2Atha 13 - ÎVUKU RÎA ÛVORO MWARO

Jehoahazi, mûthamaki wa Isiraeli

¹ Mwakarî wa mîrongo îîrî na îthatû (23) Joashi mûvîcî wa Ahazia arî mûthamaki wa Juda, Jehoahazi, mûvîcî wa Jehu nîwatuîkire mûthamaki wa Isiraeli na nîwathanire arî Samaria îvinda rîa mîaka îkûmi na mûgwanja. (17)

² Nîwevîrie Ngai-Mûnene na njîra ya gwîka maûndû macûku ta marîa meekagwa nî mûthamaki Jeroboamu mûvîcî wa Nebati ûrîa warî mûthamaki wa Isiraeli mbere yake. Ke ndaatigana na maûndû macûku marîa meekagwa nî Jeroboamu na nîwatûmire andû a Isiraeli mevie.

³ Kwoguo Ngai-Mûnene nîwarakarirue nî andû a Isiraeli na nîwatûmire mekare makîvootagwa mbaararî nî Hazaeli, mûthamaki wa Sîria na mûvîcî Benihadadi.

⁴ Jehoahazi nîwacokire akîvoya Ngai-Mûnene. Nake Ngai-Mûnene nîwegwire mavoya make, nîûndû nîwonire ûrîa mûthamaki wa Sîria aavinyîrîrîtie andû a Isiraeli.

⁵ Kwoguo Ngai-Mûnene nîwatûmîre andû a Isiraeli mûtongoria, ûrîa wamavonokirie kuuma kûrî andû a Sîria. Kwoguo andû a Isiraeli nîmaatûûrire mîciîrî yao marî na thayû wata ûrîa maatûûraga mbere.

⁶ Nwatî matiatigana na mevia ma Jeroboamu marîa maatûmire andû a Isiraeli mevie, na nîmaathiîre na mbere kûmeka. Mûvuanano wa Ashera wanaguo nîwekarire kûu Samaria.

⁷ Jehoahazi ndaarî na athigari a mbaara maatigarîte tiga arûme mîrongo îtano (50) arîa mathiîcaga matwîte mbarathi, ikaari îkûmi (10) cia mbaara, na arûme ngiri îkûmi (10,000) arîa maathiîcaga na magûrû, nîûndû mûthamaki wa Sîria nîwacûkangîtie acio engî na akamakinyangîra nthî ta mûthetu.

⁸ Maûndû marîa mengî monthe marîa Jehoahazi eekire vamwe na maûndû monthe marîa eekire na ûcamba nîmandîke Îvukuurî rîa Maûndû ma Tene ma Athamaki Isiraeli.

⁹ Jehoahazi nîwakwire na akîthikwa Samaria, nake mûvîcî Joashi agîtuîka mûthamaki vuva wake.

Joashi, Mûthamaki wa Isiraeli

¹⁰ Mwakarî wa mîrongo îthatû na mûgwanja (37) Joashi arî mûthamaki wa Juda, Joashi, mûvîcî wa Jehoahazi nîwatuîkire mûthamaki wa Isiraeli na nîwathanire arî Samaria îvinda rîa mîaka îkûmi na îtandatû. (16)

¹¹ Wanake nîwevîrie Ngai-Mûnene. Ndaatigana na mevia monthe ma mûthamaki Jeroboamu mûvîcî wa Nefati marîa maatûmire andû a Isiraeli mevie.

¹² Maûndû marîa mengî monthe marîa Joashi eekire wa vamwe na ûrîa aarûire na Amazia, mûthamaki wa Juda arî na ûcamba nîmandîke Îvukuurî rîa Maûndû ma Tene ma Athamaki a Isiraeli.

¹³ Joashi nîwakwire na akîthikwa mbîrîrarî cia athamaki kûu Samaria, nake Jeroboamu wa kaîrî nîwatuîkire mûthamaki vuva wake.

Gûkua kwa Elisha

¹⁴ Rîrîa mûrathi Elisha aarwarire mûrimû ûrîa watûmire akue, Joashi, mûthamaki wa Isiraeli nîwathiîre kûmûcerera. Nîwamûrîrîre akiugaga atîrî, “Vava, vava! Njamba îrîa îrarûagîrîra andû a Isiraeli!”

¹⁵ Elisha nîwerire Joashi atîrî, “Oca ûta na mîguî.” Nake Joashi nîwocire ûta na mîguî.

¹⁶ Elisha nîwacokire akîra Joashi atîrî, “Gucia mûguî na wîvarîrie kûratha.” Nake Joashi nîwagucirie mûguî. Elisha nîwaigîrîre njara ciake îgûrû rîa njara cia mûthamaki Joashi.

¹⁷ Elisha nîwerire Joashi atîrî, “Vingûra ndirica îrîa îrî mwena wa îrathîro.” Nake Joashi nîwekire wa guo. Elisha nîwacokire akîmwîra atîrî, “Ikia mûguî!” Vîndî wa îo mûthamaki aaikirie mûguî, mûrathi Elisha nîwaugîrîrie atîrî, “We, wî mûguî wa Ngai-Mûnene. Mûguî ûcio nîguo Ngai-Mûnene akaavoota andû a Sîria naguo. Nîûkaarûa na andû a Sîria kûu Afeku nginya rîrîa ûkaamavoota.”

¹⁸ Elisha nîwacokire akîra mûthamaki atîrî, “Oca mîguî îo îngî na ûringe nthî nayo.” Nake mûthamaki nîwocire mîguî îo îngî na akîringa nthî nayo maita mathatû, agîcoka agîtiga.

¹⁹ Elisha nîwarakarirue nî mûthamaki na nîwamwîrire atîrî, “Ûngîaringa nthî maita matano kana matandatû, na nî ûngîethîrwa ûvootete andû a Sîria viû; nwatî rîu ûkaamavoota maita mathatû tu.”

²⁰ Elisha nîwakwire na andû makîmûthika. Ikundi cia athigari a mbaara cia andû a Moabu nîmaatharîkagîra vûrûri wa Isiraeli wa mwaka wa mwaka.

²¹ Vîndî îmwe andû marî mathikorî nîmoonire gîkundi Kîam athigari gîûkîte kûmatharîkîra. Andû acio nîmaaikirie kimba Kîam mûndû ûcio mbîrîrarî îrîa Elisha aathikîtwe magîcoka makîûra. Vîndî wa îo kimba kîu Kîamvutia mavîndî ma Elisha, mûndû ûcio nîwariûkire na akîrûngama.

Mbaara ya andû a Isiraeli na andû a Sîria

²² Hazaeli mûthamaki wa Sîria nîwavinyagîrîria andû a Isiraeli vîndî îrîa yonthe Jehoahazi aarî mûthamaki.

²³ Nwatî Ngai-Mûnene nîwamatugire na akîmeguîra ntha. Ndaamatiganîria macûkangue, nwatî nîwamatethirie nîûndû wa kîrîkanîro kîrîa aarûthîte na Iburahimu, Isaka na Jakovu. Ngai-Mûnene ndaanatiganîria andû ake nginya ûmûnthî.

²⁴ Rîrîa Hazaeli, mûthamaki wa Sîria aakwire, mûvîcî Benihadadi nîwatuîkire mûthamaki vuva wake.

²⁵ Jehoashi, mûthamaki wa Isiraeli nîwacokire akîvoota Benihadadi maita mathatû na akîîgwatîra rîngî matûûra manene ma Isiraeli marîa moocetwe nî Benihadadi kuuma kûrî îthe Jehoahazi marî mbaararî.