2Atha 18 - ÎVUKU RÎA ÛVORO MWARO

Hezekia Mûthamaki wa Juda

¹ Mwakarî wa kathatû Hosea, mûvîcî wa Ela arî mûthamaki wa Isiraeli, Hezekia, mûvîcî wa Ahazi nîwatuîkire mûthamaki wa Juda.

² Aarî na ûkûrû wa mîaka mîrongo îîrî na îtano (25), na nîwathanire arî Jerusalemu îvinda rîa mîaka mîrongo îîrî na kenda (29). Ng'ina eetagwa Abija, mwarî wa Zekaria.

³ Hezekia nîwekire maûndû marîa maakenagia Ngai-Mûnene wata ûrîa îthe, Daudi eekaga.

⁴ Nîwacûkangirie kûndû kûrîa kwagoocagîrwa ngai cia mîvuanano, nîwomomorire itugî cia mathiga, na agîtemanga mîvuanano ya ngai ya nga ya Ashera. Na nîwaunangire njoka ya gîcango tûcunjî îrîa Musa aarûthîte, îrîa yetagwa Nehushitani, nîûndû andû a Isiraeli nwa maamîvîvagîria ûbani na makamîgooca.

⁵ Hezekia nîwetîkîtie Ngai-Mûnene, Ngai wa Isiraeli. Kûu Juda gûtiarî kwanagîa mûthamaki wîngî wekariî take gatagatîrî ka athamaki onthe arîa maarî mbere yake, wana kana arîa maatuîkire athamaki vuva wake.

⁶ Hezekia nîwetîkîtie Ngai-Mûnene, na ndaanarega kûmwathîkîra, nwatî nîwavingagia maathani monthe marîa Ngai-Mûnene aaveete Musa.

⁷ Kwoguo Ngai-Mûnene nîwamûtethagia, na maûndû monthe marîa eekaga nîmaavucaga. Nîwakararirie mûthamaki wa Asîria na akîrega kûmwathîkîra.

⁸ Nîwaûragire Afilisiti nginya îtûûrarî rînene rîa Gaza, vamwe na vûrûri ûrîa ûrîrigicîrîtie, kuuma gîcagirî kîrîa kînini nginya îtûûra rîrîa rînene ririgîre.

⁹ Mwakarî wa kana Hezekia arî mûthamaki, (ûcio nîguo warî mwaka wa mûgwanja, Hosea arî mûthamaki wa Isiraeli) Shalimaneseri, mûthamaki wa Asîria nîwatharîkîre itûûra rîa Samaria na akîrîrigicîria.

¹⁰ Mûthiiarî wa îvinda rîa mîaka îthatû, Shalimaneseri nîwanyitire îtûûra rîu. Ûcio warî mwakarî wa gatandatû (6), Hezekia arî mûthamaki, na nîguo warî mwaka wa kenda (9), Hosea arî mûthamaki.

¹¹ Mûthamaki wa Asîria nîwavirire andû a Isiraeli Asîria marî mîgwate, na akiga amwe îtûûrarî rîa Hala; amwe nîwamaigire vakuvî na Rûnjî rûrîa rwîtagwa Habori rûrîa rûrî vûrûrirî wa Gozani, na amwe akîmaiga matûûrarî manene ma Media.

¹² Îtûûra rîa Samaria rîagwîre nîûndû Aisiraeli matiathîkîra mûgambo wa Ngai-Mûnene, Ngai wao, nwatî nîmaaunire kîrîkanîro gîake, wana matiathikîrîria kana mathîkîra maûndû monthe marîa Musa, ndungata ya Ngai-Mûnene amaathire.

Andû a Asîria nîmaatharîkîre Jerusalemu

¹³ Mwakarî wa îkûmi na îna (14) Hezekia arî mûthamaki, Senakeribu, mûthamaki wa Asîria nîwatharîkîre matûûra manene monthe marîa mairigîre ma Juda na akîmanyita.

¹⁴ Nake Hezekia mûthamaki wa Juda nîwatûmanire kûrî Senakeribu, mûthamaki wa Asîria kûu Lakishi akîmwîra atîrî, “Nie nîmvîtîtie; nakûthaitha tiga kûntharîkîra, na nîngûkûnengera wa kîrîa kîonthe ûkûmbîtia.” Nake mûthamaki wa Asîria nîwerire Hezekia amûtûmîre kilo ngiri îkûmi (10,000) cia sîlûva na kilo ngiri îmwe (1,000) cia thaavu.

¹⁵ Hezekia nîwatûmîre mûthamaki wa Asîria sîlûva yonthe îrîa yarî hekarûrî na îrîa yarî mûciî kwa mûthamaki.

¹⁶ Hezekia nîwang'arire thaavu îrîa aavakîte mîrangorî na îrîa yavakîtwe itugîrî cia kûrûngamia mîrango, na akîmîtûmana yonthe kûrî Senakeribu.

¹⁷ Mûthamaki wa Asîria nîwatûmire athigari eengî a mbaara kuuma Lakishi mathiî makatharîkîre Hezekia kûu Jerusalemu, matongoretue nî anene athatû. Rîrîa maakinyire Jerusalemu, nîmeekarire vakuvî na mûtaro ûrîa ûvîtûkagia manjî kuuma kariarî ka mwena wa rûgûrû varavara nene îrîa yerekerete kûrîa nguo itumagîrwa.

¹⁸ Rîrîa maatûmanîre mûthamaki Hezekia, ndungata ciake ithatû nîcio ciathiîre kûrî o. Nacio ciarî: Eliakimu mûvîcî wa Hilikia, ûrîa wamenyagîrîra mûciî wa mûthamaki, Shebuna, mwandîki na Joa mûvîcî wa Asafu, ûrîa warî mûmenyereri wa mandîko.

¹⁹ Rabushake nîwamerire meere Hezekia atîrî, “Mûthamaki wa Asîria, arakûûria atî, ‘Ûmîrîru ûyû wî naguo umîte kû?’

²⁰ Ûreciria mîgambo mîtheri nîcio wara na vinya wa mbaara? Nî ûrîkû wîvokete agûtethie nîguo ûregane nanie?

²¹ Wîvokete mûthamaki wa Misiri, nwatî kûu nî ta gwîtiira na kamûthanje gaka kaunîku. Kamûthanje kaunîkaga na gakamunda njara ya mûndû ûrîa ûkanyitîte. Ûguo nîguo mûthamaki wa Misiri ekariî kûrî andû onthe arîa mamwîvokaga.

²² “Nwatî mûngîmbîra atî mwîvokete Ngai-Mûnene Ngai wetû, menyani atî Hezekia nîwacûkangirie kûndû kûrîa gûtûgîru kûrîa Ngai-Mûnene aagoocagîrwa na akîomomora metha cia kîgongoona na akîra andû a Juda na a Jerusalemu magoocagîre metharî ya kîgongoona îrîa îrî Jerusalemu.

²³ Ûka rîu mûrîkanîre na mwathi wakwa, mûthamaki wa Asîria. Nîngûkûva mbarathi ngiri igîrî (2,000) ethîrwa nîûkwona andû a kûthiîcaga maitwîte!

²⁴ We ûngîvota atîa kûrega mûnene ûmwe ûrîa mûnini mûno gatagatî ka ndungata cia mûthamaki wa Asîria, na nwa wîvokete mûthamaki wa Misiri agûtûmîre ikaari cia mbarathi na andû arîa mathiîcaga matwîte mbarathi?

²⁵ Makîria ya ûguo, ûreciria ntharîkîrîte vûrûri waku na ngaûcûkangia ndavetwe rûtha nî Ngai-Mûnene? Ngai-Mûnene ke mwene nîke wambîrire nthiî ngaûtharîkîre na nîûcûkangie.”

²⁶ Eliakimu, Shebuna, na Joa nîmaacokire makîra Rabushake atîrî, “Twakûthaitha warie natue na rûthiomi rwa Suriata, na nîtûkûrwîgua. Tiga gûtwarîria na rûthiomi rwa Kîhibirania nîûndû wana nthingo irî matû.”

²⁷ Nwatî Rabushake nîwamerire atîrî, “Nîkwa mûreciria mwathi wakwa, mûthamaki aandûmire kûrî mue muenga na mûthamaki wenyu tu? Nîrarîria wana andû arîa mekarîte îgûrû rîa rûthingo arîa mûrumanîrîtue nao, arîa makaarîcaga mai mao na manyunyage maumago mao, wata ûrîa wanamue mûgeekaga.”

²⁸ Rebushake nîwacokire akîrûngama na akiugîrîria na mûgambo mûnene na Kîhibirania atîrî, “Thikîrîriani ûrîa mûthamaki mûnene wa Asîria aramwîra!

²⁹ Aramûkania mûtigetîkîre Hezekia amûveenie, nîûndû Hezekia ndangîvota kûmûvonokia kuuma kûrî nie.

³⁰ Mûtigetîkîrie Hezekia atûma mwîvoke Ngai-Mûnene akîmwîra atî, mûtigecirie Ngai-Mûnene nîagûtûvonokia, na îtûûra rîîrî rînene tî rîocwa nî mûthamaki wa Asîria.

³¹ Mûtikathikîrîrie Hezekia, nîûndû mûthamaki wa Asîria augîte atî, mwîgucane nake na mwînenganîre kûrî ke. Mue muonthe nîmûgaacoka mûrîcage thavibu kuuma mîthaviburî yenyu, na ngûû kuuma mîkûyûrî yenyu, na mûnyunyage manjî kuuma ithimarî cienyu,

³² nginya rîrîa ngaaûka nîmûvire vûrûrirî wîkariî ta vûrûri wenyu, vûrûri ûrî ngano na ndivei, vûrûri ûrî mîgate na mîgûnda ya mîthavibu, vûrûri ûrî mîtî ya mîtamaiyû na ûûkî, nîguo mûtûûre na mûtigakue. Mûtikathikîrîrie Hezekia akîmûvîtithia rîrîa akûmwîra atî, Ngai-Mûnene nîagaatûvonokia.

³³ Kûrî vîndî wanarî îmwe ngai cia mavûrûri cianavonokia mavûrûri ma cio kuuma kûrî mûthamaki wa Asîria?

³⁴ Irî kû ngai cia Hamathi na Aripadi? Irî kû ngai cia Sefarivaimu, Hena, na Iva? Nîivonoketie andû a Samaria kuuma kûrî nie?

³⁵ Gatagatîrî ka ngai cionthe cia mavûrûri, nî ngai îrîkû yanavonokia vûrûri wao kuuma kûrî nie? Nîndûî kîratûma mwîcirie atî Ngai-Mûnene nwa avonokie Jerusalemu kuuma kûrî nie?”

³⁶ Nwatî andû nîmaakirire ki, wata ûrîa mûthamaki Hezekia amaathîte; matiauga wanarî ûndû.

³⁷ Eliakimu, Shebuna na Joa, nîmaacokire magîtembûra nguo ciao na marûrû, na makîthiî kûrî mûthamaki makîmwîra ûrîa Rabushake aaugîte.