2Akor 11 - ÎVUKU RÎA ÛVORO MWARO

Paûlo na atûmwa a maveeni

¹ Nie nîngûmûthaitha mûngirîrîrie wana ethîrwa nîrî mûritu vanini. Ngirîrîriani.

² Nînîramwîguîra wîru wata ûrîa Ngai amwîgucagîra, nîûndû mue mwîkariî ta mwîrîtu nthingi ûrîa nerîrîre akaavikua nî mûthuuri ûmwe, na nîke Jesû Kristû.

³ Nînîretigîra atî mwavota kûveenererua wata ûrîa njoka yavenererie Awa na mûtiganîrie ûma na wîrutîri wenyu kûrî Kristû. Na njîra ta îo Awa nîwaveenirue nî njoka na njîra ya wara wayo.

⁴ Nîûndû mue nîmûkiragîrîria mûndû wa wonthe ûrîa ûkaga kûrî mue na akamûvunjîria Jesû wîngî tiga ûrîa twamûvunjîrie. Na nîmwamûkagîra roho na mûgetîkîra ndûmîrîri îngî ngûrani mûno kuuma kûrî Roho na ûvoro mwaro ûrîa mwamûkîre kuuma kûrî tue.

⁵ Ndigwîciria atî atûmwa acio enyu metucaga a mwanya nî aro kûngîra.

⁶ Wana ethîrwa ndiîcî kwaria mbere ya andû nie nîrî na ûmenyo. Na njîra cionthe nîtwonanîtie ûndû ûyû waro kûrî mue maûndûrî monthe.

⁷ Nie ndiamûrîvia wanarî kîndû rîrîa naavunjirie Ûvoro mwaro wa Ngai kûrî mue. Nînenyivirie nîguo ndûme mue mûtuîke a vata. Anga nînavîtirie?

⁸ Vîndî îrîa naarutaga wîra gatagatîrî kenyu, navecagwa ûtethio nî andû a makanitha marîa mengî. Ûguo nî ta kuga nie naamacuunaga indo ciao nîguo nîmûtungate.

⁹ Na rîrîa twarî namue ndiamwîtia ûtethio rîrîa nendaga mbeca. Arata akwa kuuma Makedonia nîmaandetere kîndû kîonthe kîrîa naavatarîte. Ndiatuîka mûrigo kûrî mue na ndigaatuîka mûrigo wana rî.

¹⁰ Ta ûrîa ûma wa Kristû ûrî ndaarî yakwa, nie nîngwîranîra atî gûkû Akaia kuonthe gûtirî mûndû ûkaangiria gwîtîîa nîûndû wa maûndû mama.

¹¹ Nie nîrauga ûguo nîûndû ndimwendete? Ngai nîwicî atî nie nîmwendete!

¹² Nîngûthiî na mbere gwîka ûrîa nîreka rîu nîguo ndûme acio engî mareîta “atûmwa a mwanya” matikagîe na gîtûmi gîa gwîtîîa. Metîîaga makiugaga atî marutaga wîra na njîra wata îrîa tue tûrutaga.

¹³ Andû acio tî atûmwa a ma, o nî atûmwa a maveeni arîa maragia maveeni megiî wîra wao na nîmageragia kwîgarûra nîguo monekane ta atûmwa a Kristû.

¹⁴ Ûndû ûyû ndûtûmakagia! Wana Caitani nîwîgarûraga onekane ta mûraika wa ûtheri.

¹⁵ Kwoguo tî ûndû mûgeni ethîrwa ndungata cia Caitani nî ciîgarûraga nîguo cionekane ta ndungata cia ûthingu. Mûthiiarî nîmakaanyita kîrîa kîringanîte na ciîko ciao.

Mathîna ma Paûlo ta mûtûmwa

¹⁶ Nie nîngûcokera wa rîngî atî gûtirî mûndû wana ûrîkû wagîrîrwe nî gwîciiria atî nî mûritu. Nwatî ethîrwa nîguo mwîciragia, nyamûkîrani ta mûndû mûritu nîguo nanie nîtîîe vanini.

¹⁷ Ûrîa nîrauga rîu, tî ta ûrîa Mwathani angîenda mbuga ûndûrî wîgiî gwîtîîa. Nî ma nîraria ta mûndû mûritu.

¹⁸ Nwatî nîûndû andû eengî nîmetîîaga nîûndû wa ûmûndû, wa nanie nîngwîka wa guo.

¹⁹ Mue ene mûrî aûgî mûno, kwoguo nîmwamûkagîra arîa aritu mûkenete.

²⁰ Mue nîmûkiragîrîria mûndû wa wonthe ûrîa ûmwathaga ta mûrî ngombo, kana ûmûvûthagîra naaî, kana ûmûveenagîrîria. Wana nîmûkiragîrîria mûndû ûrîa wîciragia atî nî mwaro kûmûkîra na ûrîa ûmûcamûraga rûvî.

²¹ Nie nînîregua nthoni ngiuga atî tue tûtiarî na vinya wa gwîka maûndû mau! Nwatî ethîrwa mûndû wana ûrîkû nwa etîîe nîûndû wa kîndû, wa nanie nwa nîtîîe. Nie nîraria ta mûndû mûritu.

²² O nî Ayahudi? Wa nanie nî Mûyahudi. Nî Aisiraeli? Wa nanie nî Mûisiraeli. Nî njiarwa cia Iburahimu? Wa nanie nî wa rûciaro rwake.

²³ Nî ndungata cia Kristû? Nie nîraria ta mûndû wa ngoma. Nwatî nîrî ndungata mbaro kûmakîra. Nie nîndutîte wîra mûmû makîria yao. Naanaikua njeera maita meengî kûmakîra, nanarivwa na ivoko mûno kûmakîra na maita meengî nie nanethîrwa nîrî vakuvî gûkua.

²⁴ Nie nînaverithirue maita matano, na wa îverithua naarivagwa ivoko mîrongo îthatû na kenda nî Ayahudi.

²⁵ Aroma nîmaandivire na mûragi maita mathatû, na nanarivwa na mathiga riita rîmwe. Maita mathatû nanethîrwa nîrî merirî ngûrani ikaunîkanga. Rita rîmwe nanekara manjîrî ûtukû na mûthenya.

²⁶ Ng'endorî ciakwa nyîngî nanethîrwa nîrî na ûgwati kuuma kûrî mwîcûro wa manjî na kuuma kûrî mîkora. Nanethîrwa nîrî na ûgwati kuuma kûrî andû etû Ayahudi na kuuma kûrî andû a Ndûrîrî. Nanethîrwa nîrî na thîna matûûrarî manene, werûrî, îriarî na nanethîrwa nîrî na thîna kuuma kûrî arata maveeni.

²⁷ Nînarutire wîra mûrito wa mînoga na maita meengî ngatura toro. Nînavûtaga na nganyonda, nînethagîrwa ndarî na irio cia kwîgana, nyomba kana nguo.

²⁸ Na ndakûgweta maûndû mau mengî, wa mûthenya mbîthagîrwa nîrî mûritûvîre meciriarî nîûndû wa makanitha monthe.

²⁹ Rîrîa mûndû atarî na vinya, wananie mbîgucaga ndarî na vinya. Rîrîa mûndû atûma mûndû wîngî evie, nîmbîcûragwa nî marakara.

³⁰ Ethîrwa nwa nginya nîtîîe, nîngîtîîa nîûndû wa maûndû marîa monanagia ûrîa nie ndarî na vinya.

³¹ Ngai na nîke Îthe wa Mwathani Jesû, nîaicî atî nie ndiraveenania. Rîîtwa rîake rîrokumagua tene na tene!

³² Rîrîa naarî Damesiki, mûndû ûrîa wathanaga vandûrî va mûthamaki Areta nîwaigire athigari ivingorî cia îtûûra nîguo manyite.

³³ Nwatî andû amwe nîmaanyûrûrûkirie nyume nja nîrî gîkavurî. Andû acio maamvîtûkîrîrie vandû vaarî na mwanya rûthingorî nîguo mvote kûûra ndikanyitwe nîke.