2Akor 7 - ÎVUKU RÎA ÛVORO MWARO

¹ Arata etû ciîranîro ino cionthe nî tue tûthondekeretwe. Kwoguo tigani twîtherie kuuma kûrî ûndû wa wonthe ûrîa ûtûmaga mwîrî na roho ciîkare itarî ntheru. Tigani twîthagîrwe tûrî atheru viû na njîra ya gûtûûra twîtigîrîte Ngai.

Gîkeno kîa Paûlo

² Tûvingûrîreni ngoro cienyu. Tue tûtivîtîrîtie mûndû, tûticûkîtie mûndû, kana tûkaveenia mûndû wana ûrîkû.

³ Nie ndirauga ûguo nîguo nîmûtuîre. Nînaamwîrire atî tue nîtûmwendete mûno na atî vîndî cionthe tûkethagîrwa tûrî vamwe vîndî îrîa tûrî mwoyo kana twakua.

⁴ Nie nînîmwîvokete mûno; nînîtîîaga mûno nîûndû wenyu. Nîrî na ûmîrîru mathînarî metû monthe na nîmbîcûrîtwe nî gîkeno kîngî.

⁵ Vîndî îrîa twakinyire Makedonia, tûtianogoka. Kwarî na mathîna kûndû kuonthe, ngarari na andû arîa engî na tûkîgua guoya ngororî cietû.

⁶ Nwatî Ngai ûrîa ûmagîrîria arîa marî na mathîna, nîwatûmîrîrie rîrîa Tito aûkire.

⁷ Na tûtiaûmîrîrue nî gûka gwake kuonga, nwatî wana nîûndû wa kûmenya ûrîa mwamûmîrîrie. Ke nîwatwîrire ûrîa mûrî na wendi mwîngî wa kwenda kûmona, ûrîa mûrî na kîeva na ûrîa mwîvarîrîtie kûngitîra. Kwoguo wana nîmûkenu mûno rîu.

⁸ Nîûndû wana ethîrwa maarûa îo yakwa nîyatûmire mwîgue kîeva, nie ndirerira. Nînîngîeririre rîrîa naamenyire atî maarûa îo nîyamwîguithirie kîeva wana ethîrwa mwegwire kîeva kavinda kanini.

⁹ Nwatî rîu nîrî na gîkeno na tî nîûndû wa kûmwîgwithia kîeva, nwatî nîûndû kîeva kîenyu nîgîatûmire mûgarûrûke. Kîeva kîrîa mwegwire nî Ngai watûmire mwîgue, kwoguo tue tûtiamûvîtîria.

¹⁰ Nîûndû kîeva kîrîa Ngai egwithanagia nîgîtûmaga andû magarûrûke na gîkamatongoria kûrî ûvonokio, na ûguo ndwagîrîrwe gûtûma mûndû akua ngoro. Nwatî kîeva kîrîa kiumanaga na ûmûndû nîkîretage gîkuû.

¹¹ Nîûndû ûcio taroriani ûrîa Ngai eekire nîûndû wa kîeva kîenyu. Kîeva kîu nîgîatûmire mûgîe na kîîo, gîgîtûma mwende kwonania atî mûtiarî na mavîtia, gîgîtûma mûrakare na mwîtigîre. Nîgîatûmire mwende kûmona, kwîrutîra na kwenda kwona gûgîkwa ûrîa kwagîrîrîte. Nîmwonanîtie atî mûtirî na mavîtia maûndûrî monthe.

¹² Kwoguo wana ethîrwa nînaandîkire maarûa îo, ndiamîandîkire nîûndû wa mûndû ûrîa wavîtirie kana mûndû ûrîa wavîtîrue. Vandû va ûguo namîandîkire nîguo nîmwonie cararûkû mbere ya Ngai ûrîa wîrutîri wenyu kûrî tue wîkariî.

¹³ Kîu nîkîo gîatûmire tûmîrîria. Wa vamwe na kûmîrîrua gwetû, nîtwakenire mûno twona ûrîa Tito aakenete nîûndû wa ûrîa muonthe mwatûmire oneke arî mwîganîru.

¹⁴ Nîûndû rîrîa nonanirie mwîtîîo kûrî ke nîûndû wenyu, mue mûtianjonorithia. Kwoguo mwîtîîo wetû kûrî Tito nîwonanîtie atî nî wa ma wata ûrîa tûtwîre tûmwîraga ûma.

¹⁵ Nîûndû wa ûguo wendo wake kûrî mue nîûthiîte ûkîgîcaga vinya makîria aririkana ûrîa mue muonthe mwevarîrîtie kwathîkîra kîrîra gîake. Wana nîmwamûnyitire ûgeni mûrî na gîtîîo kînene.

¹⁶ Nie nîngenaga nîûndû nînîmwîvokete mûno.