu, Akibori, Shafani, na Asaia nîmaathiîre kûrî mûndûmûka ûmwe mûrathi wetagwa Hulida, mûka wa Shalumu, mûvîcî wa Tikiva. Tikiva aarî mûvîcî wa Harihasi. Harihasi nîke wamenyagîrîra nguo cia hekarû. Vîndî îo Hulida aatûûraga Jerusalemu, îtûûrarî rîa kaîrî. Nao nîmaaranîrie nake,

¹⁵ na nîwamerire macoke kûrî mûthamaki na mamwîre

¹⁶ Ngai-Mûnene augîte atîrî, “Nîngûretithîria kûndû gûkû na andû arîa matûûraga kuo maûndû macûku, wata ûrîa îvuku riugîte rîrîa mûthamaki wa Juda athoma.

¹⁷ Nîmandiganîrîtie na nîmarutîrîte ngai ciîngî magongoona na kwoguo nîmandakarîtie nî maûndû monthe marîa mekîte. Nîûndû wa ûguo, nîndakarîtue nî Jerusalemu na marakara makwa matingîthira.

¹⁸ Nwatî thiîni kûrî mûthamaki wa Juda ûrîa ûramûtûmire mûgatuîrie ûvoro kûrî Ngai-Mûnene mûmwîre Ngai-Mûnene Ngai wa Isiraeli augîte atî; kûringana na ndûmîrîri îrîa eguîte,

¹⁹ mûthamaki wa Juda nîareririre na enyivia mbere ya Ngai-Mûnene, na atembûranga nguo ciake. Rîrîa aregwire ûrîa mbugîte nîngwîka kûndû gûkû vamwe na andû arîa matûûraga kuo, na atî vûrûri ûyû nîûtûûra ûrî mûrume na ûrî îganjo. Nie Ngai-Mûnene nîmbîguîte îvoya rîaku,

²⁰ kwoguo ndikaaverithia Jerusalemu wî mwoyo. Nîngaamba gweterera ûkue na thayû.” Andû acio nîmaacokerie mûthamaki Josia ndûmîrîri îo.