2Atha 17 - ÎVUKU RÎA ÛVORO MWARO

Hoshea mûthamaki wa Isiraeli

¹ Mwakarî wa îkûmi na îîrî (12), Ahazi arî mûthamaki wa Juda, Hoshea, mûvîcî wa Ela nîwatuîkire mûthamaki wa Isiraeli na nîwathanire arî Samaria îvinda rîa mîaka kenda (9).

² Nîwevirie mbere ya Ngai-Mûnene, nwatî tî ta athamaki arîa maathanaga mbere yake.

³ Shalimaneseri mûthamaki wa Asîria nîwarûire na Hoshea. Hoshea nîwenenganîre kûrî Shalimaneseri na nîwamûrîvaga gooti.

⁴ Nwatî Hoshea nîwatûmîte anjaama kûrî mûthamaki wa Misiri na Hoshea nîwatigire kûrîvaga gooti kûrî mûthamaki wa Asîria ta ûrîa eekaga wa mwaka wa mwaka. Rîrîa Shalimaneseri aamenyire ûguo, nîwaugire Hoshea anyitwe na avingîrwe njera.

Îtûûra rîa Samaria nî rîathirire vinya

⁵ Mûthamaki wa Asîria nîwacokire agîtonyerera vûrûri wonthe wa Isiraeli na agîkinya Samaria. Nîwathiûrûrûkîrie îtûûra rîu îvinda rîa mîaka îthatû. (3)

⁶ Mwakarî wa kenda (9), Hoshea mûthamaki wa Asîria nîwanyitire Samaria. Nîwavirire andû a Isiraeli Asîria marî mîgwate na akiga amwe îtûûrarî rîa Hala; amwe nîwamaigire vakuvî na Rûnjî rûrîa rwîtagwa Habori rûrîa rûrî vûrûrirî wa Gozani, na amwe akîmaiga matûûrarî manene ma Media.

⁷ Samaria yathirire vinya nîûndû andû a Isiraeli nîmeevîtie mbere ya Ngai-Mûnene Ngai wao, ûrîa wamarutire vûrûrirî wa Misiri na wamavonoketie kuuma kûrî Faraû mûthamaki wa Misiri, na makagooca ngai ciîngî.

⁸ Nîmaarûmîrîre mîtugo ya andû arîa Ngai-Mûnene eengataga wa andû a Isiraeli makîonaga, na makîambîrîria gwîka maûndû marîa athamaki a Isiraeli maambîrîîrie vûrûrirî.

⁹ Andû a Isiraeli nîmeekire na nthitho maûndû marîa Ngai-Mûnene Ngai wao aaregaga. Nîmeetumîre kûndû gwa kûgoocagîrwa matûûrarî mao monthe, kwambîrîria gîcagirî kîrîa kînini viû nginya îtûûrarî rînene rîrîa rîgitîre.

¹⁰ Nîmeerûthîre itugî cia mathiga na mîvuanano ya Ashera ngai ya nga, îgûrû rîa irîma cionthe na rungu rwa mîtî yonthe mîruru.

¹¹ Nîmaavîvagîria ûbani îgûrû rîa metha cionthe cia magongoona cia ngai cia maveeni, marûmîrîrîtie mîtugo îrîa yarî na andû arîa Ngai-Mûnene eengatire kuuma vûrûrirî ûcio. Nîmaarakaririe Ngai-Mûnene nîûndû wa maûndû monthe macûku marîa meekire,

¹² na makîgooca mîvuanano îrîa Ngai-Mûnene aamakaanîtie akaamera atîrî, “Mûtigeke ûguo.”

¹³ Ngai-Mûnene nîwakaanîtie andû a Isiraeli na a Juda na njîra ya arathi onthe na oni akameera atîrî, “Tiganani na mîtugo yenyu mîcûku na mûrûmîrîre maathani makwa na irîra ciakwa, wata ûrîa mandîkîtwe wathorî ûrîa naveere methe menyu na marîa naamûtûmîre kûvîtûkîrîra kûrî arathi, ndungata ciakwa.”

¹⁴ Nwatî nîmaaregire kwathîka; nîmaaûmirie ngoro ciao wata methe mao arîa maaregire gwîtîkia Ngai-Mûnene Ngai wao.

¹⁵ Nîmaaregire gûtîîa irîra ciake, nîmaaregire kûvingia kîrîkanîro kîrîa Ngai-Mûnene aarûthîte na methe mao ma tene, na matiegua maûndû marîa Ngai-Mûnene, Ngai wao aamakaanîtie. Nîmaagoocire mîvuanano îtarî vata na wanao o ene magîtuîka andû matarî vata rîngî. Nîmaarûmîrîre mîtugo ya mavûrûri marîa maamathiûrûkîrîtie. Ûguo nîguo maregire kwathîkîra maûndû marîa Ngai-Mûnene amaathîte matigeke.

¹⁶ Nîmaaunire mawatho monthe ma Ngai-Mûnene Ngai wao, makîîrûthîra mîvuanano îîrî ya tûcaû twa Cuuma îrî mîrarûre. Wana nwa maarûthire mûvuanano wa ngai ya nga ya Ashera, na makagoocaga indo cionthe cia îgûrû, na magatungatîra Baali.

¹⁷ Nîmaarutire ciana ciao cia anake na cia erîtu kûrî ngai cia maveeni, irî matega ma kûvîvua. Nîmaathiîcaga kwa ago na arogi. Nîmeerutîrîte viû gwîka maûndû marîa mataakenagia Ngai-Mûnene, na ûguo nîguo maarakaririe Ngai-Mûnene.

¹⁸ Kwoguo Ngai-Mûnene nîwamengatire onthe. Aatigaririe andû a mûvîrîga wa Juda onga tu.

¹⁹ Andû a Juda wanao matiathîkîra mawatho ma Ngai-Mûnene Ngai wao; nîmaarûmîrîre mîtugo îrîa yaretirwe nî andû a Isiraeli.

²⁰ Ngai-Mûnene nîwaregire andû onthe a Isiraeli; nîwamaverithirie na akîmarekereria kûrî andû aganu mûno nginya akîmengata maume kûrî ke.

²¹ Vuva wa Ngai-Mûnene kwamûrania andû a Isiraeli na andû a mûvîrîga wa Daudi, andû a Isiraeli nîmaatuire Jeroboamu, mûvîcî wa Nefati mûthamaki wao. Jeroboamu nîwatûmire andû a Isiraeli matiganîrie Ngai-Mûnene na agîtûma meke wîvia mûnene.

²² Andû a Isiraeli nîmeekire mevia monthe marîa Jeroboamu eekire; matiatigana namo,

²³ nginya rîrîa Ngai-Mûnene aamengatire makiuma kûrî ke, wata ûrîa aaugîte na njîra ya arathi ndungata ciake cionthe, atî nîageka. Kwoguo andû a Isiraeli nîmaavirirwe îthamîriorî Asîria, kûrîa matwîre nginya ûmûnthî.

Andû a Sîria nîmaatûûrire Isiraeli

²⁴ Mûthamaki wa Asîria nîwarutire andû kuuma matûûrarî ma Babuloni, Kutha, Ava, Hamathi, na Sefarivaimu, na akîmavira matûûrarî manene ma Samaria kûrîa andû a Isiraeli maatûûraga mbere ya mavirwe îthamîriorî. Nîmegwatîre matûûra manene ma Samaria na magîtûûra kuo.

²⁵ Kîambîrîriarî maatûûra kuo, matiagoocaga Ngai-Mûnene, na kwoguo Ngai-Mûnene nîwamatûmîîre mînyambû na îkîûraga amwe ao.

²⁶ Mûthamaki wa Asîria nîwerirwe atîrî, “Andû arîa wavirire magatûûre matûûrarî manene ma Samaria matiîcî watho wa ngai ya vûrûri ûcio. Kwoguo ngai îo nîîmatûmîrîte mînyambû na nîîramaûraga.”

²⁷ Mûthamaki wa Asîria nîwacokire akîathana atîrî, “Îra ûmwe wa athînjîri-Ngai arîa twaûkire nao marî mîgwate acoke agatûûre kuo, nîguo amathomithie watho wa ngai ya vûrûri ûcio.”

²⁸ Kwoguo ûmwe wa athînjîri-Ngai arîa maathiîte nao kuuma Samaria nîwathiîre na agîtûûra Betheli. Kûu nîkuo aathomithîrie andû ûrîa magîrîrwe nî kûgooca Ngai-Mûnene.

²⁹ Nwatî andû a mavûrûri monthe nwa maarûthire mîvuanano yao ene, wa andû marî îtûûrarî rîao, na makîmiga kûndû kûrîa gûtûgîru gwa kûgoocerwa kwarûthîtwe nî andû a Samaria.

³⁰ Andû a Babuloni nîmaarûthire mûvuanano wa Sukothi-benothi; andû a Kuthi makîrûtha mûvuanano wa Nerigali; andû a Hamathi nîmaarûthire mûvuanano wa Ashima;

³¹ andû a Iva nao makîrûtha mîvuanano ya Nibihazi na Taritaki; nao andû a Sefarivati nîmaarutire ciana ciao magongoona irî matega ma kûvîvua kûrî ngai ciao, Adurameleki na Anameleki ngai cia Sefarivaimu.

³² Andû acio nwamaagoocaga Ngai-Mûnene na nîmaathuurire kuuma gatagatîrî kao andû a mîthemba yonthe marî athînjîri-Ngai a kûthiîcaga kûndû kûrîa gûtûgîru gwa kûgoocerwa na kûrutagîra magongoona kuo vandûrî vao.

³³ Kwoguo nîmaagoocaga Ngai-Mûnene, nwatî nwa maagoocaga ngai ciao o ene, kûringana na mîtugo ya mavûrûri marîa maarutîtwe.

³⁴ Andû acio matwîre mekaga wa ûrîa meekaga tene nginya ûmûnthî. Matigoocaga Ngai-Mûnene kana mavingia mawatho, irîra kana watho na maathani marîa aaveere njiarwa cia Jakovu, ûrîa eetire Isiraeli.

³⁵ Ngai-Mûnene nîwarûthîte kîrîkanîro nao na akamatha atîrî, “Mûtikagooce ngai ciîngî; mûtikenamîrîrie mothiû menyu mbere yacio kana mûitungatîra kana mûirutîre magongoona.

³⁶ Nwatî mûngoocage nie Ngai-Mûnene, ûrîa wamûrutire vûrûri wa Misiri na vinya mwîngî na wendo mûnene; nie nînie mûkaagoocaga na mûndutagîre magongoona.

³⁷ Mûkaavingagia vîndî cionthe mawatho, irîra na maathani marîa naamwandîkîre. Mûtikagooce ngai ciîngî,

³⁸ na mûtikariganîrwe nî kîrîkanîro kîrîa naarûthire namue. Mûtikagooce ngai ciîngî.

³⁹ Nwatî mûkangoocaga nie, Ngai-Mûnene Ngai wenyu, na nîngaamûvonokia kuuma kûrî nthû cienyu cionthe.”

⁴⁰ Kûnarî ûguo, andû acio matiegua ûrîa Ngai-Mûnene aameerire, na nîmaathiîre na mbere gwîka maûndû wa marîa meekaga tene.

⁴¹ Kwoguo andû acio nîmaagoocaga Ngai-Mûnene, nwatî nwa maagoocaga ngai ciao cia mîvuanano, na nginya ûmûnthî njiarwa ciao itwîre ciîkaga wata ûrîa methe mao ma tene meekaga.