2Akor 2 - ÎVUKU RÎA ÛVORO MWARO

¹ Kwoguo nînatwire atî ndigaûke kûrî mue rîngî gûtûma mwîgua kîeva.

² Nîûndû ethîrwa nîngûtûma mwîgue kîeva, nî arîkû magaatigara a gûtûma ngene? Nî andû arîa tu negwithirie kîeva.

³ Kîu nîkîo gîatûmire mandîka maarûa îo kûrî mue. Nie ndiendaga gûka kûrî mue na mbîgwithue kîeva nî andû wa arîa magîrîrwe nî gûtûma ngene. Nîrî na ûma atî vîndî îrîa ngenete, wa namue muonthe mûrî akenu.

⁴ Nie naamwandîkîre nîrî na mathîna meengî na kîeva kîngî mûno ngororî yakwa ngîtûrûraga methori. Mworoto wakwa ndwarî wa gûtûma mwîgue kîeva, nwatî warî wa gûtûma mûmenye ûrîa nîrî na wendo mwîngî kûrî mue muonthe.

Kwoverwa kwa ûrîa wîvîtie

⁵ Nwatî ethîrwa nîkûrî mûndû wîgwithanîtie kîeva, ke ndekîte ûguo kûrî nie nienga, nwatî (nîrauga ûguo ndakwenda kûgathîrîria mûno) ekîte guo kûrî mue muonthe.

⁶ Îvera rîrîa eengî enyu maavere mûndû ûcio nî rîganu.

⁷ Nwatî rîu nîmwagîrîrîtwe nî kûmwovera na kûmûmîrîria nîguo ndakathiî mbere kûgîa na kîeva kîrîa kîngîtûma ata mwîvoko.

⁸ Kwoguo nie nîngûmûthaitha mûtûme ke amenye atî mue nîmûmwendete na ma.

⁹ Nie namwandîkîre maarûa îo ngîmûgeria nîguo menye kana nîmwîthagîrwa mwîvarîrîtie kûmbathîkîra maûndûrî monthe.

¹⁰ Ethîrwa mue nîmwovera mûndû, wa nanie nînovera mûndû ûcio. Nakîo kîrîa nie novanîra ethîrwa naarî na ûndû wa kwovanîra nie novanîre nîûndû wenyu nîrî mbere ya Kristû.

¹¹ Nie nekire ûguo nîguo Caitani ndagatûvoote nîûndû nîtwîcî mîvango yake nî îrîkû.

Paûlo nîwatangîkire arî Toroasi

¹² Vîndî îrîa nie naakinyire Toroasi kûvunjia Ûvoro mwaro wîgiî Kristû nînoonire atî Mwathani nîwavingûrîte njîra nîûndû wa wîra wake kuo.

¹³ Nwatî nînatangîkire nîûndû ndiona mûrwaiya Tito kuo. Kwoguo nînaugîre andû ûvoro kuo na ngîthiî Makedonia.

Ûvootani na njîra ya Kristû

¹⁴ Nwatî nîtûcokie ngatho kûrî Ngai! Nîûndû tûrî ûrûmwe na Kristû, Ngai nîatûvotanagîra vîndî cionthe. Na njîra yetû Ngai nîatambagia mûtararûko wa ûmenyo wa Kristû kûndû kuonthe.

¹⁵ Nîûndû tue twîkariî ta ûbani ûrîa ûnungaga waro ûtegeretwe Ngai nî Kristû. Naguo nîûtambaga gatagatîrî ka arîa maravonokua na arîa maraûra.

¹⁶ Kûrî andû arîa maraûra nî mûtararûko wa gîkuû, nwatî kûrî andû arîa maravonokua, nî mûtararûko wa mwoyo. Nî ûrîkû ûngîvota gwîka maûndû mama?

¹⁷ Kwoguo tue tûtiîkariî ta andû amwe eengî arîa manyitaga ndûmîrîri ya Ngai ta kîndû gîtarî vata. Nwatî nîûndû Ngai nîke ûtûtûmîte, twaragia tûrî na ûma mbere yake ta ndungata cia Kristû.