2Atha 20 - ÎVUKU RÎA ÛVORO MWARO

Kûrwara kwa mûthamaki Hezekia

¹ Kavindarî wa kau Hezekia nîwarwarire na aarî vakuvî gûkua. Mûrathi Isaia, mûvîcî wa Amozu nîwathiîre kûrî ke na akîmwîra atîrî. “Ngai-Mûnene akwîra wîgae, nîûndû tîûvora, nîûgûkua.”

² Hezekia nîwevûgûrire akîroria rûthingorî na akîvoya Ngai-Mûnene akîugaga atîrî,

³ “We Ngai-Mûnene nakûthaitha ûririkane ûrîa ngûtungatîrîte na wîvokeku na ngoro yonthe, na vîndî cionthe mbîkaga maûndû marîa magûkenagia.” Nîwacokire akîrîra arî na ûrûrû mwîngî mûno.

⁴ Isaia nîwatigire mûthamaki, nwatî mbere ya auma nja ya kwa mûthamaki, Ngai-Mûnene nîwamwîrire atîrî,

⁵ “Coka kûrî Hezekia, mûtongoria wa andû a Ngai-Mûnene Ngai wa aguo Daudi, ûkamwîre nînegua îvoya rîaku na nînona methori maku. Nîngûkûvonia, na vuva wa mîthenya îthatû nîûkaathiî hekarûrî.

⁶ Nîngûkwongerera mîaka îkûmi na îtano (15) ûtûûrorî waku, na nîngûkûvonokia na mvonokie îtûûra rîîrî rîa Jerusalemu kuuma kûrî mûthamaki wa Asîria. Nîngûrûîrîra îtûûra rîîrî nîûndû wakwa nie mwene, na nîûndû wa ndungata yakwa Daudi.”

⁷ Isaia nîwaugire atîrî, “Indeni geki ya ngûû, na mwigîrîre îvûvarî na nîakûvona.”

⁸ Mûthamaki Hezekia nîwaûririe Isaia atîrî, “Nîngîmenya na ndûî, atî Ngai-Mûnene nîakûmvonia, na atî vuva wa mîthenya îthatû nîngaathiî hekarûrî?”

⁹ Nake Isaia nîwacokirie atîrî, “Ngai-Mûnene nîagûkwonia kîrîa gîgaakûmenyithia atî nîakûvingia kîîranîro gîake. Ûngîenda kîruru kîracave na mbere makinyo îkûmi kana ûngîenda kîracave na vuva makinyo îkûmi?”

¹⁰ Nake Hezekia nîwacokirie atîrî, “Nî ûndû mûvûthû kûracavia kîruru na mbere makinyo îkûmi! Tiga gîcoke vuva makinyo îkûmi.”

¹¹ Mûrathi Isaia nîwavoire Ngai-Mûnene, na Ngai-Mûnene nîwaracavirie kîruru na vuva makinyo îkûmi ngathîrî îrîa yatumîtwe nî mûthamaki Ahazi.

Anjaama kuuma Babuloni

¹² Vîndî îo, mûthamaki wa Babuloni, Merodaki-baladani, mûvîcî wa Baladani nîwegwire atî mûthamaki Hezekia nî mûrwaru. Kwoguo nîwatûmire anjaama mamûvirîre ndûmîrîri ya kûmûmîrîria vamwe na kîveo.

¹³ Hezekia nîwanyitire anjaama acio ûgeni na akîmonia ûtonga wake. Ûtonga ûcio warî; sîlûva, thaavu, tûnyamû tûnungi waro, maguta ma goro, nyomba îrîa aigaga indo ciake cionthe cia mbaara na indo cionthe irîa ciarî makûmbîrî make. Gûtirî kîndû wanarî kîmwe Kîamrî nyombarî yake kana ûthamakirî wake ataamoonia.

¹⁴ Mûrathi Isaia nîwacokire akîthiî kûrî mûthamaki Hezekia na akîmûria atîrî, “Andû aya maaumîte kû, na marakwîrire atîa?” Nake Hezekia nîwacokirie atîrî, “Maaumîte Babuloni, vûrûri wa kûraca”

¹⁵ Mûrathi Isaia nîwamûûririe atîrî, “Moonire ndûî nyombarî yaku?” Nake Hezekia nîwacokirie atîrî, “Nîmoonire indo cionthe îrîa irî nyombarî yakwa. Gûtirî kîndû wanarî kîmwe kîrî makûmbîrî makwa ndaamoonia.”

¹⁶ Isaia nîwacokire akîra mûthamaki Hezekia atîrî, “Ngai-Mûnene augîte atî,

¹⁷ kavinda nî gagûkinya, rîrîa indo cionthe icio irî nyombarî yaku, na indo cionthe irîa methe menyu maûnganîtie nginya ûmûnthî igaakuua ivirwe Babuloni. Gûtirî wanarî kîndû kîmwe gîgaatigwa. Ûguo nîguo Ngai-Mûnene augîte.

¹⁸ Anake amwe aku, arîa ûciarîte we mwene nîmakaathiîwa nao na matuwe ngaramba nîguo matungatage mûciî kwa mûthamaki wa Babuloni.”

¹⁹ Mûthamaki Hezekia nîwacokirie atîrî, “Ndûmîrîri ya Ngai-Mûnene îo wambîra nî mbaro.” Aaugire ûguo nîûndû eciririe atî gûkethîrwa kûrî na thayû na ûgitîri ûtûûrorî wake wonthe rîrîa akethîrwa arî mûthamaki.

Mûthiia wa ûthamaki wa Hezekia

²⁰ Maûndû mengî monthe marîa Hezekia eekire, ciîko ciake cia ûcamba, na ûrîa enjire karia ka manjî na akînja mûtaro wa kûvira manjî îtûûrarî rînene, nîmandîke Îvukuurî rîa Maûndû ma Tene ma Athamaki Juda.

²¹ Hezekia nîwakwire, nake mûvîcî Manase agîtuîka mûthamaki vuva wake.