1Tim 4 - ÎVUKU RÎA ÛVORO MWARO

Arimû a maveeni

¹ Roho Mûtheru nîaugaga waro atî mîthenya ya kûrigîrîria andû nîmakaarega gwîtîkia; nîmakaathîkîra maroho ma maveeni na marûmîrîre maûndû marîa mathomithanagua nî ndaimono.

² Andû mvinga na arîa mathanaga mathomithanagia maûndû ta mama. Thamiri cia andû ta aya nîciakwire na ciîkaraga takwa irî mvîvie na cuuma mviû.

³ Andû acio mathomithanagia atî nî naaî kûvikania na nî naaî kûrîa irio cia mîthemba îmwe na îmwe. Nwatî Ngai aaûmbire irio cionthe irî mbaro nîguo irîcagwe vuva wa gûcokia ngatho kûrî Ngai. Ciagîrîrwe nî kûrîwa nî etîkia arîa mamenyete ûvoro wa ma.

⁴ Indo cionthe irîa Ngai aaûmbire nî mbaro na gûtirî kîndû Kîamgîrîrwe nî kûregwa. Indo cionthe ciagîrîrwe nî kwamûkîrwa na mavoya ma gûcokia ngatho.

⁵ Nîûndû indo cionthe nîitucagwa ntheru nî kiugo Kîam Ngai na mavoya.

Ndungata mbaro ya Jesû Kristû

⁶ Ûngîthomithia etîkia onthe mataaro mama, ûkethagîrwa ûrî ndungata mbaro ya Jesû Kristû. Ûgekagîrwa vinya nî ciugo cia wîtîkio na kîrîra Kîam ma kîrîa wîthîrîtwe ûkîrûmîrîra.

⁷ Ndûkathikîrîrie ng'ano itarî vata na itarî cia Ngai. Îîthomithie gwîkara na mûtûûrîre wa Ûngai.

⁸ Kûmenyeria mwîrî gwîka maûndû nîguo ûgîe na vinya nî ûndû mwaro, nwatî kwîmenyeria gwîka maûndû marîa mangîtûma ûgîe na vinya wa kîîroho kûrî vata na njîra cionthe, nîûndû nîkûretagîra mûndû kîîrîgîrîro mwoyorî ûyû tûrî naguo rîu na mwoyorî ûrîa ûgaaûka.

⁹ Ûvoro ûyû nî wa ma na nîwagîrîrwe nî gwîtîkua nî andû onthe.

¹⁰ Ûvoro ûyû nîguo ûtûmaga tûthînîke na tûrute wîra na vinya, nîûndû tûrî na kîîrîgîrîro kûrî Ngai mûtûûra mwoyo ûrîa arî ke Mûvonokia wa andû onthe na makîria arîa metîkîtie.

¹¹ Athana na ûthomithanie maûndû mama.

¹² Ndûkanetîkîre mûndû wana ûrîkû akuire nîûndû ûrî mûndû mwîthî. Nwatî mwarîrie waku, mîtugo, wendani, wîtîkio na ûthingu nî ituîke kîonereria kûrî etîkia.

¹³ Thiî na mbere kûthomera andû mandîko matheru, kûmaûmîrîria na kûmathomithia nginya rîrîa ngaacoka.

¹⁴ Tûmîra kîveo Kîam roho kîrîa ûrî nakîo na waveerwe rîrîa arathi maaririe nao athuuri magîkwigîrîra njara.

¹⁵ Thiî na mbere gwîka maûndû mama wîvecanîte viû nîguo ûthiîi waku wa na mbere woneke nî andû onthe.

¹⁶ Îîmenyagîrîre we mwene na ûmenyagîrîre maûndû marîa ûthomithanagia. Thiî na mbere gwîka maûndû mama nîûndû weka ûguo, nîûkwîvonokia we mwene na ûvonokie andû arîa makûthikagîrîria.