2Atha 10 - ÎVUKU RÎA ÛVORO MWARO

Njiarwa cia Ahabu nîciaûragirwe

¹ Ahabu aarî na anake mîrongo mûgwanja (70) arîa maatûûraga Samaria. Kwoguo Jehu nîwandîkire maarûa na agîitûma kûrî atongoria a îtûûra rînene rîa Samaria, kûrî atongoria a mîvîrîga, na kûrî andû arîa maamenyagîrîra anake a Ahabu. Maarûa îo yandîkîtwe atîrî,

² “Gatagatîrî kenyu mûrî na anake a mûthamaki, na mûrî na ikaari cia mbaara na mbarathi, vamwe na matûûra marîa mairigîre wana indo cia mbaara; vîndî îrîa mûkaanyita maarûa îno,

³ mûkaathuura mwanake ûrîa mwaro na ûrî na ûvoti gûkîra arîa engî onthe gatagatîrî ka anake a mûthamaki, na mûmwîkarîrie gîtî Kîam ûthamaki Kîam îthe; mûcoke mûrûîrîre nyomba yake.”

⁴ Nwatî atongoria a Samaria nîmaamakire mûno na makiuga atîrî, “Ta roria, mûthamaki Joramu na mûthamaki Ahazia nîmaaremirwe nî kûregana na Jehu; nwa tue tûngîvota kûregana nake?”

⁵ Kwoguo mûmenyereri wa nyomba ya mûthamaki, atongoria a îtûûra rînene rîa Samaria, atongoria a mîvîrîga na andû arîa maamenyagîrîra anake a Ahabu nîmaatûmanire kûrî Jehu na makiuga atîrî, “Tue tûrî ndungata ciaku, na nîtwîvarîrîtie gwîka maûndû monthe marîa ûgûtwîra twîke. Nwatî tî tîtûthuura mûndû wanarî ûmwe atuîke mûthamaki. We îka wa ûrîa ûrona kwagîrîrîte.”

⁶ Jehu nîwacokire akîmandîkîra maarûa ya kaîrî akîmeera atîrî, “Ethîrwa nîmûnyitîte mbaru, na nî mwîvarîrîtie kûmbathîkîra, mûkaandetere atongoria a njiarwa cia mwathi wenyu gûkû Jezireeli rûyû îthaa wata rîîrî. ” Vîndî îo anake mîrongo mûgwanja (70) a mûthamaki Ahabu maatûûraga kwa atongoria a îtûûra rînene rîa Samaria arîa maamareraga.

⁷ Kwoguo rîrîa maanyitire maarûa îo, nîmaanyitire anake onthe mîrongo mûgwanja a mûthamaki Ahabu na makîmaûraga. Nîmeekîrire ciongo ciao ikavurî na makîvirîra Jehu kûu Jezireeli.

⁸ Rîrîa mûnjaama aakinyire na akîmwîra atî nîmaretete ciongo cia ciana cia mûthamaki, Jehu nîwaugire atîrî, “Igani ciongo icio irî irûndo igîrî vau nthî kîvingorî Kîam gûtonya îtûûrarî na mûtige ciîkare vo nginya kîraûko.”

⁹ Kîraûko gwakîa, Jehu nîwaumire na akîthiî kîvingorî gîa îtûûra. Nîwarûngamire mbere ya andû onthe arîa maarî vo na akiuga atîrî, “Mue mûtirî na mavîtia. Nie nînie naavangire ûrîa ngûregana na mwathi wakwa, na ngîmûraga. Nwatî nû waûragire aya onthe?

¹⁰ Ûguo nî kwonania atî maûndû monthe marîa Ngai-Mûnene aaririe megiî njiarwa cia Ahabu nîmavingu. Ngai-Mûnene ekîte ûrîa aaugire na njîra ya ndungata yake Elija.”

¹¹ Kwoguo Jehu nîwaûragire andû acio engî onthe a nyomba ya Ahabu arîa maatûûraga Jezireeli, vamwe na ndungata ciake cionthe, arata ake a vakuvî na athînjîri-Ngai. Gûtirî wanarî ûmwe wao watigarire arî mwoyo.

Andû a nyomba ya mûthamaki Ahazia nîmaaûragirwe

¹² Jehu nîwacokire akiuma Jezireeli na akîthiî Samaria. Arî njîrarî, vandû vetagwa, “Varîa arîthi mambaga magema,”

¹³ nîwacemanirie na andû a Nyomba ya Ahazia, mûthamaki wa Juda ûrîa waûragirwe na akîmaûria atîrî, “Mue mûrî a?” Andû a nyomba ya Ahazia nîmaacokirie atîrî, “Tue tûrî andû a nyomba ya Ahazia na tûthiîte gûkethia andû a nyomba ya mûthamaki vamwe na ciana cia Jezebeli, mûka wa mûthamaki.”

¹⁴ Nake Jehu nîwathire ndungata ciake atîrî, “Manyiteni marî mwoyo!” Nacio ndungata ciake nîciamanyitire na akîmaûragîra vakuvî na kîthima Kîam “Varîa arîthi mambaga magema.” Onthe maarî andû mîrongo îna na îrî (42), na gûtirî wanarî ûmwe watigarire arî mwoyo.

Andû onthe a nyomba ya Ahabu arîa maatigarîte nîmaaûragirwe.

¹⁵ Jehu nîwambîrîre rûgendo rîngî, na arî njîrarî, nîwacemanirie na Jehonadabu mûvîcî wa Rekabu. Jehu nîwamûkethirie na akîmûria atîrî, “Wîna meciria ta makwa? Nîûkûnyita mbaru?” Nake Jehonadabu nîwacokirie atîrî, “Îî, nîngûkûnyita mbaru.” Jehu nîwacokire akîmwîra atîrî, “Ethîrwa nî guo, rete njara yaku.” Nîmaagwatanire njara na Jehu akîmûtethereria gûtwa gîkaarirî Kîam mbarathi.

¹⁶ Jehu nîwerire Jehonadabu atîrî, “Ûka tûthiî nawe nîguo ûkeyonere ûrîa nîîrutîrîte gûtungatîra Ngai-Mûnene.” Kwoguo nîmaathiîre Samaria marî gîkaarirî kîmwe.

¹⁷ Rîrîa maakinyire Samaria, Jehu nîwaûragire andû onthe a nyomba ya Ahabu arîa maatigarîte. Eekire ûguo wata ûrîa Ngai-Mûnene aarîtie na njîra ya Elija.

Andû arîa maagoocaga Baali nîmaaûragirwe

¹⁸ Jehu nîwerire andû onthe a Samaria maûngane vamwe na akîmeera atîrî, “Mûthamaki Ahabu aatungatîre Baali vanini, nwatî nie nînîmîtungatîra makîria.

¹⁹ Kwoguo mbîtîrani arathi onthe a Baali, andû onthe arîa mamîgoocaga, na athînjîri-Ngai a yo onthe; na mûtigatige wanarî ûmwe, nîûndû nînîrenda kûrutîra Baali îgongoona rînene mûno, na mûndû ûrîa ûtagûûka nîkwa akaûragwa.” (Jehu eekire ûguo na wara nîguo aûrage andû onthe arîa magoocaga Baali.)

²⁰ Jehu nîwacokire akîathana atîrî, “Menyithaniani mûthenya wa kûgooca Baali!” Nao nîmaamenyithanirie ûndû ûcio.

²¹ Jehu nîwatûmanire vûrûrirî wonthe wa Isiraeli, nîguo andû onthe arîa magoocaga Baali maûke. Gûtirî wanarî ûmwe watîrire. Onthe nîmaatonyire hekarûrî ya Baali na magîcûra kuo taka.

²² Jehu nîwacokire akîra mûthînjîri-Ngai ûrîa wamenyagîrîra nguo irîa nyamûre atîrî, “Ruta nguo icio nyamûre na ûnengere andû onthe arîa maûkire kûgooca Baali.” Kwoguo nîwarutire nguo icio nyamûre na akînengera andû acio maagoocaga Baali.

²³ Jehu nîwatonyire hekarûrî ya Baali marî na Jehonadabu mûvîcî wa Rekabu na akîra andû acio magoocaga Baali atîrî, “Roraniani mwone atî gûtirî ndungata ya Ngai-Mûnene gatagatîrî kenyu tiga agooci a Baali onga.”

²⁴ Jehu na Jehonadabu nîmaacokire magîtonya ndaarî kûrutîra Baali magongoona na matega ma kûvîvua. Vîndî îo, Jehu aaigîte arûme mîrongo înana (80) nja ya hekarû na akamatha atîrî, “Mûkaaûraga andû aya onthe, na mûndû ûrîa ûkarekereria wanarî ûmwe wao aûre nîkwa akaûragwa!”

²⁵ Kwoguo rîrîa Jehu aarîkirie kûruta matega, nîwerire arangîri na anene atîrî, “Tonyani mûmaûrage onthe, na mûtikarekererie wanarî ûmwe aûre!” Nao nîmaatonyire makîmaûraga na magikia mîîrî yao nja ya hekarû. Nîmaacokire magîtonya vandû varîa vatheru va hekarû ya Baali

²⁶ na makîruta gîtugî Kîammûre kîrîa Kîamrî mûvuanano wa Ashera na magîkîvîvia.

²⁷ Kwoguo nîmaacûkangirie gîtugî Kîammûre Kîam Baali vamwe na hekarû, na magîtua hekarû îo kîoro, na ûguo nîguo îtûûraga nginya ûmûnthî.

²⁸ Ûguo nîguo Jehu aathiririe ûgooci wa Baali kûu Isiraeli.

²⁹ Nwatî Jehu nîwekire wîvia wata ûrîa wekirwe nî Jeroboamu, mûvîcî wa Nefati, ûrîa watûmire andû a Isiraeli mevie na njîra ya gûtûma magooce mîvuanano ya tûcaû twa thaavu îrîa yarî Betheli na Dani.

³⁰ Nake Ngai-Mûnene nîwerire Jehu atîrî, “Nîwîkîte njiarwa cia Ahabu maûndû monthe marîa nendaga wîke, kwoguo nînakwîrîra atî, njiarwa ciaku nginya rûciaro rwa kana nî mageekarîra gîtî Kîam ûthamaki kûu Isiraeli.”

³¹ Nwatî Jehu ndaathîkîra watho wa Ngai-Mûnene Ngai wa Isiraeli na ngoro yake yonthe. Vandû va ûguo, nîwekire wîvia ta ûrîa wekirwe nî Jeroboamu, ûrîa watûmire andû a Isiraeli mevie.

Gûkua kwa Jehu

³² Vîndî îo Ngai-Mûnene nîwambîrîre kûnyivanyivia vûrûri wa Isiraeli. Hazaeli, mûthamaki wa Sîria nîwavootire vûrûri wonthe wa Isiraeli

³³ kuuma mwena wa îrathîro wa Rûnjî rwa Jorodani, vûrûri wonthe wa Gileadi, vûrûri wa andû a Gadi, Reubeni, Manase, na kuuma Aroeri îrîa îrî Kîamndarî Kîam Arinoni kûu vûrûrirî wa Gileadi na Bashani.

³⁴ Maûndû marîa mengî monthe marîa Jehu eekire vamwe na ciîko ciake cia ûcamba nîmandîke Îvukuurî rîa Maûndû ma Tene ma Athamaki Isiraeli.

³⁵ Jehu nîwakwire na akîthikwa Samaria, nake mûvîcî Jehoahazi agîtuîka mûthamaki vuva wake.

³⁶ Jehu aathanîte kûu Isiraeli arî Samaria îvinda rîa mîaka mîrongo îîrî na înana (28).