2Akor 12 - ÎVUKU RÎA ÛVORO MWARO

Maûndû marîa Paûlo oonirue na aaguûrîrue

¹ Nie nwa nginya nîtîîe, wana ethîrwa gûtirî na ûndû mwaro nganyita nîûndû wa gwîtîîa. Nwatî rîu nîngûthiî na mbere kwaria ûndû wîgiî cioneki irîa noonirue na ngîguûrîrua nî Mwathani.

² Nîmbicî mûndû ûmwe Mûkristiano waunûkithirue akîthiî îgûrû mûno mîaka îkûmi na îna mîthiru. (Nie ndiîcî na ma kana ûguo nîwekîkire kana nîkwa ke oonire kîoneki; Ngai nîke wicî.)

³ Na nîmbicî atî mûndû ûcio nîwavirirwe îkenero (nie ndiîcî kana nî ma ûguo nîwekîkire kana Kîamrî kîoneki; Ngai nîke tu wicî).

⁴ Kûu ke nîwegwire maûndû matangîranwa, marîa mûndû atangîvota kwaria na kanyua gake.

⁵ Kwoguo nîretîîa nîûndû wa mûndû ûcio, nwatî ndiretîîa nîûndû wakwa. Nwa nîtîire nîûndû maûndû marîa monanagia atî ndirî vinya.

⁶ Ethîrwa nwa mende gwîtîîa, ndingîthîrwa nîrî mûritu nîûndû nîngîthîrwa ngîaria ûma. Nwatî ndigwîtîîa nîûndû ndikwenda mûndû wana ûmwe eciria ûvoro wakwa makîria ya ûrîa amonaga kana egucaga kuuma kûrî nie.

⁷ Nwatî nîguo ndigetîîe mûno nîûndû wa maûndû mengî ma magegania marîa noonirue, nie nînaverwe mwîgua ûrî na ûrûrû mûno mwîrîrî wakwa. Naguo mwîgua ûcio ûrutaga wîra ta mûnjaama wa Caitani nîguo ûnthînagie na ûngiragie gwîtîîa mûno.

⁸ Nînavoire Mwathani maita mathatû ûvororî wîgiî ûndû ûyû na nînaamûririe aûrute ume kûrî nie.

⁹ Nwatî ke nîwanjokerie atîrî, “Wega wakwa nî ûkwîganîte. Nîûndû vinya wakwa nîwonekanaga kûrîa gûtarî vinya.” Kwoguo nîngenaga mûno ngîtîîa nîûndû wa ûvûthû wakwa, nîguo vinya wa Kristû ûvotage gûtûûra ndaarî yakwa.

¹⁰ Nie nîmbîganîtwe nî gûtura vinya, kwonerwa, mathîna, kûnyarirwa na kûnyamarua nîûndû wa Kristû. Nîûndû rîrîa ngwîgua ndarî na vinya, nîrîo mbîthagîrwa nîrî na vinya makîria.

Wendi wa Paûlo gûtethia andû a Korinitho

¹¹ Nie mbîthagîrwa ngîka maûndû ta mûndû mûritu, nwatî nî mue mûtûmîte mbîka ûguo. Mue nîmue mwagîrîrwe nîkûngathîrîria. Nîûndû ndirî mûnini mûno gûkîra acio meîtaga “atûmwa” enyu a mwanya.

¹² Ciama nyîngî na morirû irîa cionanagia atî nîrî mûtûmwa wa ma nîciaringirwe gatagatîrî kenyu na ûkirîrîria mwîngî.

¹³ Nîûndû ûrîkû mûcûku mwekirwe makîria ya makanitha marîa mengî, tiga atî nie ndiamûnogia ngîenda ûtethio wa mbeca? Njoverani nîûndû wa kûmûvîtîria!

¹⁴ Rîîrî rîu nî riita rîa kathatû nîvarîrîtie gûka kûmûcerera. Nie ndigeetia kîndû kuuma kûrî mue. Nîmue ngwenda nwatî tî mbeca cienyu nîûndû ciana iticaragîria aciari ao, nwatî aciari nîo macaragîria ciana ciao.

¹⁵ Nîngaakena ngîtûmîra kîrîa kîonthe nîrî nakîo na ndûmîke nîguo nîmûtethie. Ethîrwa nînîmwendete mûno anga mue nwa mûmende vanini?

¹⁶ Mue nîmûgwîtîkîra atî, nie ndiatuîka mûrigo kûrî mue. Nwatî mue mugaga atî naarî na wara na nînaamûveenirie nîguo nîmûnyite.

¹⁷ Anga nînaamûveenirie kûvîtûkîra kûrî mûnjaama wana ûmwe wa arîa naatûmire kûrî mue?

¹⁸ Nînaûririe Tito athiî na nînatûmire Mûrû a îthe wetû ûcio wîngî mathiî nake. Mue nwa muge atî Tito nîwamûveenirie? Anga ke nanie tûtiarutire wîra na njîra îmwe na tûrî na mworoto ûmwe?

¹⁹ Mue nwa mwîthîrwe mûgîîciria atî nîkwa tûregitagîra mbere yenyu. Naarî! Tue twaragia ûrîa Kristû angîenda twarie tûrî mbere ya Ngai. Arata etû, ûndû wa wonthe twîkaga twîkaga nîguo mûtetheke.

²⁰ Nînîramaka atî rîrîa ngaakinya kûu ngethîra mûrî ngûrani na ûrîa nîngîenda mwîthîrwe mwîkariî, nanie mbîthîrwe nîrî ngûrani na ûrîa mûngîenda mbîthîrwe mbîkariî. Nînîramaka nîûndû gatagatîrî kenyu nwa kwîthîrwe na ngarari, wîru, marakara, wîyendi, kûrumana, ngutû, mwîtîîo na kûrega kwîgucana.

²¹ Nînîramaka atî rîrîa ngaaûka rîngî Ngai wakwa nîagaatûma njonoke nîrî mbere yenyu. Nanie nîngeguîra andû engî kîeva arîa meevirie na matirî merira maûndû macûku marîa meekire ta ûmaraa na merirîria macûku ma mwîrî.