1Tim 5 - ÎVUKU RÎA ÛVORO MWARO

Kwîrutîra nîûndû wa andû arîa metîkîtie

¹ Ndûkagûkie mûndû mûkûrû, nwatî mwarîrie ta ûrîa ûngîarîria aguo, nao anake ûmonage ta aa mûrwanyûkwe.

² Aka arîa akûrû nao monage ta arî aa nyûkwe, nao erîtu ûmonage ta aa mwarwanyûkwe. Îkaga ûguo ûrî na ngoro ntheru.

³ Menyagîrîra aka a ndigwa arîa matarî na andû mangîmatethia.

⁴ Nwatî ethîrwa mûndûmûka wa ndigwa arî na ciana kana aa ûcûwe, mbere nîmagîrîrwe nî kûmenya ûrîa magîrîrwe nî gûtethia mûciî wao ta ûrîa mûkristiano agîrîrwe nî gwîka. Na njîra ta îno makaarîvaga aciari ao, nîûndû ûndû ûcio nîguo ûkenagia Ngai.

⁵ Mûndûmûka wa ndigwa ûrîa ûtarî na mûndû wa kûmûtethia na wîkaraga wenga, aigaga kîîrîgîrîro gîake kûrî Ngai. Avoyaga ûtukû na mûthenya nîguo Ngai amûtethie.

⁶ Nwatî mûndûmûka wa ndigwa ûrîa ûtûûraga ekenagia na maûndû marîa eriragîria, nî mûkuû wana ethîrwa onekaga arî mwoyo.

⁷ Mathageni nîguo matikagîe na ûndû mangîcukwa naguo.

⁸ Ethîrwa kûrî mûndû ûrîa ûtamenyagîrîra andû ao na makîria andû a nyomba yake, nîmûreganu na wîtîkio na nî mûcûku gûkîra mûndû ûtetîkîtie.

⁹ Mûndûmûka wa ndigwa ûrîa wagîrîrwe nî kwîyandîkithia, nî ûrîa wîna mîaka makîria ya mîrongo îtandatû na ethîrwe avikîtue nî mûthuuri ûmwe tu.

¹⁰ Nwanginya ethîrwe arî mûndû wîcîkene na arî na ngumo mbaro, mûndûmûka ûrerete ciana ciake na njîra mbaro, ûgwataga andû ûgeni gwake mûciî, ûtethagia andû arîa marî thînarî, ûtungatagîra akristiano arîa engî enyivîtie na wîkaga ûndû wa wonthe mwaro.

¹¹ Nwatî ndûkandîke aka a ndigwa arîa ethî mûtaratararî ûcio, nîûndû vîndî îrîa magîa na merirîria ma mwîrî marîa matûmaga mende kûvika, nîmatiganagîria ûvoro wa Kristû.

¹² Kwoguo aka aya nîmatucagîrwa nîûndû nîmatiganîrîtie maûndû marîa meeranîre.

¹³ Wana nîmemenyagîria gûtuîka igûta, andû a kûrûraga mîciîrî yene, andû a ngutû, andû metonyagîrîria maûndûrî ma andû arîa engî na maragia maûndû marîa mataagîrîrwe nî kwarua.

¹⁴ Kwoguo nîrona kwagîrîrîte aka a ndigwa arîa ethî mavike, magîe na ciana na mamenyerere mîciî yao. Meka ûguo, nthû cietû itikaagîa na kamweke ga gûtûruma.

¹⁵ Nîûndû aka amwe a ndigwa nîmagarûrûkîte na makarûmîrîra Caitani.

¹⁶ Nwatî ethîrwa kûrî mûndûmûka mûkristiano wî na aka a ndigwa gwake mûciî, nîamatethie. Kanitha ndîgakuithue mûrigo ûcio nîguo îvote gûtethia aka a ndigwa arîa matigîtwe matarî na mûndû wa kûmatethia.

¹⁷ Athuuri a kanitha arîa matongoragia waro nîmagîrîrwe nî kûvewa mûcara mwaro, makîrîa arîa marutaga wîra na vinya wa kûvunjia na kûthomithia.

¹⁸ Nîûndû mandîko matheru maugîte atîrî, “Ndûkove ndegwa kanyua rîrîa îraruta wîra mûgûndarî,” na “Mûruti wîra nwanginya arîvagwe mûcara wake.”

¹⁹ Ndûgetîkîre mûthuuri wa kanitha athitangwe, tiga nwa vethîrîtwe varî aira aîrî kana athatû.

²⁰ Andû arîa mekaga mevia magîrîrwe nî gûkaanua marî mbere ya andû onthe nîguo andû arîa engî metigîre.

²¹ Nîrî mbere ya Ngai na ya Jesû Kristû na mbere ya araika atheru, nîrakwatha ûvingagie maûndû mau nakwîra ûtagûcagûrania kana kîmenyano.

²² Ndûkanaigîrîre mûndû wana ûrîkû njara na karûgî atî nîguo atuîke ndungata ya Ngai. Ndûkagwatanîre na mevia ma mûndû wîngî, îkaraga ûrî mûtheru.

²³ Tigaga kûnyua manjî matheri, nwatî nyunyaga ndivei nini nîûndû wa gûtethereria îvu kûthîanga irio, nîûndû nî wîkaraga ûkîrwarangaga.

²⁴ Mevia ma andû amwe nîmeyonanagia waro, na nîmagaatûma macirithue. Nwatî mevia ma andû arîa engî macokaga kûmenyekaga vuvarî.

²⁵ Na njîra wata îno, ciîko mbaro nîcionekaga waro na ethîrwa itironeka itingîkara ciîthithîte.