1Tim 6 - ÎVUKU RÎA ÛVORO MWARO

¹ Ngombo cionthe nwanginya ivecage anene acio gîtîîo kîrîa kîmagîrîrîte nîguo gûtikagîe mûndû ûkwaria ûndû mûcûku wîgiî rîîtwa rîa Ngai na maûndû marîa tûthomithagia.

² Ngombo itiagîrîrwe nî kûnyarara anene a cio nîûndû atî anene nî etîkia wata cio. Nwatî nîciagîrîrwe nî gûtungata athani a cio waro makîria. Nîûndû andû arîa magunîkaga kuumana na ûtungata ûcio wao, nî etîkia arîa o mendete. Nwanginya ûvunjagie na ûthomithagie maûndû mama.

Kîthomo kîa maveeni na ûtonga wa ma

³ Mûndû wa wonthe ûthomithagia ûndû mûgeni na ûndû ûtakwîgucana na ndûmîrîri ya ma ya Mwathani wetû Jesû Kristû, na maûndû marîa mathomithanagua nî ndini yetû,

⁴ mûndû ûcio nî mwîtîi na gûtirî ûndû ecî. Mûndû ûcio ethagîrwa arî na mûrimû wa kwenda ngarari na gûteta ûvororî wîgiî ciugo. Ûndû ûyû nîûretaga wîru, înegene, irumi, gwîciiranîria naaî,

⁵ na ngarari vîndî cionthe kuuma kûrî andû arîa matarî na meciria maro na matiganagîria ûma. Andû ta aya meciragia gûtuîka mûkristiano nî njîra îmwe ya gûtonga.

⁶ Gûtuîka Mûkristiano nî gûtûmaga mûndû agîe na ûtonga mûnene ethîrwa tu mûndû nîmwîganîru na kîrîa arî na kîo.

⁷ Gûtirî kîndû twaretire gûkû nthî na gûtirî kîndû tûkaaruta gûkû nthî.

⁸ Kwoguo, ethîrwa tûrî na irio na nguo icio nîitwîganîte.

⁹ Nwatî andû arîa meriragîria gûtonga nîmagûcaga mageriorî na mûtegorî wa kwîrirîria maûndû ma ûrimû na ma kûmacûkangia.

¹⁰ Nîûndû wendi wa mbeca nîkîo kiumo Kîam maûndû marîa macûku monthe. Andû amwe matiganîrîtie wîtîkio wao nîûndû wa kwenda mbeca mûno na makagîa na ûrûrû na kîeva kîîngî ngororî ciao.

Paûlo nîwavere Timotheo kîrîra

¹¹ Nwatî we mûndû wa Ngai, ûrîra maûndû mau monthe. Îîrutanîrie kûgîa na ûthingu, ûngai, wîtîkio, wendo, ûkirîrîria na ûvoreri.

¹² Rûa mbaara mbaro ya wîtîkio, nîguo ûgîe na mwoyo wa tene na tene ûrîa wetîrwe vîndî îrîa waumbûrire ûrîa wîtîkîtie Jesû Kristû ûrî mbere ya aira eengî.

¹³ Nîrakwatha nî mbere ya Ngai ûrîa ûvecaga indo cionthe mwoyo, na mbere ya Jesû Kristû ûrîa waumbûrire wîtîkio wake mbere ya Pontio Pilato,

¹⁴ atî ûtuîke mwathîki na mwîvokeku îgûrû rîgiî mataaro monthe marîa ûvetwe nginya mûthenya ûrîa Mwathani wetû Jesû Kristû agaaûka.

¹⁵ Gûka gwake nîgûkoonanua vîndî îrîa yagîrîrîte yakinya. Gûkoonanua nî Ngai ûrîa Mûrathime, Mûthamaki wa athamaki na Mwathani wa athani.

¹⁶ Ke nîke tu ûtakucaga. Atûûraga ûtherirî ûtangîkuvîvîrua nî mûndû. Gûtirî mûndû wanamwona na gûtirî mûndû ûngîvota kûmwona. Ke arotîîwa na agîe na wathani ûrîa ûtathiraga! Ameni.

¹⁷ Atha andû arîa marî na ûtonga wa nthî îno matigetîîe. Meere matikaige mwîvoko wao kûrî ûtonga wa gûkû nthî ûrîa ûthiraga narua, nwatî maige mwîvoko wao kûrî Ngai ûrîa ûtûvecaga indo cionthe nîguo tûtûûre na gîkeno.

¹⁸ Atha itonga ituîke andû aro na ituîke itonga cia mawîra marîa maro. Maathe matuîke andû ataana na andû a kûgaana indo ciao na andû arîa engî.

¹⁹ Na njîra ta îno nîmakwîthîrwa meigîrîte mûthithû wao wî ta mûcingi wî na vinya wa vîndî îrîa îgaûka. Nao nîmagaacoka magîe na mûtûûrîre ûrîa wa ma.

²⁰ Timotheo, menyerera kîndû kîrîa Ngai akwîvokerete. Ndûkathikagîrîrie mîario îtarî na ûngai na ngarari cia ûrimû irîa andû amwe maugaga atî nî ûmenyo na tîguo.

²¹ Andû amwe maugaga atî marî na ûmenyo ûcio na kwoguo magatiganîria wîtîkio ûrîa wa ma. Wega wa Mwathani ûroekara namue muonthe.