2Akor 4 - ÎVUKU RÎA ÛVORO MWARO

Ûtonga wa Kîîroho ûrî nyûngûrî cia yûmba

¹ Tûrî na ûtungata ûyû tûvetwe nî Ngai nîûndû wa ntha ciake, kwoguo tûtingîûrwa nî thayû.

² Nîtûreganîte na maûndû ma nthoni marîa mekagîrwa nthithorî. Nîtûreganîte na maûndû ma wara, kana kûgarûrania ciugo cia Ngai ituîke cia maveeni. Nwatî twaragia ûvoro wa ma tûrî mbere ya Ngai tûkîîrîgagîrîra atî andû onthe arîa marî na thamiri mbaro nîmagûtwîtîkîra.

³ Nwatî ethîrwa ûvoro mwaro ûrîa tûvunjagia nî mûthithe, ûthithîtwe tu kûrî andû arîa maraûra.

⁴ O matiîtîkagia nîûndû meciria mao nîmaigîtwe ndumarî nî ngai wa maveeni ûrîa wathaga nthî îno. Ke nîamarigîrîrîtie matikone ûtheri ûrîa umanaga na ûvoro mwaro wa riiri wa Kristû ûrîa arî ke mûvuanîre wa Ngai.

⁵ Nîûndû tûtivunjagia ûvoro wetû tue ene, tûvunjagia Jesû Kristû nî Mwathani. Natue tûrî ndungata cienyu nîûndû wa Jesû.

⁶ Nîûndû Ngai nîke waugire atîrî, “Tiga ûtheri ware ndumarî.” Ngai ûcio nwake watûmire ûtheri wake ware ngororî cietû nîguo tûmenye riiri wa Ngai ûrîa ûrî ûthiûrî wa Kristû.

⁷ Nwatî tûrî na mûthithû ûyû twîkariî ta nyûngû cia yûmba nîguo kwonanue atî vinya mûnene uumaga kûrî Ngai, nwatî tî kuuma kûrî tue.

⁸ Tue nîtûnyamaragua na njîra cionthe, nwatî tûtivootagwa. Vîndî îmwe twîthagîrwa tûkîthangania, nwatî tûtikucaga ngoro.

⁹ Tûnyariragwa, nwatî tûtitiganagîrua. Tûtivagua, nwatî tûticûkangagua.

¹⁰ Vîndî cionthe tûkuuaga gîkuû Kîam Jesû mîîrîrî yetû nîguo ûtûûro wake wa naguo wonekane mîîrîrî yetû.

¹¹ Nîûndû tue arîa tûrî mwoyo vîndî cionthe twîthagîrwa tûrî thînarî wa gûkua nîûndû wa Jesû, nîguo mwoyo wake wonekage mîîrîrî îno yetû îkucaga.

¹² Ûguo nî kuga gîkuû kîthagîrwa gîkîruta wîra ndaarî yetû, naguo mwoyo wîthagîrwa ûkîruta wîra ndaarî yenyu.

¹³ Kwandîkîtwe mandîkorî matheru atîrî, “Nie naaririe nîûndû nînetîkirie.” Kwoguo tûrî mwoyo ûcio wa wîtîkio, tue wanatue nîtwaragia nîûndû nîtwîtîkîtie.

¹⁴ Nîtwîcî atî Ngai ûrîa wariûkirie Mwathani Jesû nî agaatûriûkia vamwe na Jesû na atwige tûrî vamwe namue mbere yake.

¹⁵ Maûndû mama monthe meekirwe nîûndû wenyu. Wata ûrîa wega wa Ngai ûgûkinyîra andû eengî makîria, nwaguo andû acio magaacokagia ngatho kûrî Ngai makîmûgoocaga.

Gûtûûra na njîra ya wîtîkio

¹⁶ Nîûndû wa gîtûmi gîkî tûtikucaga ngoro. Wana ethîrwa mwîrî ûyû wonekaga nî ûthiîcaga wa ûkîoraga, ûtûûro wetû wa kîîroho nî ûcerûvagua wa mûthenya wa mûthenya.

¹⁷ Naguo thîna ûyû tûrî naguo nî mûnini na tî wa gûtûûra. Nwatî nîûgaatûma tûgîe na riiri wa tene na tene na mwîngî makîria ya thîna ûcio.

¹⁸ Nîûndû meciria metû matirî kûrî indo irîa cionekaga nwatî marî kûrî indo irîa itonekaga. Indo irîa cionekaga itûûraga kavinda kanini, nwatî irîa itonekaga itûûraga tene na tene.