2Akor 8 - ÎVUKU RÎA ÛVORO MWARO

Ûtaana wa Akristiano

¹ Ariû na aarî a îthe wetû, nîtûkwenda mûmenye ûrîa Ngai onanîtie wega wake makanitharî marîa marî Makedonia.

² Nîmaavîtûkîrîrîte mageriorî marito na mathînarî meengî. Nwatî wana ethîrwa maarî athîni mûno, gîkeno Kîamo Kîamrî kîngî nîûndû nîmaavecanire na ûtaana.

³ Nie nwa nîmwîre na ma atî nîmaavecanire kûringana na ûvoti wao, wana makîria ya ûvoti wao. Na njîra ya wendi wao

⁴ nîmaatûririe na nîmaatûthaithire metîkîrue magwatanîre gûtethia andû a Ngai arîa maarî Judea.

⁵ Meekire makîria ya ûrîa tûngîerîgîrîre! Mbere maambire makîîvecana kûrî Mwathani na magîcoka makîîvecana kûrî tue nîûndû wa wendi wa Ngai.

⁶ Kwoguo nîtwaûririe Tito athiî na mbere kûmûtethia mûrîkie ûtungati ûcio wa mwanya nîûndû nîke wawambîrîrîtie.

⁷ Mue mûrî itonga mûno cia maûndû monthe, wîtîkiorî, mîariorî, ûmenyorî, na wendirî wenyu wa gûtethania na wendo wenyu kûrî tue. Kwoguo nîtûkwenda mûtuîke ataana ûtungatarî wa kwendana wana guo.

⁸ Nie ndiramwîra ûguo takwa nîramwatha. Nwatî na njîra ya ûrîa arîa engî mendete gûtethia, nîrenda kûmenya ûrîa wendo wenyu wana guo ûrî wa ma.

⁹ Mue nîmwîcî wega wa Mwathani wetû Jesû Kristû. Wana ethîrwa aarî mûtongu, ke nîwetwire mûthîni nîûndû wenyu nîguo atûme mûtuîke atongu na njîra ya ûthîni wake.

¹⁰ Naguo woni wakwa nî atî nî waro mûno mûrîkie rîu ûndû ûrîa mwambîrîrie kuuma mwaka mûthiru. Nîmue mwarî a mbere, na twa gwîka tu, nwatî wana kwenda gwîka.

¹¹ Thiîni na mbere naguo na mûûrîkie. Gîani na wendi wa kûûrîkia wata ûrîa mwarî na mîvango yaguo, na mûûrute mûkîvûthagîra kîrîa mûrî nakîo rîu.

¹² Ethîrwa mûrî na wendi wa kûvecana, Ngai akaamûkîra kîveo kîenyu kûringana na ûrîa mûndû akûvecana kîrîa arî nakîo, tî kîrîa atarî nakîo.

¹³ Nie tîkwa nîrageria kûmwigîrîra mûrigo atî nîguo andû engî mavûthîrwe.

¹⁴ Nwatî kavindarî gaka mûrî na indo nyîngî, nîkwagîrîrîte mûtethie arîa marî na maavata. Nayo vîndî îrîa mue mûkaavatara nao marî nacio, nîmakaamûtethia, nîguo mwîthagîrwe mwîgananîte.

¹⁵ Wata ûrîa mandîko matheru maugîte atîrî, “Mûndû ûrîa waûnganirie nyîngî ndaagîa na nyîngî mûno, nake ûrîa waûnganirie tûnini ndaagîa na tûnini mûno.”

Tito na arîa maathiîcanagia nao

¹⁶ Nîtûgûcokia ngatho kûrî Ngai ûrîa ûtûmîte Tito agîe na wendi wa kûmûtethia ta ûrîa tûrî naguo.

¹⁷ Nîûndû ke twa gwîtîkîra kuonga ûrîa twamwîrire, nwatî ke aarî na wendi wa gûtethia na nîwatwire athiî kûrî mue nîûndû wa kwîyendera ke mwene.

¹⁸ Vamwe nake nîtûgûtûma mûrû wa îthe wetû ûrîa mûve gîtîîo mûno makanitharî monthe nîûndû wa wîra wake wa kûvunjia ûvoro ûrîa mwaro.

¹⁹ Wa vamwe na ûguo, ke nîathuurîtwe nî andû a makanitha nîguo athiîcanie natue rîrîa tûkûruta wîra ûyû wa ûtethio. Tûreka ûguo nîûndû wa ûgooci wa Mwathani na twonanie atî nîtûrenda gûtethia.

²⁰ Nîtûrageria gûtikagîe na ûndû ûngîtûma andû magîe na înegene ûvororî wîgiî ûrîa tûgûtûmîra mbeca ino mûrutîte na wendo.

²¹ Mûvango wetû nî gwîka ûrîa kwagîrîrîte mbere ya Mwathani na mbere ya andû.

²² Kwoguo nîtûgûtûma mûrû wa îthe wetû wîngî nîguo maûke marî vamwe na Tito. Nîtûgeretie mûrû wa îthe wetû ûcio maita meengî na nîtwonete arî na wendi mûno gûtethia. Na rîu nîûndû wa ûrîa amwîvokete, arî na wendi makîria wa gûka kûmûtethia.

²³ Ûvororî wîgiî Tito, nîtûthiîcanagia na tûkarutithania wîra nake wa kûmûtethia. Ûvororî wîgiî ariû a îthe wetû acio engî marathiîcania nake, matûmîtwe nî makanitha na maretaga riiri kûrî Kristû.

²⁴ Kwoguo onaniani wendo wenyu kûrî o, nîguo makanitha monthe makaamenya nama atî tûtirî na mavîtia tûgîtîîa nîûndû wenyu.