2Atha 21 - ÎVUKU RÎA ÛVORO MWARO

Manase mûthamaki wa Juda

¹ Manase aarî na ûkûrû wa mîaka îkûmi na îîrî (12) rîrîa aatuîkire mûthamaki wa Juda, na aathanire arî Jerusalemu îvinda rîa mîaka mîrongo îtano na îtano (55). Ng'ina etagwa Hefiziba.

² Manase nîwekire maûndû marîa mataakenagia Ngai-Mûnene, na kûrûmîrîra maûndû marîa meekagwa nî andû a mavûrûri marîa Ngai-Mûnene engataga, nao andû a Isiraeli magîtonyaga kuo.

³ Nîwatumire rîngî kûndû gwa kûgoocagîrwa ngai cia mîvuanano kûrîa îthe Hezekia aacûkangîtie; nîwatumire metha cia magongoona cia Baali na akîrûtha mûvuanano wa ngai ya nga ya Ashera, ta ûrîa Ahabu mûthamaki wa Isiraeli eekîte. Makîria ya ûguo, Manase nwa wagoocaga ciûmbe cionthe cia îgûrû na agaitungatîra.

⁴ Nîwatumire metha cia kîgongoona hekarûrî ndaarî, kûrîa Ngai-Mûnene aaugîte atîrî, “Rîîtwa rîakwa rîkaagocagîrwa Jerusalemu.”

⁵ Nîwatumire metha cia kîgongoona cia kûgoocagîra ciûmbe cia îgûrû ivaarorî igîrî cia hekarû ya Ngai-Mûnene.

⁶ Nîwarutire mûvîcî îgongoona arî îtega rîa kûvîvua. Nîwaragûranagîra, akaringa ciama na akanyitanîra na ago na arogi. Nîwekîre maûndû mengî mûno macûku na agîtûma Ngai-Mûnene arakare.

⁷ Nîwaigire mûvuanano wa ngai ya ngai ya Ashera hekarûrî, kûrîa Ngai-Mûnene eerîte Daudi na mûvîcî Solomoni atîrî, “Hekarûrî îno gûkû Jerusalemu, nîkuo nthurîte kuuma kûrî mîvîrîga yonthe ya Isiraeli na nîkuo ngûtûûra ngoocagîrwa.

⁸ Ethîrwa andû a Isiraeli makathîkagîra maathani makwa monthe na mavingagie mawatho monthe marîa ndungata yakwa, Musa aamaveere ndikaamarekereria maûrûre rîngî kuuma vûrûrirî ûrîa naveere methe mao.”

⁹ Nwatî andû a Juda matiathîkîra Ngai-Mûnene, na Manase nîwatûmire meke mevia manene mûno wana gûkîra marîa mekîtwe nî andû arîa Ngai-Mûnene engataga wa ûrîa andû a Isiraeli maatonyaga vûrûrirî.

¹⁰ Ngai-Mûnene nîwaririe na njîra ya ndungata ciake, arathi akiuga atîrî,

¹¹ “Rîu nîûndû Manase, mûthamaki wa Juda nîwîkîte maûndû mama macûku, na ageka maûndû macûku wana gûkîra marîa monthe meekirwe nî Amori, arîa maarî mbere yake, na agatûma andû a Juda mevie magîtûmîra mîvuanano yake;

¹² kwoguo Nie, Ngai-Mûnene Ngai wa Isiraeli nîndetere Jerusalemu na Juda ûndû mûcûku nginya atî mûndû wa wonthe ûkeegua ûvoro ûcio nîakaamaka.

¹³ Ngaaverithia Jerusalemu ta ûrîa nekire Samaria, na Ahabu mûthamaki wa Isiraeli na njiarwa ciake. Ngaathambia Jerusalemu ta ûrîa mûndû athambagia thaani akamîgiria na akamînamia.

¹⁴ Nîngaatiganîria andû akwa arîa magaatigara na nîmanenganîre kûrî nthû ciao, na nîikaamavoota na imatue mîgwate kûrî nthû ciao cionthe.

¹⁵ Ngaameka maûndû mau monthe nîûndû nîmamvîtîrîtie na nîmaandakaririe kuuma rîrîa methe mao maaumire Misiri nginya ûmûnthî.”

¹⁶ Makîria ya ûguo, Manase nîwaûragire andû eengî mûno mataarî na mavîtia nginya nthakame îgîcûra Jerusalemu kuonthe; gûtaranîria na ûrîa aatûmire andû a Juda magooce mîvuanano îrîa yatûmire mevie mbere ya Ngai-Mûnene.

¹⁷ Maûndû mengî monthe marîa Manase eekîre, vamwe na mevia marîa eekire nîmandîke Îvukuurî rîa Maûndû ma Tene ma Athamaki Juda.

¹⁸ Manase nîwakwire na akîthikwa vakuvî na nyomba yake, mûgûndarî wa Uza. Nake mûvîcî Amoni nîwatuîkire mûthamaki vuva wake.

Amoni mûthamaki wa Juda

¹⁹ Amoni aarî na ûkûrû wa mîaka mîrongo îîrî na îîrî (22) rîrîa aatuîkire mûthamaki wa Juda, na nîwathanire arî Jerusalemu îvinda rîa mîaka îîrî (2). Ng'ina etagwa Meshulemethi, mwarî wa Haruzi wa kuuma îtûûrarî rîa Jotiba.

²⁰ Amoni nîwekire maûndû marîa mataakenagia Ngai-Mûnene, wata ûrîa îthe, Manase eekîte.

²¹ Nîwekire maûndû monthe marîa mekagwa nî îthe na nîwatungatagîra na akagooca mîvuanano îrîa îthe aagoocaga.

²² Nîwatiganîrie Ngai-Mûnene, Ngai wa methe make, na akîrega kûrûmîrîra maathani ma Ngai-Mûnene.

²³ Ndungata cia Amoni nîciavangire ûrîa ikûmûraga na nîciamûragîre nyomba gwake.

²⁴ Nwatî andû a Juda nîmaaûragire andû onthe arîa maaûragire mûthamaki Amoni na magîtua mûvîcî Josia mûthamaki vuva wake.

²⁵ Maûndû mengî monthe marîa Amoni eekire nîmandîke Îvukuurî rîa Maûndû ma Tene ma Athamaki a Juda.

²⁶ Amoni nîwathikirwe mbîrîrarî yake, mûgûndarî wa Uza, nake mûvîcî Josia nîwatuîkire mûthamaki vuva wake.