2Akor 3 - ÎVUKU RÎA ÛVORO MWARO

Ndungata cia kîrîkanîro gîcerû

¹ Anga tûreguîka ta kwa tûrambîrîria gwîtîîa rîngî? Nwa gûtuîke atî, ta andû amwe, tue nîtûkwenda maarûa cia gûtûgathîrîria tûgîûka kûrî mue kana tûkiuma kûrî mue?

² Mue ene nîmue maarûa yetû, yandîkîtwe ngororî cietû nîguo îthomwe na îmenywe nî andû onthe.

³ Nîkûronekana waro atî Kristû ke mwene nîke wandîkire maarûa îno na akîmîtûma na njîra yetû. Maarûa îno ndîandîkîtwe na rangi, nwatî yandîkîtwe na Roho wa Ngai ûrîa ûtûûraga mwoyo, na ndîandîkîtwe ivengererî cia mathiga nwatî yandîkîtwe ngororî cia andû.

⁴ Tue tûrauga ûguo nîûndû tûrî na mwîvoko kûrî Ngai na njîra ya Kristû.

⁵ Tûtirauga atî tûrî na ûvoti wa kûruta wîra ûyû. Ngai nîke ûtûvotithagia kûruta wîra ûrîa wonthe tûrutaga.

⁶ Ngai nîke watûveere ûvoti wa gûtuîka ndungata cia Kîrîkanîro gîcerû. Kîrîkanîro gîkî gîcerû tî ta watho ûrîa mwandîke nwatî nî watho wa Roho. Watho ûrîa mwandîke ûretaga gîkuû, nwatî Roho avecanaga Mwoyo.

⁷ Watho ûrîa waretire gîkuû wandîkîtwe ivengererî cia mathiga. Naguo waûkire ûrî na riiri wa Ngai ûrîa watûmire ûthiû wa Musa ûkenga mûno na andû a Isiraeli matingîavotire gwîkara maûroretie. Nwatî vuvarî riiri ûcio nîwathirire.

⁸ Ethîrwa watho ûrîa ûretaga gîkuû warî na riiri ta ûcio na nîwathirire, na kinthî wîra wa Roho wa Ngai ndûrî na riiri makîria.

⁹ Ethîrwa watho ûrîa ûtucagîra andû warî na riiri, na kinthî wîra wa Roho wa Ngai ûrîa ûtucaga andû athingu ndûrî na riiri makîria.

¹⁰ Nî ma nwa tuge atî riiri ûrîa ûkengaga nîmûthiru nîûndû nî riiri ûrîa mûcerû.

¹¹ Ethîrwa kwarî na riiri ndaarî ya kîndû kîrîa gîekarire kavinda kanini, na kinthî gûtirî riiri mwîngî makîria ndaarî ya kîndû kîrîa gîgaatûûra tene na tene?

¹² Na nîûndû tue tûrî na Kîîrîgîrîro gîkî, tûrî na ûmîrîru mwîngî.

¹³ Tue tûtiîkariî ta Musa ûrîa wekunîkire ûthiû na gîtambaa nîguo andû a Isiraeli matikoone ûkengu ûcio ûkîthira.

¹⁴ Nwatî meciria mao nîmaaûmirue, wana nginya ûmûnthî meciria mao methagîrwa marî makunîkîre na gîtambaa wata kîu rîrîa makûthoma Kîrîkanîro kîrîa gîkûrû. Gîtambaa kîu kîmakunîkîrîte meciria kîrutagwa vo tu na njîra ya Kristû.

¹⁵ Wana ûmûnthî vîndî îrîa yonthe makûthoma watho wa Musa, methagîrwa marî akunîkîre meciria mao na gîtambaa.

¹⁶ Nwatî gîtambaa kîu nwa kîthengutue wata ûrîa mandîko matheru maugaga ûvoro wîgiî Musa atîrî, “Gîtambaa kîu Kîammûkunîkîrîte ûthiû nîkîathengutirue rîrîa aacokerere Mwathani.”

¹⁷ Na rîu Mwathani nîke Roho, na varîa Roho wa Mwathani ûrî, vethagîrwa varî na wîyathi.

¹⁸ Tue tuonthe twîthagîrwa tûrî akunûre mothiû nîguo twonanagie riiri wa Mwathani. Naguo riiri ûrîa uumaga kûrî Mwathani, ûrîa arî ke Roho, nîatûgarûraga tûkavanana nake na tûrî na riiri makîria.