2Atha 15 - ÎVUKU RÎA ÛVORO MWARO

Uzia, mûthamaki wa Juda

¹ Mwakarî wa mîrongo îîrî na mûgwanja, Jeroboamu arî mûthamaki wa Isiraeli, Azaria mûvîcî wa Amazia nîwatuîkire mûthamaki wa Juda.

² Aambîrîrie kwathana arî na ûkûrû wa mîaka îkûmi na îtandatû na nîwathanire arî Jerusalemu îvinda rîa mîaka mîrongo îtano na îîrî (52). Ng'ina eetagwa Jekolia wa kuuma Jerusalemu.

³ Nîwekire maûndû marîa maakenagia Ngai-Mûnene wata marîa monthe meekîtwe nî îthe, Amazia.

⁴ Nwatî kûndû kûrîa kwagoocagîrwa mîvuanano gûtiacûkangua, na andû nîmaathiîre na mbere kûruta magongoona na kûvîvîria ûbani kuo.

⁵ Ngai-Mûnene nîwaverithirie mûthamaki Azaria na njîra ya gûtûma anyitwe nî mûrimû mûcûku wa ngothi, ûrîa aarwarire nginya vîndî îrîa aakwire. Aatûûraga nyomba arî wenga. Mûvîcî Jothamu ûrîa warûngamagîrîra mûciî wa mûthamaki nîke watongoragia andû a vûrûri ûcio.

⁶ Maûndû mengî monthe marîa Uzia eekire nîmandîke Îvukuurî rîa Maûndû ma Tene ma Athamaki Juda.

⁷ Uzia nîwakwire na akîthikwa mbîrîrarî cia athamaki kûu îtûûrarî rînene rîa Daudi. Mûvîcî Jothamu nîwatuîkire mûthamaki vuva wake.

Zakaria, mûthamaki wa Isiraeli

⁸ Mwakarî wa mîrongo îthatû na înana, Azaria arî mûthamaki wa Juda, Zakaria mûvîcî wa Jeroboamu nîwatuîkire mûthamaki wa Isiraeli, na nîwathanire arî Samaria îvinda rîa mîeri îtandatû.

⁹ Zakaria nîwekire maûndû marîa mataakenagia Ngai-Mûnene ta marîa meekîtwe nî methe make. Nîwekire mevia ta marîa meekîtwe nî Jeroboamu, mûvîcî wa Nefati, ûrîa watûmire andû a Isiraeli mevie.

¹⁰ Shalumu, mûvîcî wa Jabeshi nîweciririe ûrîa akûraga mûthamaki Zakaria na nîwamûragîre kûu Ibileamu na agîtuîka mûthamaki vuva wake.

¹¹ Maûndû marîa mengî monthe marîa Zakaria eekire nîmandîke Îvukuurî rîa Maûndû ma Tene ma Athamaki Isiraeli.

¹² Ûguo nîguo kîîranîro Kîamvingire kîrîa Ngai-Mûnene eerîre Jehu rîrîa aamwîrire atîrî, “Njiarwa ciaku nîigekarîra gîtî Kîam ûthamaki Kîam Isiraeli nginya rûciaro rwa kana.”

Shalumu mûthamaki wa Isiraeli

¹³ Mwakarî wa mîrongo îthatû na kenda (39) Uzia arî mûthamaki wa Juda, Shalumu mûvîcî wa Jabeshi nîwatuîkire mûthamaki wa Isiraeli, na nîwathanire arî Samaria îvinda rîa mweri ûmwe (1).

¹⁴ Menahemu mûvîcî wa Gadi nîwaumire Tiriza na akîthiî Samaria. Nîwaûragire Shalumu, agîcoka agîtuîka mûthamaki vuva wake.

¹⁵ Maûndû marîa mengî monthe Shalumu eekire, vamwe na ûrîa eeciragia gwîka nîmandîke Îvukuurî rîa Maûndû ma Tene ma Athamaki a Isiraeli.

¹⁶ Vîndî îrîa Manahemu aarî njîrarî aumîte Tiriza, nîwacûkangirie îtûûra rîa Tapua, andû a kuo na îtûûra rîrîa rîrî vakuvî nîûndû andû a kûndû kûu nîmaaregire kwînenganîra kûrî ke. Wana nîwarutire aka onthe a îtûûra rîu nguo arîa maarî na mavu.

Menahemu, mûthamaki wa Isiraeli

¹⁷ Mwakarî wa mîrongo îthatû na kenda (39) Azaria arî mûthamaki wa Juda Menahemu mûvîcî wa Gadi nîwatuîkire mûthamaki wa Isiraeli, na nîwathanire arî Samaria îvinda rîa mîaka îkûmi (10).

¹⁸ Nîwevîrie Ngai-Mûnene, nîûndû nginya mûthenya ûrîa aakwire, aatwîre ekaga mevia ta marîa meekagwa nî mûthamaki Jeroboamu, mûvîcî wa Nefati marîa maatûmire andû a Isiraeli mevie.

¹⁹ Tigilathi Pilesa, mûthamaki wa Asîria nîwatharîkîre vûrûrirî wa Isiraeli, na Menahemu Nîwamûvere kilo ngiri mîrongo îthatû na inya (34,000) cia sîlûva, nîguo Tigilathi Pilesa amûtethie gûtûma ûthamaki wake wîvande na athiî na mbere kwathana.

²⁰ Menahemu nîwacunire andû onthe a Isiraeli arîa maarî itonga wa mûndû tûcunjî mîrongo îtano twa sîlûva (50) na vinya. Kwoguo Tigilathi Pilesa nîwacokire vûrûrirî wake.

²¹ Maûndû marîa mengî monthe marîa Menahemu eekire nîmandîke Îvukuurî rîa Maûndû ma Tene ma Athamaki Isiraeli.

²² Nîwacokire agîkua na akîthikwa; nake mûvîcî Pekahia nîwatuîkire mûthamaki vuva wake.

Pekahia mûthamaki wa Isiraeli

²³ Mwakarî wa mîrongo îtano (50) Azaria arî mûthamaki wa Juda, Pekahia mûvîcî wa Remalia nîwatuîkire mûthamaki wa Isiraeli, na nîwathanire arî Samaria îvinda rîa mîaka îîrî (2).

²⁴ Nîwevîrie Ngai-Mûnene na njîra ya gwîka maûndû macûku ta marîa meekagwa nî mûthamaki Jeroboamu mûvîcî wa Nefati ûrîa watûmire andû a Isiraeli mevie.

²⁵ Mûtongoria ûmwe wa athigari a mbaara a mûthamaki Pekahia wetagwa Peka, mûvîcî wa Remalia nîwavangire marî na arûme mîrongo îtano (50) a kuuma Gileadi, ûrîa makûraga Pekahia. Peka nîwaûragîre Pekahia nyombarî yake ya ndaarî, na agîtuîka mûthamaki vuva wake.

²⁶ Maûndû marîa mengî monthe marîa Pekahia eekire nîmandîke Îvukuurî rîa Maûndû ma Tene ma Athamaki Isiraeli.

Peka mûthamaki wa Isiraeli

²⁷ Mwakarî wa mîrongo îtano na îîrî (52) Azaria arî mûthamaki wa Juda, Peka, mûvîcî wa Remalia nîwatuîkire mûthamaki wa Isiraeli, na nîwathanire arî Samaria îvinda rîa mîaka mîrongo îîrî (20).

²⁸ Nîwevîrie Ngai-Mûnene na njîra ya gwîka maûndû macûku ta marîa meekagwa nî mûthamaki Jeroboamu, mûvîcî wa Nefati, ûrîa watûmire andû a Isiraeli mevie.

²⁹ Vîndî îrîa Peka aarî mûthamaki wa Isiraeli nîrîo Tigilathi Pilesa, mûthamaki wa Asîria aanyitire matûûra ma: Ijoni, Abeli-bethi-maaka, Janoa, Kadeshi, Hazoru, Gileadi, na Galili, vûrûri wonthe wa Nafutali. Nîwacokire akîvira andû Asîria marî mîgwate.

³⁰ Mwakarî wa mîrongo îîrî (20) Jothamu. Mûvîcî wa Uzia arî mûthamaki wa Juda, Hoshea mûvîcî wa Ela nîwavangire ûrîa akûraga mûthamaki Peka. Nîwamûragire na agîtuîka mûthamaki vuva wake.

³¹ Maûndû marîa mengî monthe marîa Peka eekire nîmandîke Îvukuurî rîa Maûndû ma Tene ma Athamaki Isiraeli.

Jothamu mûthamaki wa Juda

³² Mwakarî wa kaîrî Peka, mûvîcî wa Remalia arî mûthamaki wa Isiraeli, Jothamu mûvîcî wa Uzia nîwatuîkire mûthamaki wa Juda

³³ arî na ûkûrû wa mîaka mîrongo îîrî na îtano (25). Nîwathanire arî Jerusalemu îvinda rîa mîaka îkûmi na îtandatû (16). Ng'ina eetagwa Jerusha, mwarî wa Zadoku.

³⁴ Jothamu nîwekire maûndû marîa maakenagia Ngai-Mûnene wata marîa monthe meekagwa nî îthe Uzia.

³⁵ Nwatî kûndû kûrîa kwagoocagîrwa mîvuanano gûtiacûkangua; na andû nîmaathiîre na mbere kûruta magongoona na kûvîvîria ûbani kuo. Jothamu nîwatumire kîvingo Kîam mwena wa rûgûrû Kîam hekarû.

³⁶ Maûndû mengî monthe marîa Jothamu eekire nîmandîke Îvukuurî rîa Maûndû ma Tene ma Athamaki Juda.

³⁷ Vîndî îo Jothamu aathanaga nîrîo Ngai-Mûnene aatûmire Rezini, mûthamaki wa Sîria na Peka, mûthamaki wa Isiraeli mathiî makatharîkîre Juda rita rîa mbere.

³⁸ Jothamu nîwakwire na akîthikwa mbîrîrarî cia athamaki kûu îtûûrarî rînene rîa Daudi; nake mûvîcî Ahazi nîwatuîkire mûthamaki vuva wake.