2Atha 19 - ÎVUKU RÎA ÛVORO MWARO

Mûthamaki Nîwaûririe ûtaaro kûrî Isaia

¹ Rîrîa mûthamaki Hezekia eegwire ûrîa mûnene wa Asîria aaugîte, nîwatembûrire nguo ciake na marûrû, nîwekîrîre nguo ya macakaya na akîthiî hekarûrî ya Ngai-Mûnene.

² Nîwatûmire Eliakimu, mûmenyereri wa mûciî wa mûthamaki, Shebuna, mwandîki, na athînjîri-Ngai arîa akûrû, kûrî mûrathi Isaia, mûvîcî wa Amozu. Wanao meekîrîte nguo cia macakaya.

³ Ndûmîrîri îrîa Hezekia aamaveere mavirîre mûrathi Isaia yaugaga atîrî, “Hezekia auga atî, ûmûnthî nî mûthenya wa kîeva, nî mûthenya wa kûrumwa na kûnyararwa. Twîkariî ta mûndûmûka akîenda gûciara nwatî ndarî na vinya wa gûciara.

⁴ Nwa kwîthîrwe atî, Ngai-Mûnene Ngai waku nîwegwire maûndû monthe ma kûthekerera Ngai ûrîa ûtûûraga mwoyo marîa mûthamaki wa Asîria aatûmîte ndungata yake. Ngai-Mûnene Ngai waku aroîgua irumi icio na averithie acio marumanîte. Kwoguo voerani andû arîa matigarîte.”

⁵ Rîrîa ndungata cia mûthamaki Hezekia ciakinyire kûrî Isaia,

⁶ Isaia nîwamerire atîrî, “Ngai-Mûnene amwîrîte mûtikamake nîûndû wa ûguo mûregua ndungata cia mûthamaki ikînuma.

⁷ Taroria, kûrî ûvoro ngûtûma mûthamaki wa Asîria egue na ûtûme acoke vûrûrirî wake, na kûu nîkuo ngaatûma aûragîrwe.”

Andû a Sîria nîmaatharîkîre Jerusalemu rîngî

⁸ Rîrîa Rabushake eegwire atî mûthamaki wa Asîria nîwaumîte Lakishi, nîwathiîre na akîmwîthîra akîrûaga na andû a îtûûra rînene rîa Libuna.

⁹ Rîrîa mûthamaki wa Asîria eegwire atî athigari a mbaara a Kushi matongoretue nî mûthamaki Tirihaka, nîmaaûkîte kûmatharîkîra, nîwatûmire anjaama rîngî kûrî Hezekia, mûthamaki wa Juda

¹⁰ makamwîre atîrî, “Ndûgetîkîre Ngai waku ûrîa wîvokaga îkûveenie atî, Jerusalemu tîîvootwa nî mûthamaki wa Asîria.

¹¹ We nîwîguîte ûrîa athamaki a Asîria macûkangîtie mavûrûri monthe viû. We ûreciria nîûkûvonoka?

¹² Methe makwa nîmaacûkangirie andû a mavûrûri ma Gozani, Harani, na Rezefu na makîûraga andû onthe a Edeni arîa maatûûraga Telasari. Maaregire kûvonokua nî ngai icio nîkî?

¹³ Athamaki a Hamathi, Aripadi, mûthamaki wa îtûûra rînene rîa Sefarivaimu, na mûthamaki wa Hena na Iva marî kû?”

¹⁴ Mûthamaki Hezekia nîwocire maarûa kuuma kûrî anjaama acio na akîmîthoma. Nîwacokire akîthiî nayo hekarûrî ya Ngai-Mûnene na akîmîtambûrûkia mbere ya Ngai-Mûnene.

¹⁵ Mûthamaki Hezekia nîwavoire atîrî, “We Ngai-Mûnene Ngai wa Isiraeli, we wîkarîte gîtîrî gîaku Kîam ûthamaki îgûrû rîa Akerubi, we wenga tu nîwe Ngai, we nîwe Ngai wa mothamaki monthe ma nthî. We nîwe waûmbire nthî na îgûrû.

¹⁶ Vingûra metho maku we Ngai-Mûnene, na ûthikîrîrie ciugo cionthe irîa Senakeribu atûmanîte cia gûkûruma we, Ngai ûrîa ûtûûraga mwoyo.

¹⁷ We Ngai-Mûnene, nî ûma atî athamaki a Asîria nîmaacûkangîtie ndûrîrî nyîngî na magacûkangia mavûrûri mao.

¹⁸ Nîmaavîvirie ngai ciao, nîûndû itiarî ngai, nwatî ciarî mîvuanano îrûthîtwe na mîtî na mathiga nî andû.

¹⁹ Kwoguo we Ngai-Mûnene Ngai wetû, nakûthaitha ûtûvonokie kuuma kûrî andû a Asîria, nîguo andû a mothamaki monthe ma nthî mamenye atî we Ngai-Mûnene tu, nîwe Ngai.”

Ndûmîrîri ya Isaia kûrî mûthamaki

²⁰ Isaia mûvîcî wa Amosi nîwatûmanire kûrî mûthamaki Hezekia atîrî, “Ngai-Mûnene, Ngai wa Isiraeli augîte atî, ‘Nîmbîguîte îvoya rîaku rîgiî Senakeribu, mûthamaki wa Asîria.’

²¹ Ngai-Mûnene augîte atîrî ûvoro wîgiî Senakeribu: “Ke nîarakûnyarara na nîarakûthekerera we mwîrîtu nthingi wa Zayuni; arainainia kîongo gîake arî vuva waku we mwarî wa Jerusalemu.

²² Nî ûrîkû ûraruma na ûkathekerera? Nîûrîkû ûraugîrîria, ûkarega kûva gîtîîo Ûrîa Mûtheru wa Isiraeli.

²³ “Gûtûma anjaama aku nîkûnyarara Ngai-Mûnene, ugîte atî ûrî na ikaari ciaku nyîngî cia mbarathi, nîûtwîte irîma ndaca nginya gacûmbîrî ga kîrîma Kîam Lebanoni. Nîûgwîthîtie mîtarakwe îrîa mîraca mûno na mîthithinda îrîa mîaro mûmo. Nîwatonyire mûtitû ndaarî viû varîa ûnyitanîrîte.

²⁴ Nîwenjire ithima na ûkînyua manjî ma vûrûri mûgeni, namo makinyo ma magûrû maku maakinyangire rûnjî rwa Nilo rûkîvwa.

²⁵ “Nîkwa ûteguîte atî naavangire ûguo wa tene? Ûrîa naavangire tene rîu nîngûûvingia, ndûme womomore matûûra marîa mairigîre matuîke irûndo cia mathiga.

²⁶ Andû arîa maatûûraga kuo nîathire nî vinya, nîamaku makanyitwa nî guoya. Mekariî ta mîmera îrî mûgûndarî kana ta nyaki mbîthî îtarî na vinya, wana kana ta nyaki îmerete îgûrû rîa nyomba; îvurutagwa nî rûkûngi îkaûma mbere ya îkûra.

²⁷ “Nwatî nîmbicî ûgîûkîra na ûgîkara nthî, nîmbicî ûkiumagara na ûgîcoka, nîmbîcî ûrîa ûrakarîte nîûndû wakwa.

²⁸ Nîûndû wa ûguo ûndakarîrîte, na nîmbîguîte ûvoro wa mwîtîîo waku, nîngûgûtonyia ndûano îniûrûrî rîaku, na ngwîkîre gîcûvî kanyuarî gaku. Nîngûcokia kûrîa waumire na njîra wa îrîa waûkîrîrîre.”

²⁹ Isaia nîwacokire akîra mûthamaki Hezekia atîrî, “Ûndû ûrîa ûgaakûmenyithia ûrîa gûgeekara nî atî, mwaka ûyû na ûcio wîngî, ûkaarîcaga irio imerete na igakûra cio mene, naguo mwaka wa kathatû kuuma rîu, nîûkaavanda ngano ciaku na ûkethe, na ûvande mîthavibu na ûrîe thavibu ciayo.

³⁰ Nao andû arîa matigarîte a nyomba ya Juda nîmakaagîa na vinya rîngî na magîe na maciaro.

³¹ Kûrî na andû magaatigara kûu Jerusalemu na Kîrîmarî gîa Zayuni, nîûndû Ngai-Mûnene arî na wendi mûnene mûno wa kwona atî ûguo nîgwekîka.

³² “Kwoguo Ngai-Mûnene augîte atîrî ûvoro wîgiî mûthamaki wa Asîria, ‘Ndagaatonya îtûûrarî rîîrî kana aikie mûguî wanarî ûmwe kuo, kana athigari marîkuvîvîrie marî na ngo, kana marîthiûrûrûkîrie.

³³ Agaacoka na njîra wa îrîa aaûkîrîre na ndagaatonya îtûûrarî rîîrî. Ûguo nîguo nie Ngai-Mûnene nauga.

³⁴ Nîndûîrîra îtûûra rîîrî na nîrîvonokie nîûndû wa gîtîîo gîakwa nie mwene, na nîûndû wa ndungata yakwa Daudi.’ ”

³⁵ Ûtukû ûcio, mûraika wa Ngai-Mûnene nîwathiîre kûrîa andû a Asîria maambîte magema mao na akîûraga athigari ngiri îgana rîmwe rîa mîrongo înana na ithano (185,000). Rîrîa andû maaramûkire kîraûko Kîam mûthenya ûcio wîngî, nîmeethîrîrie athigari acio onthe marî akuû!

³⁶ Senakeribu, mûthamaki wa Asîria nîwacokire akiuma kûu na agîcoka mûciî, Nineve na agîtûûra kuo.

³⁷ Vîndî îmwe akîgooca arî hekarûrî ya Nisiroki, ngai yake, anake ake aîrî: Adurameleki na Sharezeri, nîmaamûragire na mviû na magîcoka makîûrîra vûrûrirî wa Ararati. Nake mwanake wake wetagwa Esarihadoni nîwatuîkire mûthamaki vuva wake.