2Akor 10 - ÎVUKU RÎA ÛVORO MWARO

Paûlo nîwagitîre wîra wake

¹ Nie Paûlo nie mwene monekaga nîrî mwînyivia na mûvoreri rîrîa tûrî vamwe namue na mbîthagîrwa nîrî na ûcamba rîrîa tûtarî vamwe namue, nîramûthaitha nîrî na ntha na wega wa Kristû.

² Nîramûria atî vîndî îrîa ngaaûka mûtigatûme ngaaria na ûcamba. Nîûndû nîrî na ma atî nwa mbarie na ûcamba kûrî andû arîa maugaga atî mîtugo yetû nî ya kîûmûndû.

³ Nîûndû wana ethîrwa tûtûûraga gûkû nthî tûtirûaga mbaara ya gûkû nthî.

⁴ Indo cia mbaara irîa tûtûmagîra mbaararî yetû tî cia gûkû nthî, nwatî nî vinya wa Ngai. Vinya ûcio nîguo tûtûmagîra gûcûkangia vinya wa nthû cietû na kûthiria ngarari.

⁵ Tue nîtûcûkangagia ûndû wa wonthe wa mwîgatho ûrîa ûgiragia mûndû amenya Ngai. Nîtûgarûraga meciria monthe na tûgatûma mathîkîre Kristû.

⁶ Na nîtûkaaverithia ûndû wa wonthe ûtathîkaga mue mwarîkia kwonania wathîki wenyu viû.

⁷ Taroria maûndû marîa marî mbere ya metho maku. Ethîrwa kûrî mûndû wicî atî nî wa Kristû, ke nîamenye atî wanatue tûrî a Kristû ta ke.

⁸ Nîûndû nie wana ngegatha vanini makîria ûvororî wîgiî vinya ûrîa tûvetwe nî Mwathani ndingîconoka. Nîûndû vinya ûcio nî wa gwaka wîtîkio wenyu na tî wa kûûthûkia.

⁹ Ndirenda monekane takwa nîrenda kûmûmakia na maarûa ciakwa.

¹⁰ Nîûndû amwe maugaga atî, “Maarûa cia Paûlo nî ndito na irî na vinya, nwatî rîrîa arî vamwe natue kîîmwîrî, ndarî vinya na ciugo ciake nî cia mana!”

¹¹ Mûndû ta ûcio nwanginya ataûkîrwe atî gûtirî ngûrani gatagatîrî ka ûrîa twandîkaga maarûarî cietû rîrîa tûrî kûraca na ûrîa tûgeka rîrîa tûkethîrwa tûrî kûu namue.

¹² Tue tûtikwenda kwîiga kana kwîgerekania na arîa menenevagia. Kaî o nî irimû-î! Marûthaga ithimi ciao cia kwîthima o ene nacio, na magetuîra na njîra ya ithimi wa icio.

¹³ Nwatî tue tûtigwîtîîa kûvîtûka kîthimi, tue nîtwîgatha nîûndû wa wîra ûrîa Ngai aatûveere, naguo wîra ûcio nî wîra wetû gatagatîrî kenyu.

¹⁴ Tûtiaruta wîra makîria ya ûrîa twagîrîrwe nî kûruta vîndî îrîa twaûkire kwenyu rîa mbere, kûmûretere Ûvoro mwaro wîgiî Kristû.

¹⁵ Kwoguo tûtikwîgatha nîûndû wa wîra ûrîa andû engî marutîte makîria ya ûrîa Ngai atûvete. Vandû va ûguo, tûkwîvoka atî wîtîkio wenyu nîûkwongerereka na nîtûkaavota kûruta wîra mûnene makîria gatagatîrî kenyu ûrîa Ngai atûvete.

¹⁶ Na nwatûvote kûvunjia Ûvoro mwaro mavûrûrirî marîa marî kûraca na kwenyu, na tûtigeetîîa ûndûrî wîgiî wîra ûrîa ûrîkîtie kûrutwa mûgûndarî wa mûndû wîngî.

¹⁷ Nwatî mandîko matheru maugîte atîrî, “Mûndû wa wonthe ûngîenda gwîtîîa nwa nginya etîîe ûndûrî wîgiî ûrîa Mwathani ekîte.”

¹⁸ Nîûndû andû arîa metucaga aro tîo Ngai amûkagîra, nwatî amûkagîra arîa ke atûcaga aro.