2Akor 5 - ÎVUKU RÎA ÛVORO MWARO

¹ Tue nîtwîcî atî kûrî vîndî îgema rîîrî rîetû tûtûûraga rîa gûkû nthî rîkaatharua. Narîo îgema rîu nî mîîrî îno yetû. Vîndî îo Ngai akeethîrwa arî na nyomba yetû kûu îgûrû. Nyomba îo nîke ke mwene ûtumîte na îgaatûûra tene na tene.

² Na rîu tue nîtûcayaga, tûkîîriragîria mûno gwîkîrwa nyomba îrîa yumaga îgûrû.

³ Na twarîkia kûmîkîra tûtigaacoka kwonwa tûrî njaga.

⁴ Rîrîa tûrî îgemarî rîîrî rîa nthî, tûvevûkaga tûkîgua tûrî akinyîrîrie. Tî atî nîkwa tûkwenda gûtigana na mîîrî yetû ya gûkû nthî, nwatî tûrenda twîkîrwe mîîrî îrîa ya îgûrû. Na twekîrwa mîîrî îo, mîîrî îrîa îkucaga nî îkaagarûrwa îtuîke ya gûtûûra.

⁵ Ngai nîke ûtûvarîrîtie nîûndû wa ûgarûrûku ûyû. Nake nîatûvete Roho wake wa kwonania kîrîa atwigîrîte.

⁶ Kwoguo vîndî cionthe twîthagîrwa tûrî na ûmîrîru. Tue nîtwîcî atî vîndî îrîa tûrî mwoyo gûkû nthî tûrî na mwîrî, twîthagîrwa tûrî kûraca na Mwathani.

⁷ Nîûndû tûthiîcaga na wîtîkio, tî na ûrîa tûrona.

⁸ Tûrî na ûmîrîru mûno na nwa twende kuuma mwîrîrî ûyû nîguo twîthagîrwe tûrî mûciî na Mwathani.

⁹ Makîria ya maûndû monthe twendaga gûkenia Mwathani wana ethîrwa tûrî mûciî gûkû nthî kana kûu îgûrû.

¹⁰ Nîûndû tuonthe nwanginya tûkaarûgama mbere ya Kristû tûtuîrwe nîke. Wa mûndû nîakaagwata kîrîa kîmwagîrîrîte, kîrî Kîamro kana kîrî gîcûku kûringana na wîra ûrîa mûndû arutîte arî na mwîrî.

Gûtuîka arata a Ngai na njîra ya Kristû

¹¹ Tue nîtwîcî gwîtigîra Mwathani, kwoguo nîtûgeragia kûringîrîria andû arîa engî. Ngai nîatwicî viû, nanie ngwîvoka atî ngororî cienyu wananie nîmûmbîcî.

¹² Tue tûtiramûringîrîria mûtwîtîkîre rîngî, nwatî tûrageria kûmûva gîtûmi kîrîa kîngîtûma mwîtîîe nîûndû wetû. Kwoguo mwarîkia gûkîmenya mûkaavotaga gûcokia ciûria cia arîa metîîaga nîûndû wa ûrîa andû monekanaga na tî ûndû wa ûrîa mekariî ngororî ciao.

¹³ Nîûndû ethîrwa tûrî na meciria matarî maro, tûrî namo nîûndû wa Ngai; na ethîrwa tûrî na meciria maro, tûrî namo nîûndû wenyu.

¹⁴ Tue twathagwa nî wendo wa Kristû, nîûndû nîtûmenyete atî mûndû ûmwe nîwakwire nîûndû wa andû onthe. Kwoguo andû onthe nîmagaanaga gîkuû gîake.

¹⁵ Kristû aakwire nîûndû wa andû onthe nîguo andû arîa matûûraga mwoyo matigatûûre mwoyo nîûndû wao o ene, nwatî nîûndû wake ûrîa wakwire na akîriûkua nîûndû wao.

¹⁶ Kwoguo kuuma rîu, tûtigûcoka gûtucagîra mûndû wa wonthe kûringana na meciria ma andû. Wana ethîrwa vîndî îmwe nîtwatuîrîre Kristû kûringana na ûrîa andû meciragia, rîu tûtiîkaga ûguo.

¹⁷ Mûndû wa wonthe wînyitithanîtie na Kristû, ke nî kîûmbe gîcerû. Maûndû marîa makûrû nî mathiru, namo maûndû marîa macerû nîmaûku.

¹⁸ Maûndû mama monthe mekîtwe nî Ngai ûrîa watwîguithanirie nake ke mwene na njîra ya Kristû, na agîtûva wîra wa kwîgwithanagia andû nake.

¹⁹ Ndûmîrîri yetû nî atî na njîra ya Kristû, Ngai nîwegwithanagia andû onthe. Ngai ndaatara mevia mao, na nîatûvete ndûmîrîri ya kwîgwithania andû nake.

²⁰ Kwoguo, tue tûrî arîrîria a Kristû ta arî Ngai ûrathaithana na njîra yetû. Nîtûramûthaitha vandûrî va Kristû, mwîgwithanue na Ngai.

²¹ Kristû ndaarî na mevia, nwatî nîûndû wetû Ngai nîwatûmire atuîke wa kûgaa mevia metû nîguo atî tûrî kîndû kîmwe nake tûkaavota kûgaa ûthingu wa Ngai.