2Ath 3 - ÎVUKU RÎA ÛVORO MWARO

Tûvoyagîreni

¹ Ngîrîkîrîria ariû na aarî a îthe wetû, tûvoyagîreni nîguo ndûmîrîri ya Mwathani îtambe na îvenya na andû mamîamûkîre na gîtîîo wata ûrîa gwekîkire gatagatîrî kenyu.

² Tûvoyagîreni nîguo Ngai atûgitîre kuuma kûrî andû arîa aganu na arîa acûku nîûndû tî andû onthe metîkîtie.

³ Nwatî Mwathani nîmwîvokeku na nîakûmûva vinya na amûgitîre kuuma kûrî Ûrîa Mûcûku.

⁴ Mwathani nîatûmaga tûgîe na mwîvoko îgûrû rîenyu atî nîmwîkaga maûndû marîa twamwîrire na nîmûkûthiî na mbere gwîka wa ûrîa tûkûmwîra.

⁵ Mwathani aromûtongoria nîguo mûmenye mûno wendani wa Ngai na ûkirîrîria ûrîa ûvecanagwa nî Kristû.

Kwathwa ûvororî wîgiî kûruta wîra

⁶ Ariû na aarî a îthe wetû, tûramwatha na rîîtwa rîa Mwathani wetû Jesû Kristû atî mûtikathiîcanagie na ariû na aarî a îthe wetû arîa igûta na matarûmagîrîra maûndû marîa twamûthomithirie.

⁷ Nîûndû mue nîmwîcî waro atî nîmwagîrîrwe nî gwîka maûndû marîa twekaga. Tue tûtiarî igûta vîndî îrîa twekaraga namue.

⁸ Tûtietîkagîra kûrîa irio cia mûndû tûtakûrîva. Nîtwarutaga wîra na vinya mûno ûtukû na mûthenya nîguo tûtigatuîke mûrigo kûrî mûndû wanarî ûmwe gatagatîrî kenyu.

⁹ Twarî na ûvoti wa kûmûria mûtûtethie. Nwatî tûtiamûria mûtûtethie nîûndû twarutaga wîra nîguo tûtuîke kîonereria Kîam ûrîa mwagîrîrwe nî gwîka.

¹⁰ Rîrîa twarî namue nîtwamwîraga atîrî, “Mûndû ûrîa ûtarutaga wîra ndagîrîrwe nî kûrîa irio.”

¹¹ Tue tûrauga ûguo nîûndû tûregua atî andû amwe gatagatîrî kenyu matirutaga wîra. Matindaga makîûrûra na magîtangaga andû arîa engî mawîrarî mao.

¹² Na rîîtwa rîa Mwathani wetû Jesû Kristû, nîtûkwatha andû acio na tûmere atî mekarage na mîtugo mîaro na marutage wîra nîguo meyonagîre kîndû gîa gwîtethia mûtûûrîrerî wao.

¹³ Nwatî mue Ariû na aarî a îthe wetû, mûtîkanoge nî gwîka waro.

¹⁴ Ethîrwa kûrî mûndû ûkaarega kwathîkîra ûrîa tûmwîrîte maarûarî îno, menyani mûndû ûcio na mûtikathiîcanie nake nîguo aconoke.

¹⁵ Mûtikamûtue ta nthû yenyu, nwatî mûkanagieni ta arî mûriû kana mwarî wa îthe wetû.

Ciugo cia kûrîkia

¹⁶ Mwathani ûrîa arî ke kiumo Kîam thayû, aromûva thayû vingo cionthe na maûndûrî monthe. Mwathani nîekare namue muonthe.

¹⁷ Nie Paûlo nîrandîka ngethi ino na njara ciakwa. Ûguo nîguo mandîkaga rîîtwa rîakwa maarûarî ciakwa cionthe.

¹⁸ Wega wa Mwathani wetû Jesû Kristû ûrogîa namue muonthe.