2Akor 9 - ÎVUKU RÎA ÛVORO MWARO

Ûtethio wa akristiano arîa engî

¹ Gûtirî na vata wa kûmwandîkîra ûndûrî wîgiî ûtethio ûrîa ûratûmîrwa andû a Ngai arîa marî Judea.

² Nie nîmbicî atî mue nîmûrenda gûtethia, nanie nînetîire kûrî andû a Makedonia nîûndû wenyu na ngîmeera atîrî, “Ariû na aarî a îthe wetû a Akaia methîrîtwe mevarîrîtie gûtethia kuuma mwaka mûthiru.” Wendi wenyu wa kûvecana nîûtûmîte amwe ao mende kûvecana.

³ Nwatî nîndûmîte ariû a îthe wetû aya nîguo wîtîîi wetû nîûndû wenyu maûndûrî mama ndûkagarûrûke ûtuîka wa mana. Nwatî wata ûrîa nie naaugire, mue mûkethîrwa mûrî evarîriu na ûtethio wenyu.

⁴ Nwatî ethîrwa nwa tûke na andû amwe kuuma Makedonia na mone atî mue mûtirî evarîriu, tue nîtûgaaconoka wana tûtagûtara gîconoko kîenyu nîûndû nîtwîthîrîtwe tûmwîvokete mûno.

⁵ Kwoguo nînoonire kwagîrîte mbûrie ariû a îthe wetû aya maûke kûrî mue mbere ya mbûka nîguo mavarîrîrie kîveo kîrîa mweranîre kûvecana. Nakîo gîkeethîrwa kîvecanîtwe na kwîyendera na tî kûringîrîrua.

⁶ Ririkanani atî mûndû ûrîa ûvandaga tûnini agaaketha tûnini. Nake ûrîa ûvandaga nyîngî agaaketha nyîngî.

⁷ Mûndû nîwagîrîrwe nî kûvecana wata ûrîa ke atuîte kûvecana. Na mûndû ndakavecane takwa akûringîrîrua, nîûndû Ngai nî akenagua nî ûrîa ûvecanaga akenete.

⁸ Nake Ngai arî na ûvoti wa kûmûva nyîngî makîria ya irîa mûvatarîte nîguo vîndî cionthe mwîthagîrwe mûrî na indo cionthe irîa mue ene mûvatarîte na ciîngî nyîngî nîûndû wa wîra mwaro.

⁹ Wa ta ûrîa mandîko matheru maugîte atîrî: “Ke avecanaga na ûtaana kûrî arîa mavatarîte, na ntha ciake nî cia tene na tene.”

¹⁰ Ngai ûrîa ûvecaga mûrîmi mbeû ya kûvanda na akamûva mûgate wa kûrîa, nwake ûkaamûva mbeû îrîa mûvatarîte. Nîûndû wa ûtaana wenyu Ngai nîagaatûma mbeû îo îkûre na îngîvie maketha.

¹¹ Ke agatûmaga mûtonge na njîra cionthe nîguo mûvecanage vîndî cionthe. Nao andû eengî magaacokagia ngatho kûrî Ngai nîûndû wa iveo cienyu irîa makamûkagîra kuuma kûrî tue.

¹² Wîra ûyû mûraruta ndûratethia andû a Ngai onga, nwatî nîûratûma andû macokie ngatho nyîngî makîria kûrî Ngai.

¹³ Wîra wenyu wa ûtungata nîwonanîtie atî nîmwathîkîrîte ûvoro mwaro ûrîa mumbûraga wa Kristû na andû eengî magaakumia Ngai nîûndû wa ûtaana wenyu na nîûndû nîmûgaanaga indo cienyu nao wa vamwe na andû arîa engî.

¹⁴ Nîûndû wa wendo mûnene ûrîa marî naguo kûrî mue, makaamûvoyagîra nîûndû wa wega mwîngî wa Ngai ûrîa mûrî naguo.

¹⁵ Nîtûcokie ngatho kûrî Ngai nîûndû wa kîveo gîake gîtarî kîthimo.