2Atha 14 - ÎVUKU RÎA ÛVORO MWARO

Amazia mûthamaki wa Juda

¹ Mwakarî wa kaîrî Joashi, mûvîcî wa Jehoahazi arî mûthamaki wa Isiraeli, Amazia mûvîcî wa Joashi nîwatuîkire mûthamaki wa Juda

² arî na ûkûrû wa mîaka mîrongo îîrî na îtano (25). Nîwathanire arî Jerusalemu îvinda rîa mîaka mîrongo îîrî na kenda (29). Ng'ina eetagwa Jehoadini, wa kuuma Jerusalemu.

³ Amazia nîwekire maûndû marîa maakenagia Ngai-Mûnene, nwatî ndeeka ta ûrîa îthe wa tene Daudi eekaga. Vandû va ûguo nîwekire maûndû monthe marîa îthe Joashi eekîte.

⁴ Ndaacûkangia kûndû kûrîa kwagoocagîrwa mîvuanano, na andû nîmaathiîre na mbere kûruta magongoona na kûvîvîria ûbani kuo.

⁵ Rîrîa ûthamaki wevandire waro ûrî rungu rwa Amazia, Amazia nîwaûragire ndungata ciake cionthe irîa ciaûragîte îthe, mûthamaki.

⁶ Nwatî ndaaûraga ciana ciao. Eekire wata ûrîa Ngai-Mûnene aathanîte wathorî wa Musa atîrî, “Aciari matikaaûragwa nîûndû wa mevia ma ciana ciao, nacio ciana itikaaûragwa nîûndû wa mevia ma aciari a cio. Wa mûndû akaaûragwa nîûndû wa mevia marîa ke mwene ekîte.”

⁷ Amazia nîwaûragîre athigari a Edomu Kîandarî gîa cumbî na akîîgwatîra îtûûra rînene rîa Sela na akîrîta Jokitheeli, na nwaguo rîtagwa nginya ûmûnthî.

⁸ Amazia nîwacokire agîtûma anjaama kûrî Jehoashi mûthamaki wa Isiraeli akîmwîra atîrî, “Ûka twonane.”

⁹ Nwatî Jehoashi mûthamaki wa Isiraeli nîwatûmire anjaama acio kûrî Amazia, mûthamaki wa Juda makamwîre atîrî, “Vîndî îmwe mwîgua wa Lebanoni nîwatûmanire kûrî mûtarakwe wa kûu Lebanoni ûkiuga atî ‘Nenganîra mwarîguo avikue nî mûvîcîwa.’ Nyamû mbaganu nîyavîtûkîrîre kuo na îgîkinyanga mwîgua ûcio.

¹⁰ Nîma Amazia rîu nîûvootete andû a Edomu, na wî mwîcûre nî mwîtîîo. Îganîra na ngumo îo yaku na wîkare mûciî. Ûracaria thîna îrîa îgaakûretere mînyamaaro we na andû aku a Juda nîkî?”

¹¹ Nwatî Amazia ndeegua ûguo. Kwoguo Jehoashi mûthamaki wa Isiraeli nîwathiîre marî na athigari ake na makîrûa na Amazia mûthamaki wa Juda. Maarûîre vandû vetagwa Bethi Shemeshi kûu Juda.

¹² Andû a Juda nîmaavootirwe nî andû a Isiraeli, na athigari ao onthe makînûka wa mûndû gwake mûciî.

¹³ Jehoashi nîwanyitire Amazia, agîcoka akîthiî Jerusalemu na akîomomora rûthingo rwa îtûûra rîa Jerusalemu kuuma kîvingorî Kîam Efiraimu nginya kîvingorî Kîam Mûthiia, vandû va ûraca wa vakuvî mita Magana maîrî (200).

¹⁴ Nîwocire thaavu cionthe na sîlûva vamwe na indo cionthe irîa oonire hekarûrî wana irîa oonire nyombarî ya mûthamaki, na nîwacokire Samaria nacio wa vamwe na andû arîa aanyitîte.

¹⁵ Maûndû marîa mengî monthe marîa Jehoashi eekire, wa vamwe na ûcamba ûrîa oonanirie rîrîa maarûaga na Amazia, mûthamaki wa Juda nîmandîke Îvukuurî rîa Maûndû ma Tene ma Athamaki a Isiraeli.

¹⁶ Jehoashi nîwakwire na akîthikwa mbîrîrarî cia athamaki a Isiraeli kûu Samaria; nake mûvîcî, Jeroboamu nîwatuîkire mûthamaki vuva wake.

Gûkua kwa Amazia, Mûthamaki wa Juda

¹⁷ Amazia, mûthamaki wa Juda aatûûrire îvinda rîa mîaka îkûmi na îtano vuva wa gûkua kwa Jehoashi, mûthamaki wa Isiraeli.

¹⁸ Maûndû marîa mengî monthe marîa Amazia eekire nîmandîke Îvukuurî rîa Maûndû ma Tene ma Athamaki Juda.

¹⁹ Andû amwe a kûu Jerusalemu nîmeciririe ûrîa makûraga Amazia. Kwoguo Amazia nîwaûrire akîthiî îtûûrarî rînene rîa Lakishi, nwatî nthû ciake nîciatûmire andû na makîthiî na makîmûragîra kuo.

²⁰ Nîmaakuuire mwîrî wake na mbarathi magîûcokia Jerusalemu na nîmaaûthikire mbîrîrarî cia athamaki kûu îtûûrarî rînene rîa Daudi.

²¹ Nao andû onthe a Juda nîmoocire mûvîcî, Azaria arî na ûkûrû wa mîaka îkûmi na îtandatû (16) na makîmûtua mûthamaki vuva wa gûkua kwa îthe, Amazia.

²² Azaria nîwatumire rîngî ûtûûra rîa Elathi na akîrîcokia Juda rîngî vuva gûkua kwa îthe.

Jeroboamu wa kaîrî, mûthamaki wa Isiraeli

²³ Mwakarî wa îkûmi na îtano Amazia, mûvîcî wa Joashi arî mûthamaki wa Juda, Jeroboamu mûvîcî wa Joashi nîwatuîkire mûthamaki wa Isiraeli na nîwathanire arî Samaria îvinda rîa mîaka mîrongo îna na ûmwe (41).

²⁴ Nîwekire maûndû marîa mataakenagia Ngai-Mûnene na njîra ya gwîka mawîvia monthe marîa meekagwa nî mûthamaki Jeroboamu mûvîcî wa Nefati ûrîa warî mûthamaki wa Isiraeli mbere yake. Jeroboamu nîwatûmire andû a Isiraeli mevie.

²⁵ Nîwacokirie rîngî vûrûri wonthe ûrîa warî wa andû a Isiraeli kuuma mwanyarî wa Hamathi mwena wa rûgûrû nginya Îriarî rîa Araba mwena wa îveti. Ûguo nîguo Ngai-Mûnene Ngai wa Isiraeli aaugîte na njîra ya ndungata yake mûrathi Jona, mûvîcî wa Amitai. Jona aarî wa kuuma Gathu Heferi.

²⁶ Ngai-Mûnene nîwonire andû a Isiraeli makîthînîka mûno, nîûndû gûtiarî na mûndû wanarî ûmwe ûngîamatethirie.

²⁷ Nwatî Ngai-Mûnene ndaarî na mworoto wa kûthiria viû andû a Isiraeli gûkû nthî. Kwoguo nîwamavonokirie kûvîtûkîrîra kûrî Jeroboamu, mûvîcî wa Joashi.

²⁸ Maûndû marîa mengî monthe marîa Jeroboamu eekire, mbaara irîa aarûire na ûcamba, vamwe na ûrîa aacokirie rîngî îtûûra rîa Damesiki na rîa Hamathi vûrûrirî wa Isiraeli na rîrîa mbererî rîarî rîa Juda, nîmandîke Îvukuurî rîa Maûndû ma Tene ma Athamaki Isiraeli.

²⁹ Jeroboamu nîwakwire na akîthikwa mbîrîrarî cia athamaki a Isiraeli, nake mûvîcî Zakaria nîwatuîkire mûthamaki vuva wake.