2Atha 11 - ÎVUKU RÎA ÛVORO MWARO

Athalia, mûthamaki wa Juda

¹ Rîrîa mûthamaki mûndûmûka Athalia, ng'ina wa Ahazia aamenyire atî mûvîcî nîwaûragwa, nîwathanire andû onthe a nyomba ya mûthamaki maûragwe.

² Nwatî Jehosheba, mwarî wa mûthamaki Joramu nîwocire Joashi, mûvîcî wa Ahazi na nthitho kuuma gatagatîrî ka anake a mûthamaki arîa maarî vakuvî kûragwa. Nîwamûthithire nyombarî ya kûmama marî na mûndû ûrîa wamûtungataga. Jehosheba aarî mwarwang'ina na Ahazia. Ûguo nîguo Jehosheba aathithire Joashi nîguo Athalia ndakamwone amûûraga.

³ Jehosheba eekarire na kamwana kau akathithîte hekarûrî îvinda rîa mîaka îtandatû. Vîndî îo Athalia nîke wathanaga vûrûrirî ûcio.

⁴ Nwatî mwakarî wa mûgwanja, Jehoiada nîwatûmanîre anene a athigari arîa maagitagîra mûthamaki wana arangîri a mûciî wa mûthamaki, na akiuga mathiî kûrî ke hekarûrî. Nîwarûthire kîrîkanîro nao na akîmevîtithia marî kûu hekarûrî, agîcoka akîmonia Joashi, mûvîcî wa mûthamaki Ahazia.

⁵ Nîwacokire akîathana atîrî, “Gîcunjî kîmwe Kîam ithatû Kîam andû enyu arîa marutaga wîra mûthenya wa thavatû nwanginya marangagîre mûciî wa mûthamaki mûndûmûka;

⁶ nakîo gîcunjî kîu kîngî kîmwe Kîam ithatû kîrî kîvingorî gîa Suri, na kîu kîngî Kîam ithatû kîrî kîvingorî kîrîa kîrî vuva wa arangîri.

⁷ Ikundi igîrî cia andû arîa matarutaga wîra mûthenya wa thavatû makaarangagîra hekarû makîrangîra mûthamaki mûndûmûka.

⁸ Mûkaarangagîra mûthamaki, wa mûndû agwatîte rûviû rwake na njara na mûthiîcage nake kûrîa kuonthe akaathiîcaga. Mûndû wa wonthe ûgaakuvîvîria varîa mûrî nwanginya akaaûragwa.”

⁹ Anene a athigari nîmeekire wata ûrîa mûthînjîri-Ngai Jehoiada amaathire na nîmaamûvirîre andû ao: arîa maarutaga wîra mûthenya wa thavatû na arîa mataarutaga wîra mûthenya wa thavatû.

¹⁰ Mûthînjîri-Ngai Jehoiada nîwavere anene acio a athigari matumû na ngo irîa ciarî cia mûthamaki Daudi, na ciaigîtwe hekarûrî.

¹¹ Arangîri nîmaarûngamire mathiîûrûrûkîrîtie metha ya kîgongoona na hekarû wa mûndû anyitîte îtumû rîake na njara makîrangîra mûthamaki.

¹² Jehoiada nîwacokire akîruta Joashi, mûvîcî wa mûthamaki nja na akîmwîkîra nthûmbî kîongo na akîmûnengera mawatho ma kûrûmîrîrwa nî mûthamaki. Joashi nîwacokire agîtîrîrua maguta na agîtuîka mûthamaki. Andû nîmaaringaringire mvî ciao na makiugîrîria atîrî, “Ûrotûûratûûra mûthamaki!”

¹³ Rîrîa Athalia eegwire ûrîa arangîri na andû maanegenaga, nîwathiîre hekarûrî kûrîa andû maaûnganîte.

¹⁴ Nîwaroririe na akîona mûthamaki mûcerû arûngamîte vakuvî na gîtugî vau mûromorî wa hekarû, kûringana na mûtugo. Nao anene a athigari na andû arîa maavuvaga tûrumbeta maarî vakuvî na mûthamaki nao andû onthe makiugagîrîria nî gîkeno makîvuvaga tûrumbeta. Athalia nîwatembûrangire nguo ciake na marûrû na akiugîrîria atîrî, “Gûkû nî kûregana na mûthamaki! Gûkû nî kûregana na mûthamaki!”

¹⁵ Mûthînjîri-Ngai Jehoiada ndeendaga Athalia aûragîrwe hekarûrî. Kwoguo nîwathire anene a athigari atîrî, “Mûruteni nja na mûmwige gatagatî ka mîvari ya athigari na mûrage mûndû wa wonthe ûkûgeria kûmûvonokia.”

¹⁶ Kwoguo nîmaamûnyitire na makîmûtonyereria varîa vetagwa Kîvingo Kîam Mbarathi makîmûvira nyombarî ya mûthamaki na makîmûragîra kuo.

Maûndû marîa Jehoiada aagarûrire.

¹⁷ Mûthînjîri-Ngai Jehoiada nîwatûmire mûthamaki Joashi na andû marûthe kîrîkanîro na Ngai-Mûnene atî makethagîrwa marî andû a Ngai-Mûnene. Nîwacokire akîrûtha kîrîkanîro na mûthamaki na andû.

¹⁸ Andû onthe nîmaacokire makîthiî hekarûrî na makîmîomora. Nîmoomomorire metha cia magongoona, mîvuanano, makîûragîra Matani, mûthînjîri-Ngai wa Baali vau mbere ya metha cia magongoona. Mûthînjîri-Ngai Jehoiada nîwaugire arangîri mathiî makarangîre hekarû.

¹⁹ Nîwathiîre na anene a athigari, arangîri a mûthamaki, na arangîri a mûciî wa mûthamaki na nîmaaumagaririe mûthamaki kuuma hekarûrî makîvîtûkîrîra vandû varîa vetagwa kîvingorî Kîam Arangîri na akîthiî agîkarîra gîtî gîake Kîam ûthamaki.

²⁰ Kwoguo andû onthe nîmecûrirwe nî gîkeno, narîo îtûûra rîkîvoorera nîûndû Athalia nîwaûragîrîtwe nyombarî ya mûthamaki.

²¹ Joashi aatuîkire mûthamaki wa Juda arî na ûkûrû wa mîaka mûgwanja (7).