2Atha 1 - ÎVUKU RÎA ÛVORO MWARO

Elija na mûthamaki Ahazia

¹ Vuva wa gûkua kwa Ahabu, mûthamaki wa Isiraeli, andû a Moabu nîmaaregire kwathwa nî andû a Isiraeli.

² Ahazia, mûthamaki wa Isiraeli arî Samaria nîwavarûkire kuuma ndiricarî ya nyomba yake ya îgûrû na akîrwara mûno. Kwoguo nîwatûmire anjaama akîmeera atîrî, “Thiîni kûrî Baali-zebubu, ngai ya îtûûra rîa Ekironi mûkamîûrie ûtaaro kana nîngûvora mûrimû ûyû.”

³ Nwatî mûraika wa Ngai-Mûnene nîwerire mûrathi Elija kuuma Tishibe athiî agacemanie nao na amaûrie atîrî, “Nîkwa gûtarî ngai gûkû Isiraeli atî nîguo mûthiî mûkaûrie ûtaaro kûrî Baalizebubu, ngai ya Ekironi?

⁴ Rîu thiîni mwîre mûthamaki atî Ngai-Mûnene augîte atîrî, ‘Tîûvora mûrimû ûyû waku, nwatî nama we nîûgûkua!’ ” Kwoguo Elija nîwekire wata ûrîa Ngai-Mûnene aamwathire.

⁵ Anjaama nîmaacokire kûrî mûthamaki, nake mûthamaki nîwamaûririe atîrî, “Mwacoka nîkî?”

⁶ Nao nîmaamûcokerie atîrî, “Kûrî mûndûmûrûme ûtûtûngire na atwîra tûcoke kûrî mûthamaki ûcio ûtûtûmîte na tûmwîre atî Ngai-Mûnene augîte atîrî, ‘Nîkwa gûtarî ngai gûkû Isiraeli atî nîguo ûtûme anjaama mathiî makaûrie ûtaaro kûrî Baalizebubu, ngai ya Ekironi? Kwoguo tîûvora mûrimû ûyû waku, nwatî nama we nîûgûkua!’ ”

⁷ Mûthamaki nîwamaûririe atîrî, “Mûndûmûrûme ûcio ûmûtûngire na amwîra maûndû mau arekariî atîa?”

⁸ Nao nîmaamûcokerie atîrî, “Arekîrîte nguo ya guoya, na akeyova mûcivi wa rûûo kîûnûrî gîake.” Nake mûthamaki nîwaugire atîrî, “Ûcio nî Elija Mûtishibi.”

⁹ Mûthamaki nîwacokire agîtûma mûnene wa athigari mîrongo îtano na athigari acio mathiî makagîre Elija. Mûnene ûcio nîwethîre Elija ekarîte nthî gacûmbîrî ga kîrîma na akîmwîra atîrî, “Mûndû wa Ngai, mûthamaki akwîra ûnyûrûrûke.”

¹⁰ Nwatî Elija nîwacokerie mûnene ûcio atîrî, “Ethîrwa nîrî mûndû wa Ngai, ‘Mwaki ûronyûrûrûka kuuma îgûrû na ûgûcûkangie vamwe na athigari aku mîrongo îtano!’ ” Wa rîmwe mwaki nîwacokire ûkînyûrûrûka kuuma îgûrû na ûgîcûkangia mûnene ûcio wa athigari mîrongo îtano wa vamwe na athigari acio ake.

¹¹ Mûthamaki nîwacokire agîtûma mûnene wîngî wa athigari mîrongo îtano na athigari acio mathiî makagîre Elija. Nîwathiîre na akîmwîra atîrî, “Mûndû wa Ngai, mûthamaki akwîra ûnyûrûrûke na îvenya!”

¹² Nake Elija nîwacokerie mûnene ûcio atîrî, “Ethîrwa nîrî mûndû wa Ngai, mwaki ûronyûrûrûka kuuma îgûrû na ûgûcûkangie vamwe na athigari aku mîrongo îtano!” Wa rîmwe mwaki nîwacokire ûkînyûrûrûka kuuma îgûrû na ûgîcûkangia mûnene ûcio wa athigari mîrongo îtano wa vamwe na athigari acio ake.

¹³ Wa rîngî mûthamaki nîwatûmire mûnene wa kathatû wa athigari mîrongo îtano na athigari ake. Mûnene ûcio nîwaunûkirie kîrîmarî akîthiî kûrî Elija, agîturia maru mbere yake na akîmûthaitha akîmwîra atîrî, “Mûndû wa Ngai, nakûthaitha ûmbîguîre ntha vamwe na athigari akwa na ndûgatûûrage!

¹⁴ Anene acio engî oîrî vamwe na athigari ao nîmaacûkangirue nî mwaki kuuma îgûrû; nwatî nakûthaitha ûmbîguîre ntha!”

¹⁵ Nake mûraika wa Ngai-Mûnene nîwerire Elija atîrî, “Nyûrûrûkani nake; ndûkamake.” Kwoguo Elija nîwathiîre marî na mûnene ûcio kûrî mûthamaki

¹⁶ na akîra mûthamaki atîrî, “Ngai-Mûnene akwîrîte atî nîûndû nîwatûmire anjaama makaûrie ûtaaro kûrî Baalizebubu, ngai ya Ekironi takwa Isiraeli gûtarî ngai îngîûrua ûtaaro, we tîûvora mûrimû ûyû waku, nwatî nîûgûkua!”

¹⁷ Kwoguo Ahazia nîwakwire wata ûrîa Ngai-Mûnene aaugîte kûvîtûkîrîra kûrî Elija. Ahazia ndaarî na mwana wa kavîcî, kwoguo Joramu, mûrwang'ina nîwatuîkire mûthamaki vuva wake. Vîndî îo yarî mwaka wa kaîrî wa Jehoramu, mûvîcî wa Jehoshafati arî mûthamaki wa Juda.

¹⁸ Maûndû mau mengî monthe marîa mûthamaki Ahazia eekire mandîkîtwe maûndûrî ma tene ma athamaki a Isiraeli.