2Akor 13 - ÎVUKU RÎA ÛVORO MWARO

Ngethi cia mûthiia na Gûkaanua

¹ Rîrî nîrîo rita rîakwa rîa kathatû gûka gûcera kwenyu. “Ûndû wa wonthe ûkûthitangwa nwanginya wonanue nî ûira wa andû aîrî kana makîria,” ta ûrîa mandîko matheru maugîte.

² Nînaakanirie arîa mevîtie mbere vamwe na acio engî onthe rîrîa naarî namue. Wa na rîu nîrî kûraca nîngûmakaania. Vîndî îrîa ngaaûka rîngî gûtirî mûndû ûtakaaverithua,

³ nîûndû mue mûrenda mwonue atî Kristû araria kûvîtûkîra kûrî nie. Rîrîa araruta wîra kûrî mue ndaturaga vinya, vandû va ûguo ke nîwonanagia vinya wake gatagatîrî kenyu.

⁴ Nîûndû wana ethîrwa aambirwe mûtharavarî nîûndû wa ûvûthû wa ûmûndû, ke nîatûûraga mwoyo nîûndû wa ûvoti wa Ngai. Tûrî ûrûmwe na Kristû wa natue tûrî avûthû, nwatî tue wa vamwe namue tûgatûûra mwoyo na Kristû nîûndû wa ûvoti wa Ngai.

⁵ Îtuîrieni mue ene na mwîthime mwone kana nîmûtûûraga na wîtîkio wenyu. Nî ma nîmwicî atî mûtûûraga na Jesû Kristû, tiga nwa mwîthîrîtwe mûgwîte kîgeranio.

⁶ Nie nîngwîvoka atî mue nîmûkûmenya tue tûtirî agwîu.

⁷ Nwatî tûvoyaga Ngai mûtikevie. Tue tûtivoyaga ûguo nîguo twonanie atî nîtwîkîte waro, nwatî nîguo mwîke ûrîa kwagîrîrîte wana ethîrwa twonagwa tûrî agwîu.

⁸ Tûtingîvota gwîka ûndû wa kûregana na ûma, nwatî twîkaga maûndû ma ûma.

⁹ Tue nîtûkenaga rîrîa tûtarî na vinya namue mûrî na vinya. Kwoguo ûrîa tûvoyaga nî atî mûtuîke agîrîru.

¹⁰ Nîramwandîkîra ûguo nîrî kûraca namue, nîguo vîndî îrîa ngaaûka ndikamûvinyîrîrie ngîvûthîra vinya ûrîa mvetwe nî Mwathani. Mvetwe vinya ûcio nîguo mvote kûmûtethia nwatî tî kûmûcûkia.

Kîrîkîro

¹¹ Mûthiiarî ariû na aarî a Vava, tigwani na waro. Thondekani mîkarîre yenyu, athîkagîrani ûrîa mbugîte. Îgucanagani mûndû na ûrîa wîngî, îkaragani na thayû. Nake Ngai ûrîa ûvecanaga wendani na thayû akethagîrwa namue.

¹² Kethaniani wa mûndû na ûrîa wîngî na ngethi ntheru cia kûmumunyana. Andû onthe a Ngai nîmamûkethia.

¹³ Wega wa Mwathani Jesû Kristû, na wendani wa Ngai, na ngwatanîro ya Roho Mûtheru îrogîa kûrî mue muonthe.